Read Fulfulded Farillaaji Lewi'en 10 Bible Online

Farillaaji Lewi'en 10 - Fulfulded bible

Farillaaji Lewi'en 10

¹Nadab e Abihu, ɓiɓɓe Haruna, koo'i pehe uurorɗe, mbaɗi ƴulɓe yiite dow maaje, mbaɗi uurle, lii'ani ɗum Jawmiraawo. Ammaa yiite man laataaki seniiŋge, ngam Jawmiraawo umraay ɓe lii'aago ɗum.

²Law Jawmiraawo jippini yiite, nge mbari ɓe ton yeeso Jawmiraawo.

³Muusa wi'i Haruna: “Kanjum woni ko Jawmiraawo wi'i saa'i o wi'no: Sey ɓaditittooɓe yam anndita senaare am, ɓe teddinammi yeeso ummaatoore am fuu.” Haruna jeeɗi siriw.

⁴Muusa ewni Miisayel e Elicafan ɓiɓɓe Uzziyel bappaanyo Haruna, wi'i ɓe: “Ngare, cottine maayɓe mon yeeso suudu seniindu, njahre ɓe yaasi saŋngeere.”

⁵Ɓe ngari, ɓe eftiri ɓe bee toggooje maɓɓe, ɓe njahri ɓe yaasi saŋngeere, bana Muusa umri ɓe.

⁶Nden Muusa wi'i Haruna e ɓiɓɓe mum Eli'azaaru e Itamar: “Taa njoofe gaasa ko'e mon, taa ceeke limce mon boo, ngam taa maayon, taa Jawmiraawo tikkana jama'aare fuu. Ammaa banndiraaɓe mon, Isra'iila'en fuu mboya ngam daliila yiite nge Jawmiraawo neli ɗum.

⁷Taa cotte haa dammugal laymaaru fottirde, ngam taa maayon, ngam nebbam Jawmiraawo cenirɗam ɗon dow ko'e mon.” Ɓe mbaɗi ko Muusa wi'i ɓe.

⁸Jawmiraawo wi'i Haruna:

⁹“An e ɓiɓɓe ma, taa on nasta laymaaru fottirde to on njari inaboojam malla nguykinoojam feere, ngam taa maayon. Kanjum woni farilla nduumiika haa danygol mon fuu.

¹⁰Sey on cenndindira ceniiɗum bee ko senaaki, on cenndindira coɓɗum bee laaɓɗum.

¹¹Sey on ekkitina Isra'iila'en farillaaji fuu ɗi umrumi on bee hunnduko Muusa.”

¹²Muusa wi'i Haruna e ɓiɓɓe mum luttuɓe, Eli'azaaru e Itamar: “Koo'e ko lutti haa dokkal nyaamdu ngam Jawmiraawo, mbaɗe tamseeje ɗe ufnaaka bee man. Nyaame ɗe baŋnge hirsirde, ngam dokkal nga'al ngal ceniiŋgal masin.

¹³Nyaame ɗum haa nokkuure seniinde. Kanjum woni geɗal ma e geɗal ɓiɓɓe ma haa dokke guleteeɗe ngam Jawmiraawo. Bana non Jawmiraawo umri yam.

¹⁴Onon e ɓiɓɓe mon worɓe e rewɓe nyaama biiwol ɓaŋgtaaŋgol e daŋngo ittaaŋgo. Kanjum woni geɗal mon e ɓiɓɓe mooɗon haa kirseteeɗi ngam kawtal Isra'iila'en bee Allah. On nyaama ɗum haa nokkuure laaɓnde.

¹⁵Koo ndey Isra'iila'en ngaddata ɓellere wuleteende ngam Jawmiraawo, ɓe ngadda boo biiwol ɓaŋgteteeŋgol e daŋngo itteteeŋgo ngam maako. To dokkal nga'al ɓaŋgtaama yeeso Jawmiraawo, ngal laatanto on e danygol mon haa foroy, bana Jawmiraawo umri ɗum.”

¹⁶Muusa ɗaɓɓiti njawdiri kirsaandi ngam ittuki hakke, ammaa o tawi ɓe nguli ndi, timmi. Ngam maajum o tikkani Eli'azaaru e Itamar ɓiɓɓe Haruna luttuɓe. O ƴami ɓe:

¹⁷“Koni on nyaamaay kirsaaŋga ngam ittuki hakke nga'a haa nokkuure seniinde? Nga ɓurŋga senaago. Jawmiraawo hokki on nga ngam roondaago aybeeji jama'aare e yaafaago hakkeeji maare yeeso Jawmiraawo.

¹⁸Ɓe ngaddaay ƴiiƴam maaga nder suudu seniindu. Ngam maajum haani on nyaama nga haa nokkuure seniinde, bana umrumi on.”

¹⁹Haruna jaabi: “A anndi ɓe lii'ani Jawmiraawo hannde kirsaaŋga maɓɓe ngam ittuki hakkeeji e ngulaaŋga maɓɓe. Nden bone ɗe'e keɓi yam. To mi nyaami hannde kusel kirsaaŋga ngam ittuki hakke, ɗum fottanan Jawmiraawo na?”

²⁰Muusa nani, yerdi ɗum.