Read Fulfulded Esaaya 17 Bible Online

Esaaya 17 - Fulfulded bible

Esaaya 17

¹Ndaa koŋngol dow Damas. Jawmiraawo wi'i: “Yeeso ɗo, Damas laatataako berniwol, ngol laatoto waagaare bille.

²Berniiji Aro'er perwan haa foroy, ɗi laatoto durduɗe dabbaaji. Tokke mbaaloto ton, walaa kulnanɗo ɗe.

³Hisrude semmbiɗnde woodaa nder lesdi Efrayim, laamu Damas majjan. Luttuɓe Siriya toskoto bana yimɓe Isra'iila.” Non Jawmiraawo honooɓe asama wi'i.

⁴“Nyalaade man tedduŋgal ummaatoore Yaakubu ustoto bana fayfayru goɗɗo timmirta.

⁵Isra'iila nanndan bee ngesa, ɓaawo codoowo naŋngi geene alkamaari, juŋngo maako ta'i cammeeje. Ɗum laatoto bana nder waadiwol Refayim ɓaawo ɓoftuki caamndi.

⁶Woɗɓe maɓɓe luttan, bana ɓaawo caamki jaytunje: Ɓiɓɓe ɗiɗi koo tati haa hoore jaytunhi, nayi koo jowi haa lice maaki. Min Jawmiraawo, Allah Isra'iila wi'i ɗum.”

⁷Nyalaade man yimɓe tijjoto heedi tagɗo ɓe, kuucitinan gite muuɗum'en dow Ceniiɗo Isra'iila.

⁸Ɓe ndaarataa kirsirɗe ɗe juuɗe maɓɓe mbaɗi. Ɓe kakkilantaa ko kooli maɓɓe mbaɗi, koo labbi Asera koo gulduɗe uurle.

⁹Nyalaade man, berniiji maɓɓe cemmbiɗɗi perwan bana leɗɗe e geereeje kooseeje ɗe ɓe ngudini yeeso Isra'iila'en, ɗum laatoto ladde meere.

¹⁰Onon Isra'iila'en, on ngejjiti Allah, kisnoowo on, tapaare hisnoore on. On ɗon njubo jarne booɗɗe, on aawi aawdi njananndi ton.

¹¹Ammaa koo to ndi fuɗi nyannde on njubi ndi, koo to aawdi finni fajiri nde on aawi ndi, on keɓataa ƴaamnde, sey nyawu kalluŋgu e torra ka walaa daama.

¹²Kayto! Hoolo jama'aaje ɗuuɗɗe! Ɗe ɗon koola bana hoolo mbeela. Dukoore ummaatooje! Ɗe ɗon nduka bana dukoore ndiyamji mawɗi.

¹³Ummaatooje ɗon nduka bana dukoore ndiyamji mawɗi. Ammaa Jawmiraawo ɗon telɓana ɓe, ɓe ɗon ndogga daayiiɗum, ɓe riiwaaɓe bana nyaande yeeso henndu kooseeje, bana collawal yeeso duluuru.

¹⁴Saa'i kiikiiɗe, ɗum kulol. Hiddeko weeta, walaa koo ɗume. Kanjum woni geɗal jaɓtooɓe en e ɓoftooɓe maral men.