Read Fulfulded Esaaya 16 Bible Online

Esaaya 16 - Fulfulded bible

Esaaya 16

¹Diga berniwol Sela nder ladde, neldane ardiiɗo lesdi jawgel haa hooseere Siyona.

²Bana colli giilotooɗi, bana collon ndiiwaakon e saɓɓo, non rewɓe Mo'ab tawrete haa eerorɗe Arnon.

³Ɓe mbi'an yimɓe Yahuuda: “Ndokke min sawari, ta'e haala! Caka nyalawma non, ɗowdi nyiɓɓa bana jemma! Cuuɗe riiwaaɓe, taa pefte dogganɓe!

⁴Acce riiwaaɓe Mo'ab koɗa haa mooɗon, laatane ɓe hisrude yeeso nattinoowo!” To toonyoowo halki, bonnuki jinni, ɓillooɓe majji e lesdi,

⁵leeso laamu tabitan dow mbooɗeeŋga, goɗɗo danygol Daawuda jooɗoto dow maago bee gooŋgaaku. O laatoto giɗɗo waɗugo ko fotti, taaskiiɗo waɗugo adilaaku.

⁶Yimɓe Yahuuda mbi'an: “Min nani habaru mawnitaare Mo'ab, ɓe mawnitiiɓe masin. Min nani haala elewre maɓɓe e mawnitaare maɓɓe e ƴaggaare maɓɓe e kappe maɓɓe meereeje.”

⁷Ngam maajum, sey yimɓe Mo'ab mboya dow Mo'ab. Ɓe fuu ɓe ɗon mboya, ɓe ɗon uuma masin to ɓe ciftori tame inabooje joorɗe iwɗe Kir-Hareseet.

⁸Ngam gese Hesbon njoori, non boo gese inabooje haa Sibama fuu. Ɓiɓɓe maaje booɗɗe nguykini jawmiraaɓe ummaatooje. Lice maaje njotti Ya'ajer, ɗe ngiili nder ladde. Ɗe ɗuuɗi e ɗe njaaji haa yotti Weendu Mannda.

⁹Ngam maajum mboyanmi dow inabooje Sibama bana yimɓe Ya'ajer mboyirta. Onon Hesbon e El'ale, mi soofnan on bee gonɗi am. Ngam wookaandu konu ukki dow ittuki ɓiɓɓe leɗɗe mon e inabooje mon.

¹⁰Seyo e welwelo njinni haa gese mon, woodaa gimol koo ilinaali haa gese inabooje. Walaa ɓiɗɗoowo inaboojam nder ɓiɗɗirde, hoolo seyo ɓiɗɗooɓe woodaa.

¹¹Mi ɗon uuma ngam Mo'ab, ɓernde am ɗon woya ngam Kir-Heeres.

¹²Yimɓe Mo'ab ɗon tiino yahugo haa nokkuuje towɗe, ɓe ɗon nasta nokkuure maɓɓe seniinde ngam do'aago, ammaa ɓe kumtataa sam.

¹³Kanjum woni koŋngol ngol Jawmiraawo wolwino dow Mo'ab.

¹⁴Jonta kam ndaa ko Jawmiraawo wi'i: “Lutti duuɓi tati kal-kal, nden daraja Mo'ab majjan, non boo mooɓre maɓɓe mawnde fuu. Bee ɗuuɗeeŋga maɓɓe fuu, ko tammi luttugo marataa saman.”