Read Fulfulded Esaaya 65 Bible Online

Esaaya 65 - Fulfulded bible

Esaaya 65

¹Jawmiraawo wi'i: “Mi waŋgini hoore am haa yimɓe ɓe ƴamaay yam. Mi acci yimɓe ɓe ɗaɓɓitaay yam tawammi. Ummaatoore nde ewnaaki innde am, mi wi'i nde: Ndaa yam ɗo, ndaa yam ɗo!

²Mi weeɗi juuɗe am foroy ngam jaɓɓaago ummaatoore tuurtunde, tokkotoonde laawol kalluŋgol ngol numooji maare.

³Foroy yimɓe ummaatoore nde'e ɗon mettinammi. Ɓe ɗon lii'ano labbi kirseteeɗi nder jarne, ɓe ɗon ngula uurle dow birikje.

⁴Ɓe ɗon jooɗo caka genaale, ɓe ɗon mbaalo nder lowi. Ɓe ɗon nyaama kusel gaduuji, ɓe ngoodi nyaamduuji karamɗi nder taasaaje maɓɓe.

⁵Nden ɓe ɗon mbi'a: Dara to, taa ɓaditam, ngam mi cenaaɗo. To mi yi'i ko mbaɗoton fuu, mi ɗon tikka tikkere saatunde.

⁶Ndaa, ɗum winndaama yeeso am. Mi jeeɗataako, mi warjoto ɓe. Mi warjoto

⁷aybeeji maɓɓe e aybeeji kaakiraaɓe maɓɓe fuu. Non Jawmiraawo wi'i. Ɓe nguli uurle dow kooseeje, ɓe njanci yam dow towndiije. Fakat mi hokkan ɓe ngeenaari kuuɗe maɓɓe.”

⁸Ndaa nii Jawmiraawo wi'i: “To ndiyam waɗi nder inabooje, ɓe mbi'an: Taa wonnu ɗe, ngam barka ɗon nder maaje! Non boo mbaaranmi ngam daliila suka'en am, mi wonnataa mooɓgal fuu.

⁹Mi hokkan yimɓe Yaakubu e Yahuuda danygol. Ɓe maran kooseeje am. Suɓaaɓe am maran lesdi ndi'i, suka'en am njooɗoto ton.

¹⁰Saron laatoto ngaynaaka dammooji, waadiwol Akor boo waalde na'i ngam ummaatoore am ɗakkotirnde bee am.

¹¹Ammaa onon accanɓe Jawmiraawo, yejjitanɓe hooseere am seniinde, taaskitantooɓe Gada nyaamdu, hebbinanɓe jardugel Meni[48] bee njaram njillaaɗam,

¹²mi hoddiranan on kaafahi. On fuu, on turoto ngam ɓe mbara on. Ngam mi ewni on, ammaa on njaabaaki. Mi wolwani on, ammaa on nanaay, on mbaɗi kalluɗum yeeso am, on cuɓi ko fottanaay yam.

¹³Ngam maajum, Allah Jawmiraawo wi'i: Suka'en am nyaaman, ammaa onon, dolo naawan on! Suka'en am njaran, ammaa onon, ɗomka naawan on! Suka'en am ceyoto, ammaa onon on cemtan!

¹⁴Suka'en am ngiman, ɓerɗe maɓɓe ceyoto, ammaa onon on ngookan ngam torra ɓernde mon, on mboyan ngam metteeŋga ruuhu mon!

¹⁵Suɓaaɓe am kunorto inɗe mooɗon, ɓe mbi'an: Jawmiraawo Allah mbara on! Ammaa suka'en am, mi ewnoto ɓe bee innde hesre.

¹⁶Koo moy haa lesdi giɗɗo barkiɗineego, tefan ɗum bee innde Allah koolniiɗo. Koo moy kunotooɗo haa lesdi, hunorto bee Allah koolniiɗo. Ngam ɓe ngejjitan ɓillaaje ɓooymaaje, ɗe majjidan haa gite am.”

¹⁷“Ndaa, mi tagan asamaawu kesu e lesdi kesri. Kuuje ɓooymaaje ciftortaake, ɗe ngartataa haa numo goɗɗo.

¹⁸Ammaa ceye, mbelmbelte haa foroy ngam ko taganmi. Urusaliima kesol ngol taganmi, laatoto berniwol welwelo, ummaatoore maagol boo ummaatoore seyo.

¹⁹Mi welweltan daliila berniwol Urusaliima, mi seyorto ummaatoore am. Bojji e gookaali meetataa naneego nder maagol.

²⁰Musinanŋgel maayanŋgel ɓaawo nyalɗe seɗɗa wonataa fahin. Nayeejo boo fuu ciknan balɗe muuɗum. Mo maayi yaake o ɗon bee duuɓi teemerre, o derkeejo. Mo yottaaki duuɓi teemerre, ɓe ndaaran mo bana naalaaɗo.

²¹Ɓe nyiɓan cuuɗi, ɓe njooɗoto ton boo, naa goɗɗo feere. Ɓe njuboto gese inabooje, ɓe nyaaman ɓiɓɓe maaje boo, goɗɗo feere nyaamataa ɗe. Balɗe yimɓe am njuutan bana ɗe leɗɗe. Suɓaaɓe am ceyorto kuuɗe juuɗe muuɗum'en.

²³Ɓe torrataako meere, ɓe ndanyataa ɓikkoy ngam halkere. Min Jawmiraawo mi barkiɗinan ɓe, kamɓe e danygol maɓɓe.

²⁴Hiddeko ɓe ewno, njaabotoomi. Saa'i ɓe ɗon mbolwa tawon, nananmi.

²⁵Saafaandu e bortel ndurdan. Mbarooga nyaaman huɗo bana ngaari. Mboodi boo, mbulwuldi laatoto nyaamdu muuɗum. Halleende e nattere ngonataa dow hooseere am seniinde fuu.” Nii Jawmiraawo wi'i.