Read Fulfulded Esaaya 20 Bible Online

Esaaya 20 - Fulfulded bible

Esaaya 20

¹Sargon, laamiiɗo Assuura neli hooreejo jama'aare konu mum haa Asdod. Kaŋko o haɓi bee Asdod, o nyaami berniwol ngo'ol.

²Duuɓi tati hiddeko ɗum laato, Jawmiraawo wi'no Esaaya ɓii Amoosa: “Yah, fiistu leppi buhuure ɗi a haddi, faɗɗita paɗe ma boo.” Esaaya waɗi non, o yehi o temmbo, walaa paɗe boo.

³Jawmiraawo wi'i: “Bana Esaaya, suka am yehi o temmbo, walaa paɗe boo— ɗum laatanto Misra e Etiyopiya alaama e kaayeefi duuɓi tati,

⁴bana non laamiiɗo Assuura dahan haɓɓaaɓe Misra e daheteeɓe Etiyopiya, derke'en e ndotti'en fuu ɓe temmbuɓe, ɓe ngalaa paɗe, dubbe meere, ɗum laatoto toskaare dow Misra.

⁵Nden kam ɓe kultoran, ɓe cemtan daliila Etiyopiya, tammunde hayru maɓɓe e Misra, juro maɓɓe.

⁶Nyalaade man, jooɗiiɓe haa fomoonde mbeela nde'e mbi'an: Ndaa, bana nii tammunde men, hisrude walloore en wa'i ngam haa kisen juŋngo laamiiɗo Assuura. Noy ndaɗirten kadi?”