Read Fulfulded Esaaya 55 Bible Online

Esaaya 55 - Fulfulded bible

Esaaya 55

¹Hey! Onon ɗomɗuɓe, ngare haa ndiyam, koo mo walaa ceede! Ngare, coode, nyaame! Ngare, coode inaboojam e kosam bilaa ceede, bilaa yoɓugo koo ɗume.

²Koni ndokkoton cardi ngam ko laataaki nyaamdu? Koni ndokkoton ngeenaari mon ngam kuuje ɗe kaarnataa? Naneeɗam booɗɗum! Nyaame kuuje booɗɗe, nyaame nyaamdu ɓurdanndu wooɗugo.

³Keɗite! Ngare haa am. Nane! Nden on ngeeɗan. Mi haɓɓan alkawal duumiiŋgal bee mooɗon, mi mo'anan on mo'ere nde mi iinani Daawuda.

⁴Ndaa, mi darni mo o ceedoowo yam caka ummaatooje, o ardiiɗo, umroowo ɗe.

⁵Jonta a ewnoto ummaatoore nde a anndaa. Ummaatoore nde anndaano ma waran haa maaɗa bee jaawal. Min Allah Jawmiraawo ma, Ceniiɗo Isra'iila, mi waɗan ɗum, mi hokkete daraja.

⁶Ɗakkotire bee Jawmiraawo saa'i o taweteeɗo. Tore mo saa'i o ɓadiiɗo.

⁷Sey kalluɗo acca laawol mum, marɗo hakke acca numooji mum. O lorto haa Jawmiraawo, kaŋko boo o enɗan mo. O lorto haa Allah men, ngam o yaafoto ɗuuɗɗum.

⁸Jawmiraawo wi'i: “Numooji am nanndaay bee numooji mooɗon, laabi mon boo nanndaay bee laabi am.

⁹Bana asama towtiri dow lesdi, bana non laabi am towtiri dow laabi mooɗon, numooji am boo dow numooji mooɗon.

¹⁰Iyeende e mallimallooje toɓan diga asama. Ɗe lorataako haa ton, sonaa to ɗe njarni lesdi, haa ndi fuɗna, ndi rima, ndi hokka aawoowo aawdi, nyaamoowo boo nyaamdu.

¹¹Bana non boo wolde am wurtiinde hunnduko am. Nde lorataako haa am sookre, ammaa nde waɗan ko fottani yam, nde hiɓɓinan anniya am.

¹²On ngurtoto bee seyo, mi hooran on nder salaaman. Kooseeje e towndiije mbelmbeltan yeeso mooɗon, leɗɗe ladde fuu kellan juuɗe.

¹³Leɗɗe booɗɗe mawnan haa nokkuure gi'e, haa pellel giŋngille boo irin asuraaje. Ɗum laatanto yam daraja e alaama nduumiika, ɗum ittataake sam.”