Read Fulfulded Farillaaji Lewi'en 22 Bible Online

Farillaaji Lewi'en 22 - Fulfulded bible

Farillaaji Lewi'en 22

¹Jawmiraawo umri Muusa,

²o wi'a Haruna e ɓiɓɓe mum ni'i: “Kakkilane dokke Isra'iila'en cenaaɗe, ngam taa ɓe coɓna innde am seniinde. Min woni Jawmiraawo.

³To goɗɗo mon malla goɗɗo danygol mon ɓaditake dokke ɗe Isra'iila'en ceni ngam am, saa'i o coɓɗo, nden kam o gudinteeɗo, o wonataa yeeso am. Kanjum woni umroore haa foroy. Min woni Jawmiraawo.

⁴To goɗɗo danygol Haruna woodi saɗawre koo ndeyeere malla nyawu ilnoowu, taa o nyaama dokke ceniiɗe, sey to o laaɓi fahin. Koo moy limanjo meemɗo huunde soɓnde ngam daliila maayɗo malla koyɗitiiɗo

⁵malla meemɗo ladoojum coɓɗum koo neɗɗo coɓɗo boo, kaŋko boo o soɓi.

⁶Limanjo laatiiɗo coɓɗo bana non, o nyallan o coɓɗo. Koo ɓaawoɗon boo taa o nyaama dokke ceniiɗe, sonaa to o yiiwake.

⁷Ɓaawo mutki naaŋge o laaɓɗo, o nyaaman dokke ceniiɗe man, ngam ɗe nyaamdu maako.

⁸Taa o nyaama kusel ndabbaawa mbaatŋga malla nga huunde ladde faɗɗi ɗum, ngam taa o soɓa. Min woni Jawmiraawo.

⁹Sey liman'en fuu kakkilana njaggu am. To naa non, ɓe laatoto aybuɓe, ɓe mbareteeɓe, ngam ɓe coɓni umrooje am. Min woni Jawmiraawo cenoowo ɓe.

¹⁰Goɗɗo mo laataaki limanjo, nyaamataa dokke ceniiɗe, koo to o koɗo malla kuuwanoowo mo boo.

¹¹Ammaa jeyaaɗo mo limanjo soodi ɗum bee ceede malla danyaaɗo nder saare limanjo, nyaaman nyaamdu limanjo.

¹²To ɓii limanjo debbo te'aama haa goɗɗo mo laataaki danygol limanjo, o nyaamataa dokke ceniiɗe ittaaɗe ngam liman'en.

¹³Ammaa to goriiko maayi malla seeri mo, to o walaa ɓikkoy, to o warti haa saare baaba maako bana naane nde o paanyono, nden kam o nyaaman nyaamdu baaba maako. Ammaa goɗɗo mo laataaki limanjo, taa o nyaama kuuje ɗe'e.

¹⁴To goɗɗo mo laataaki limanjo nyaami dokke ceniiɗe bilaa anniya, sey o hokkita limanjo fodde ko o nyaami, o ɓesda dow maajum yeɓre woore nder geɓe jowi boo.

¹⁵Taa liman'en coɓna dokke ceniiɗe ɗe Isra'iila'en ngaddanta yam.

¹⁶To ɓe acci goɗɗo feere nyaami ɗe, ɓe nastini mo nder aybewol maŋngol. Min woni Jawmiraawo cenoowo dokke ɗe'e.”

¹⁷Jawmiraawo umri Muusa,

¹⁸o wi'a Haruna e ɓiɓɓe mum e Isra'iila'en ni'i: “To Isra'iilaajo malla jananno jooɗiiɗo nder Isra'iila yiɗi lii'anaago yam nguleteeŋga, ngam o hebbina togayeere malla ngam ɓernde maako numi ɗum, sey ɗum laato ndabbaawa nga walaa aybe,

¹⁹ɗum laato gorɗum ɗum walaa aybe, haa na'i e baali e be'i, haa mi yerdo ɗum.

²⁰Taa on lii'ano yam ndabbaawa marŋga aybewol koo ngole, mi yerdataako nga.

²¹To goɗɗo yiɗi lii'anaago yam kirseteeŋga ngam kawtal yimɓe bee Allah, ngam o hebbina togayeere malla ngam ɓernde maako numi ɗum, sey ɗum laato ndabbaawa nga walaa aybe, haa mi yerdo nga.

²²Taa on lii'ano yam mbumŋga malla mboosŋga malla ngewŋga malla marŋga huuduure ilnannde mbordi malla waayre malla fuufre. Taa lii'aneeɗam irin ndabbaawa nga'a nguleteeŋga dow hirsirde boo.

²³Ngaari malla ndammoowa to tergal mum gootal juuti malla rammi, on lii'oto nga bana dokkal caahiiŋgal. Ammaa mi yerdataako nga ngam kebbinki togayeere.

²⁴Taa on lii'ano yam ndabbaawa nga gorɗe mum ɓiɗɗa malla tappa malla seeka malla ta'a. Mi duŋanaaki on lii'aago irin maaga nder lesdi mon.

²⁵Taa on lii'ano yam irin ndabbaawa man nga keɓɗon haa goɗɗo jananno. Irin dabbaaji ɗi'i, mi ɗon laara ɗi bana ɗi jiijiiɗi, mi yerdataako ɗi.”

²⁶Jawmiraawo ɓesdi wi'ugo Muusa:

²⁷“To gaggel malla baalel malla be'el rimaama, ngel wonda bee daada maagel nyalɗe joweeɗiɗi. Ɓaawo man mi yerdoto ngel bana guleteeŋgel.

²⁸Taa kirse nagge e ɓiyiige malla ndammoowa e ɓiyiiga nder nyalaade woore.

²⁹To on ngiɗi lii'anaago yam kirseteeŋga ngam daliila yettoore, mbaɗe ɗum fodde umroore am, haa nga heɓana on yerduye am.

³⁰Nyaame nga nyalaade man, taa acce koo ɗume haa jaŋngo man. Min woni Jawmiraawo.

³¹Kakkilane umrooje am, ɗowtane ɗe, ngam min woni Jawmiraawo.

³²Taa coɓne innde am seniinde, ngam haa senaare am waŋga caka Isra'iila'en. Min woni Jawmiraawo cenoowo on.

³³Mi wurtini on lesdi Misra ngam mi laato Allah mon. Min woni Jawmiraawo.”