Read Fulfulded Esaaya 24 Bible Online

Esaaya 24 - Fulfulded bible

Esaaya 24

¹Ndaa, Jawmiraawo ferwinan lesdi, wonnan ndi. O jiiɓan ndi, o saŋkitan jooɗiiɓe ton.

²Kiita ngoota laatanto ummaatoore e limanjo, maccuɗo e jawmum, korɗo e jawmum debbo, coodoowo e coorroowo, dokkuɗo nyamaande e jaɓɗo nyamaande.

³Lesdi ferwan, ɓe ɓoftan kuuje maari fuu, ngam Jawmiraawo wolwi koŋngol ngo'ol.

⁴Lesdi ɗon nder suno, ɗon ɗayla. Duniyaaru ɗon jinna, ɗon wonno. Asamanji ɗon njinna hawtaade bee lesdi.

⁵Lesdi soɓi les jooɗiiɓe muuɗum, ngam ɓe ƴaɓɓi umrooje, ɓe luuti farillaaji, ɓe piisti alkawal duumiiŋgal.

⁶Ngam maajum naaloore ɗon nyaama lesdi, jooɗiiɓe maari ɗon njara bone daliila aybe muuɗum'en. Ngam maajum jooɗiiɓe nder lesdi ɗon njinna, luttanɓe ɗuuɗataa sam.

⁷Inaboojam ɗon jinna, inabohi ɗon yoora, wela-ɓerɗe'en fuu ɗon uumo.

⁸Hoolo seyo bawɗi acci naneego, hoolo welweltuɓe timmi, hoolo seyo moolooru nanataake.

⁹Ɓe acci yarugo inaboojam bee gimi, nguykinoojam laatani yarooɓe ɗam kaaɗɗam.

¹⁰Berniwol perewŋgol yibbi, cuuɗi fuu maɓɓake, taa goɗɗo heɓa nastugo.

¹¹Gookaali ɗon nder laabi ngam inaboojam woodaa. Seyo fuu majji, welwelo lesdi eggi.

¹²Walaa ko lutti nder berniwol, sey bille. Dammuɗe maagol ngibbi.

¹³Bana non ɗum laatoto caka duniyaaru, caka ummaatooje, bana caamki jaytunje, bana saa'i ittuki ɗiɗahi, to ittuki inabooje timmi.

¹⁴Ammaa luttanɓe kooldan, ɓe mbaɗan gookaali seyo. Haa hiirnaaŋge ɓe koolan bee seyo ngam tedduŋgal Jawmiraawo:

¹⁵“Teddine Jawmiraawo haa fuunaaŋge! Dow duule mbeela teddine innde Jawmiraawo Allah mo Isra'iila!”

¹⁶Haa keeri duniyaaru en nanan gimi dow Tedduŋgal Adiliijo. Ammaa min kam mi ɗon wi'a hoore am mi kalkuɗo. Bone laatanake yam! Zammbooɓe ɗon zammbo! Zammba maɓɓe ɗon ɓesdo!

¹⁷Kultoreeŋgol e tuuforgol e ngaska ɗon ndeena on, onon yimɓe duniyaaru!

¹⁸Dogguɗo hoolo kultoreeŋgol do'oto nder ngaska, gurtiiɗo ngaska nastan tuuforgol. Ngam burɗe asama maɓɓiti, caɓɓaaje lesdi ndimmbake.

¹⁹Lesdi ɗon seeka, ɗon yibba, ɗon dimmbidimmbino.

²⁰Lesdi ɗon liilta bana guykuɗo, ɗon dimmbo bana laymaaru. Aybeeji maari teddani ndi, ndi ɗon do'o, ndi ummitittaako.

²¹Nyalaade man Jawmiraawo hiitoto mooɓre konu asama haa asama e laamiiɓe duniyaaru boo dow lesdi.

²²O mooɓtan ɓe fuu, bana haɓɓaaɓe nder ngaska, o maɓɓan ɓe nder suudu fursina. Ɓaawo nyalɗe ɗuuɗɗe o hiitoto ɓe.

²³Lewru toskan, naaŋge semtan. Jawmiraawo honooɓe asama ɗon laamo, o laamiiɗo dow hooseere Siyona haa Urusaliima. Ndotti'en yimɓe maako ngi'an tedduŋgal maako.