Read Fulfulded Esaaya 60 Bible Online

Esaaya 60 - Fulfulded bible

Esaaya 60

¹Umma, yaynu! Ngam annoora maaɗa wari, tedduŋgal Jawmiraawo wari dow ma.

²Nyiɓre ɗon sudda duniyaaru, nyiɓre nyiɓɓunde boo ɗon sudda ummaatooje. Ammaa dow maaɗa Jawmiraawo ɗon yayna, tedduŋgal maako ɗon waŋga dow maaɗa.

³Ummaatooje ngaran haa annoora maaɗa, laamiiɓe boo haa jayŋgol ngol a fuɗɗi waŋgingo.

⁴Tijja, laar nder taarde fuu: Yimɓe ma ɗon mooɓo, ɗon ngara haa maaɗa. Ɓiɓɓe ma worɓe ɗon ngara diga daayiiɗum, ɓiɓɓe ma rewɓe ɓe roondeteeɓe dow asaaŋgal.

⁵A yi'an ɗum, a seyoto, seyo ma waŋgan. Ɓernde ma welweltan ngam seyo. Ngam jeynitaare mbeela waylititto gal maaɗa, risku ummaatooje boo waran haa maaɗa.

⁶Mooɓre geelooɗi cuddete, ɗi ngaran diga Mediyan e Efa. Yimɓe Saba fuu ngaran, ɓe ngaddan kaŋŋeeri e uurle, ɓe ngaazoto maŋgtooje Jawmiraawo.

⁷Tokke Keedar fuu mooɓoto haa maaɗa. Jawɗi Nebayot laatanto ma lii'eteeɗi. A lii'oto ɗi dow hirsirde, mi yerdoto ɗi. Mi mawninan daraja suudu am ko ɓuri naane.

⁸Ɓeye piirata bana duule, bana pooli piiranɗi haa caɓɓe muuɗum'en?

⁹Duuɗe ɗon tammoro yam, laanaaje Tarsis ɗon ardo, haa ɗe ngartira ɓikkoy ma e cardi ma e kaŋŋeeri ma diga daayiiɗum. Ɓe ɗon ngara maŋgtugo innde Jawmiraawo Allah maaɗa, mo Ceniiɗo Isra'iila, mo hokki ma daraja.

¹⁰Jawmiraawo wi'i Urusaliima: “Jananɓe nyiɓtoto mahi ma, laamiiɓe maɓɓe kuuwante. Ngam nder tikkere am mi fiyi ma, ammaa nder hinnuye am mi enɗete.

¹¹Dammuɗe ma maɓɓititto foroy, ɗe maɓɓataako jemma e naaŋge fuu, haa ɓe ngadda risku ummaatooje haa maaɗa, ɓe njahra laamiiɓe maɓɓe boo bee tokkindirki.

¹²Ammaa to ummaatoore malla laamu sali huuwango ma, ɗum halkan. Ummaatooje ɗe'e nattan fuu.

¹³Tedduŋgal Libanon waran haa maaɗa, non boo leɗɗe cemmbiɗɗe e irin leɗɗe booɗɗe mawɗe e pamare fuu ngam fawnugo nokkuure am seniinde. Mi teddinan nokkuure nde kosɗe am njaaɓata ton.

¹⁴Ɓillooɓe ma ngaran haa maaɗa ɓe turiiɓe. Yawiiɓe ma cujidante. Ɓe ewnete Berniwol Jawmiraawo, Siyona, berniwol Ceniiɗo Isra'iila.

¹⁵Naane ɓe acci ma, ɓe nganyi ma, walaa koo gooto nasti nder maaɗa. Ngam maajum mi hokkete daliila mantaago foroy, a laatoto nokkuure seyo diga yidere haa yidere.

¹⁶A musinan haa ummaatooje e haa laamiiɓe. Nden kam a anndan min Jawmiraawo mi kisnoowo ma e coottoowo ma, min Allah Yaakubu, mi Baawɗo.

¹⁷Haa pellel njamndi mboɗeeri ngaddanmi kaŋŋeeri, haa pellel njamndi ɓaleeri ngaddanmi cardi, haa pellel leggal, njamndi mboɗeeri, haa pellel kaa'e boo njamndi ɓaleeri. Mi jo'inan salaaman bana aynoowo ma, adilaaku boo bana laamanooɓe ma.

¹⁸Haala toonyaare meetataa naneego nder lesdi ma, haala bonnuki e halkere meetataa naneego nder keeri ma fuu. A inndan mahi ma Kisndam, dammuɗe ma boo Maŋgtoore.

¹⁹Naaŋge laatataako annoora ma nyalawma fahin, lewru boo yaynantaa ma jemma. Min Jawmiraawo mi laatoto annoora ma haa foroy, min Allah maaɗa mi laatoto jayŋgol ma ɗelkanŋgol.

²⁰Naaŋge maaɗa mutataa, lewru maaɗa sottataa. Ngam min Jawmiraawo mi laatoto annoora ma haa foroy. Nden nyalɗe suno ma timman.

²¹Yimɓe ummaatoore ma fuu laatoto adili'en. Ɓe maran lesdi haa foroy. Min tiggi lisal man, mi waɗi kuugal nga'al ngam waŋgingo daraja am.

²²Pamaro mon laatoto ujineere, ɓurɗo leesugo caka mooɗon boo ummaatoore semmbiɗnde. Min Jawmiraawo mi waɗan ɗum nder wakkati maajum bee jaawal.”