Read Fulfulded Esaaya 21 Bible Online

Esaaya 21 - Fulfulded bible

Esaaya 21

¹Ndaa koŋngol dow ladde hamaadaare wonnde kommbi mbeela. Bana duluuji bifanɗi haa Lesdi Fombina, non ɗum wardata diga ladde, diga lesdi kulniindi.

²Allah yi'ni yam kuuje kulniiɗe: Zammboowo ɗon zammbo, biloowo ɗon wila. “Jama'aare Elam, wa'a! Jama'aare Mediya, hippa! Mi timminan uumaali yimɓe Baabila.”

³Ngam man keeci am tampi, naawreeŋga naŋngi yam bana luuwe ɓesnanɗo. Mi sakli, mi huli haa mi waawaay nanugo e yi'ugo.

⁴Hoore am ɗon yiilo, kultoreeŋgol ɗon hulnammi. Maŋngariba ka keppantoomi ɗum, laatani yam daliila diwnol.

⁵Mi yi'i ɓe ɗon ngurtina nyaamdu, ɓe ɗon mbe'ita daago, ɓe ɗon nyaama, ɓe ɗon njara. Nden umroore waɗaama: “Onon hoore'en umme, nguje bawarɗe[20] bee nebbam!”

⁶Ndaa nii Jawmiraawo wi'i yam: “Darnu aynoowo! Ko o yi'ata fuu, o wi'a.

⁷To o yi'i mootaaji ɗi pucci ɗiɗi ɗiɗi ɗon ndasa, to o yi'i boo wa'iiɓe bamɗe e wa'iiɓe geelooɗi, nden kam sey o hakkila masin!”

⁸Ndaa, aynoowo ɗon hoola: “Barkaama, tum mi ɗon dari dow suudu aynirdu, jemma fuu mi ɗon dari haa babal aynol.

⁹Ndaa, mootaaji pucci ɗon ngara, bee wa'iiɓe ɗi! Wa'iiɓe ɗi ɗon ngara ɗiɗo ɗiɗo!” Nden aynoowo ɗon hoola: “Ngol do'ake, Baabila do'ake! Suuraaji labbi maagol cehaaɗi fuu pusi, ɗon mbaali haa lesdi.”

¹⁰Kayto! Ummaatoore am fiyaama bana ɓe piyrata alkamaari dow laarre! Ko nanmi haa Jawmiraawo honooɓe asama, Allah Isra'iila, kanjum mbi'mi on.

¹¹[21] Ndaa koŋngol dow Duuma. Haa kooseeje Se'ir goɗɗo ɗon ewno yam: “Aynoowo, noy jemma jeŋngiri? Aynoowo, noy jemma jeŋngiri?”

¹²Aynoowo jaabi: “Subaha waɗan, non boo jemma. To ƴamtugo, ngare fahin, ƴamte kadi.”

¹³Ndaa koŋngol dow Arabiya. Nder guuɓe, nder ladde Arabiya mbaaloton, onon Dedani'en, waɗooɓe jahaale.

¹⁴Ngaddane ɗomɗuɓe ndiyam. Onon jooɗiiɓe nder lesdi Tema[22], njahrane dogganɓe nyaamdu.

¹⁵Ngam ɓe ɗon ndogga yeeso kaafahi, yeeso kaafahi losaaki e lagaawal tiraaŋgal, yeeso caatal konu.

¹⁶Ndaa nii Jawmiraawo wi'i yam: “Lutti nduuɓu ngootu kal-kal, nden tedduŋgal Keedar fuu jinnan.

¹⁷Limgal waawɓe lagaaje luttanɓe haa yimɓe Keedar famɗan masin. Min Jawmiraawo, Allah Isra'iila wi'i ɗum.”