Read Fulfulded Farillaaji Lewi'en 20 Bible Online

Farillaaji Lewi'en 20 - Fulfulded bible

Farillaaji Lewi'en 20

¹Jawmiraawo umri Muusa,

²o wi'a Isra'iila'en ni'i: “Koo moy Isra'iilaajo malla jananno nder Isra'iila dokkuɗo gootel haa ɓikkoy mum ngam lawru Molek, sey ummaatoore fiɗa mo bee kaa'e haa o maaya.

³Mi honan goɗɗo man, mi nattinan mo caka lenyol maako, ngam o hokki Molek gootel haa ɓikkoy maako. Bana non o soɓniri suudu am seniindu, o yawake innde am seniinde boo.

⁴Ammaa to yimɓe ummaatoore paalaaka ko o waɗi, to ɓe mbaraay mo,

⁵nden kam min bee hoore am mi honan mo, kaŋko e saare maako e hawtanɓe mo fuu, ɗakkotiranɓe bee Molek. Mi nattinan ɓe caka jama'aare maɓɓe.

⁶To goɗɗo yehi ƴamugo sarwotooɓe maayɓe e hiila'en, ngam ɗakkotirgo bee maɓɓe, mi honan mo, mi nattinan mo caka ummaatoore maako.

⁷Cene ko'e mon, laate on seniiɓe, ngam min woni Jawmiraawo Allah mon.

⁸Ɗowtane umrooje am, ngam min woni Jawmiraawo cenoowo on.

⁹Koo moy huɗi baaba mum malla daada mum, o mbareteeɗo fakat, aybe man laatoto dow hoore maako.

¹⁰To goɗɗo waɗi njeenu bee debbo keeddiɗɗum, nden kam kaŋko e debbo ɓe mbareteeɓe ngam ɓe njeenooɓe.

¹¹To goɗɗo waaldi bee debbo baaba mum, toski baaba mum bana non, kaŋko e debbo ɓe mbareteeɓe, aybe man laatoto dow ko'e maɓɓe.

¹²To goɗɗo waaldi bee debbo ɓiyum, ɓe ɗiɗo fuu ɓe mbareteeɓe. Ɓe mbaɗi nyidduɗum, aybe maayde maɓɓe laatoto dow ko'e maɓɓe.

¹³To goɗɗo waaldi bee gorko bana muuɗum, ɓe mbaɗi nyidduɗum, ɓe ɗiɗo fuu ɓe mbareteeɓe. Aybe maayde maɓɓe laatoto dow ko'e maɓɓe.

¹⁴To goɗɗo te'i daada bee ɓiyum debbo, ɓe mbaɗi nyidduɗum, ɓe tato fuu ɓe wuleteeɓe bee yiite, ngam taa nyidduɗum ɗu'um lutta caka mooɗon.

¹⁵To goɗɗo waaldi bee ndabbaawa, sey on mbara mo e ndabbaawa man fuu.

¹⁶Non boo to debbo ɓaditi ndabbaawa ngam waaldugo bee maaga, sey on mbara mo, kaŋko e ndabbaawa fuu. Aybe maayde goɗɗo oo laatoto dow hoore maako non boo ndabbaawa.

¹⁷To goɗɗo te'i deerɗum debbo, ɓii baaba mum malla ɓii daada mum, waaldi bee maako, ɓe mbaɗi nyidduɗum. Ɓe wurtinteeɓe gite yimɓe ummaatoore maɓɓe. Doole gorko oo roondo aybe mum[14].

¹⁸To goɗɗo hawti bee debbo kayloowo, to o yi'i temmbuki maako e to debbo boo laari ilol ƴiiƴam mum, ɓe ɗiɗo fuu ɓe wurtinteeɓe diga jama'aare maɓɓe.

¹⁹To goɗɗo waaldi bee goggo mum malla yaapendo mum, o toski banndiiko ɓadiiɗo. Ɓe ɗiɗo fuu ɓe hiiteteeɓe ngam aybe maɓɓe.

²⁰To goɗɗo waaldi bee debbo bappa mum, o toski bappa maako. Ɓe hiiteteeɓe ngam hakke maɓɓe. Ɓe keɓataa ɓikkoy haa ɓe maaya.

²¹To goɗɗo hoo'i debbo deerɗum, ɓe mbaɗi coɓɗum, o toski deerɗiiko. Kaŋko e debbo keɓataa ɓikkoy haa ɓe maaya.”

²²Jawmiraawo ɓesdi wi'ugo: “Ɗowtane umrooje am e kiitaaji am fuu, ngam taa lesdi ndi njahranmi on haa muuɗum, tuuta on.

²³Taa tokke umrooje ummaatooje ɗe ndiiwanmi yeeso mooɗon. Kamɓe ɓe mbaɗi kuuje ɗe'e, ɓe laatani yam nyidduɓe.

²⁴Mi wi'i on: Onon on maran lesdi keewndi kosam e njumri, mi marnan on ndi. Min woni Jawmiraawo Allah mon, mi senndi on bee ummaatooje goɗɗe.

²⁵Sey on cenndindira dabbaaji dagiiɗi bee karminaaɗi, on cenndindira colli dagiiɗi bee karminaaɗi boo. Taa nyaame dabbaaji e colli e ladooji karminaaɗi, ngam taa on coɓna ko'e mon.

²⁶Laate on seniiɓe ngam am, ngam min Jawmiraawo mi ceniiɗo. Mi senndi on bee ummaatooje goɗɗe ngam mi mara on min feere am.

²⁷Koo moy gorko malla debbo carwotooɗo maayɓe malla hiilaajo, sey on piɗa mo bee kaa'e haa o maaya. Aybe maayde maako laatoto dow hoore maako.”