Read Fulfulded Esaaya 9 Bible Online

Esaaya 9 - Fulfulded bible

Esaaya 9

¹Ummaatoore wonnde nder nyiɓre yi'i annoora makka. Annoora yaynani jooɗiiɓe nder lesdi ndi nyiɓre maayde.

²An yaa Jawmiraawo, a mawnini nde, a ɗuɗɗini seyo maare. Yimɓe maare ɗon ceyo yeeso maaɗa bana ɓe ceyorto wakkati codol, bana ɓe mbelmbeltata haa cennduki keɓal konu.

³Ngam a yewi kaɓɓirgal doŋngal maɓɓe e leggal dow balbe maɓɓe e sawru toonyooɓe ɓe, bana ɓooyma nder nyalaade Mediyan.

⁴Paɗe caatuɗe ɗe honooɓe e limce tallaaɗe nder ƴiiƴam fuu, ɗe nguleteeɗe, ɗe laatoto nyaamdu yiite.

⁵En ndanyanaama ɓiŋngel, en ndokkaama ɓiɗɗo gorko! Laamu wallinaama dow balawal maako, ɓe inndan mo: Carwoowo kaayeefiijo, Allah cemmbiɗɗo, Baaba duumiiɗo, laamiiɗo salaaman.

⁶O mawninan baawɗe laamu maako, o hokkan leeso laamu Daawuda e maral mum fuu salaaman ka timmataa sam, o semmbiɗinan laamu maako, o tabitinan ngu bee kiita ndarnuka e adilaaku, diga jonta haa foroy. Jawmiraawo honooɓe asama waɗan ɗum nder tiinaare mum.

⁷Jawmiraawo neli koŋngol dow danygol Yaakubu, ngol laarani Isra'iila.

⁸Ummaatoore fuu anndan ngol, waato Efrayim e jooɗiiɓe haa Samariya, wolwanɓe bee mawnitaare e elewre:

⁹“Birikje ngibbi, ammaa min nyiɓtoto bee kaa'e cehaaɗe. Dundeeje pe'aama, ammaa min ɗisan leɗɗe cemmbiɗɗe haa nokkuuje maaje.”

¹⁰Ammaa Jawmiraawo jaalini konne'en Recin dow maɓɓe, o ummini konne'en maɓɓe,

¹¹Siriya'en diga fuunaaŋge e Filisti'en diga hiirnaaŋge. Ɓe moɗan Isra'iila bee hunnduko makko. Bee non fuu, tikkere Jawmiraawo feewtaay, juŋngo maako ɗon forti tawon.

¹²Ammaa yimɓe ummaatoore lortaaki haa piyɗo ɓe, ɓe ngartanaay Jawmiraawo honooɓe asama.

¹³Ngam man nder nyalaade woore, Jawmiraawo ta'an nder Isra'iila hoore e wicco, lisal dibinoohi e kewal[12].

¹⁴Ndottiijo e tedduɗo, kamɓe ngoni hoore. Annabiijo ekkitinanɗo fewre, kaŋko woni wicco.

¹⁵Ɗowooɓe ummaatoore nde'e ɗon majjina nde, ɗowaaɓe maare boo ɗon cakli.

¹⁶Ngam man Jawmiraawo seyortaako derke'en maɓɓe, o yurmintaa atiime'en maɓɓe e rewɓe maɓɓe yurumɓe. Ngam ɓe fuu ɓe halluɓe, naafiki'en. Kunnduɗe fuu ɗon mbolwa faataare. Bee non fuu, tikkere Jawmiraawo feewtaay, juŋngo maako ɗon forti tawon.

¹⁷Halleende wulan bana yiite wulanŋge gi'e e giŋngille, nge jamnan laynde sukkunde, haa nge ummina cuurɗe bana daŋraŋgal.

¹⁸Tikkere Jawmiraawo honooɓe asama wuli lesdi, ummaatoore laati bana nyaamdu yiite, walaa enɗuɗo deerɗum.

¹⁹Ɓe ɗon ceela kusel haa nyaamo, ammaa dolo ɗon. Ɓe ɗon nyaama ngel haa nano, ammaa ɓe kaarataa. Koo moy ɗon nyaama kusel keeddiɗɗum:

²⁰Manassa ɗon nyaama Efrayim, Efrayim boo ɗon nyaama Manassa, ɓe ɗiɗo fuu ɓe kawti dow Yahuuda. Bee non fuu, tikkere Jawmiraawo feewtaay, juŋngo maako ɗon forti tawon.