Read Fulfulded Farillaaji Lewi'en 25 Bible Online

Farillaaji Lewi'en 25 - Fulfulded bible

Farillaaji Lewi'en 25

¹Jawmiraawo umri Muusa dow hooseere Sina,

²o wi'a Isra'iila'en ni'i: “To on nasti lesdi ndi Jawmiraawo tammi hokkugo on, nden kam lesdi boo heɓa siwtaare.

³Sey on aawa gese mon, on calta inabooje mon, on mooɓta ko lesdi fuɗnanta on duuɓi joweego.

⁴Ammaa hitaande joweeɗiɗawre, ɗum siwtorde ngam lesdi. Hitaande man Jawmiraawo jeyi. Taa on aawa gese mon, taa on calta inabooje mon.

⁵Taa on mooɓta alkamaari gariiri[15], taa on teɓa ɓiɓɓe inabooje mon boo. Ɗum hitaande siwtorde ngam lesdi.

⁶Saa'i lesdi ɗon siwto, ndi fuɗnanan on nyaamdu, onon bee maccuɓe mon e horɓe mon e huuwooɓe mon e jananɓe wonduɓe bee mooɗon,

⁷non boo ngam dabbaaji mon e kuuje ladde nder lesdi mon.”

⁸“Lime duuɓi joweeɗiɗi nde joweeɗiɗi, waato duuɓi cappanɗe nayi e joweenayi.

⁹Nyannde sappoore nder lewru joweeɗiɗaɓru, waato nyalaade ittuki hakkeeji, sey on umra fuufugo luwal nder lesdi mon fuu.

¹⁰Cene hitaande cappanɗe jowaɓre nde'e, ngooyne dimɗinki ngam yimɓe lesdi fuu. Nde laatano on hitaande dimɗineeki. Koo moy soorri maral mum, heɓtan ngal. Mo laati maccuɗo malla korɗo boo, wartan haa lenyol mum.

¹¹Hitaande cappanɗe jowaɓre nde'e laatano on hitaande dimɗineeki. Taa on aawa gese mon, taa on mooɓta alkamaari gariiri, taa on teɓa ɓiɓɓe inabooje mon boo.

¹²Hitaande man fuu laatano on hitaande dimɗineeki, on nyaama ko fuɗata haa gese tan.

¹³Nder hitaande dimɗineeki nde'e, koo moy mon heɓtan maral mum.

¹⁴Ngam man, to a soorri Isra'iilaajo ngesa malla to a soodi ngesa haa maako, taa mbaɗindire rikici.

¹⁵To on ɗon ta'a saman maaka, lime duuɓi caaliiɗi ɓaawo hitaande dimɗineeki e duuɓi dimanɗi nyaamdu luttuɗi haa hitaande man yaalto.

¹⁶To limgal duuɓi man ɗuuɗi, saman ngesa ɓesdoto, to ngal famɗi, saman maaka ustoto, ngam on coodan limgal duuɓi dimanɗi nyaamdu.

¹⁷Taa goɗɗo waɗa keeddiɗɗum rikici. Kule Allah mooɗon, ngam min woni Jawmiraawo, Allah mooɗon.”

¹⁸“Ɗowtane farillaaji e kiitaaji Jawmiraawo fuu, ngam haa on njooɗo jam nder lesdi mon.

¹⁹Lesdi riman ƴaamle ngam on nyaama, on kaara, on njooɗo ton bee hoolaare.

²⁰Teema goɗɗo ƴaman: Ɗume en nyaamata nder hitaande joweeɗiɗawre? Ndaa, en aawataa, en mooɓtataa ƴaamle gese.

²¹Nane kadi, Jawmiraawo barkiɗinan lesdi nder hitaande joweego'oore, haa ndi rima nyaamdu he'anndu deydey duuɓi tati.

²²To on aawi nder hitaande joweetataɓre, on tokkoto nyaamugo ko keɓɗon nder hitaande joweego'oore. Nyaamdu he'an haa hitaande joweenayaɓre fuɗɗa.”

²³“On potaay soorrugo lesdi taynde, ngam Jawmiraawo mari ndi, onon boo on hoɗɓe, on jananɓe haa maako.

²⁴To on coorri gese, marnooɗo ɗe, to yiɗi soottan ɗe.

²⁵To Isra'iilaajo talkiɗi, soorri gese mum, sey banndiiko ɓurɗo ɓadaago sootta ɗe.

²⁶To o walaa coottoowo, teema o heɓan ceede soottugo ɗe fahin bee hoore maako.

²⁷Nden kam o yoɓa coodnooɗo gese man fodde duuɓi luttanɗi haa hitaande dimɗineeki yaalta. Bana non o heɓtirta gese maako.

²⁸Ammaa to o heɓaay ceede soottugo ɗe, nden kam coodnooɗo gese naftorto ɗe haa hitaande dimɗineeki yaalta. Hitaande nde'e o hokkita ɗe marnooɗo ɗe meere.

²⁹To goɗɗo soorri suudu nder berniwol, to o yiɗi o soottan ndu nder hitaande coggu man. Wakkati coottuki man neeɓan hitaande woore.

³⁰Ammaa to o soottaay ndu hitaande man, nden kam o heɓataa soottugo ndu haa foroy, ndu laatoto maral coodnooɗo ndu e danygol mum. Ndu soottataake koo nder hitaande dimɗineeki boo.

³¹Ammaa nder gure ɗe ngalaa mahol taariiŋgol ɗum, sey on nanndina cuuɗi bee gese. Marnooɗo suudu to yiɗi, soottan ndu. To o soottaay, o heɓtan ndu nder hitaande dimɗineeki.

³²Bee non fuu, Lewi'en to ngiɗi, coottan cuuɗi muuɗum'en nder berniiji Lewi'en koo ndeye.

³³To goɗɗo Lewiijo soorri suudu mum nder berniwol, waawaay soottugo ndu, nden kam o heɓtan ndu nder hitaande dimɗineeki. Ngam cuuɗi Lewi'en nder berniiji laati maral maɓɓe caka Isra'iila'en haa foroy.

³⁴Ammaa durduɗe taariiɗe berniiji Lewi'en coorrataake sam, ɗe laati maral maɓɓe haa foroy.”

³⁵“To Isra'iilaajo jooɗiiɗo baŋnge maaɗa talkiɗi, waawataa wuurnugo hoore mum, sey a wallita ɗum bana mballirta koɗo malla jananno, ngam o tokko jooɗaago baŋnge maaɗa.

³⁶Taa hokkir mo nyamaande bee ndiyam, taa ɗaɓɓu riba haa maako. Ammaa hul Allah, accu keeddiɗɗa jooɗo baŋnge maaɗa.

³⁷To a hokki mo nyamaande, taa yowan mo ndiyam. Taa soorru mo nyaamdu ngam heɓugo riba boo.

³⁸Kanjum woni umroore Jawmiraawo Allah mon mo wurtini on lesdi Misra, ngam o hokka on lesdi Kanaana, o laato Allah mon boo.”

³⁹“To Isra'iilaajo jooɗiiɗo baŋnge maaɗa talkiɗi, soorri ma hoore mum, nden kam taa huuwnu mo bana maccuɗo.

⁴⁰O wonda bee maaɗa bana kuuwanoowo ngeenaari malla jananno, o huuwane haa hitaande dimɗineeki yaalta.

⁴¹Saa'i man o rimɗan, kaŋko e ɓikkoy maako, o loro haa lenyol maako e maral kaakiraaɓe maako.

⁴²Ngam Isra'iila'en ɓe jeyaaɓe Jawmiraawo, kaŋko o wurtini ɓe lesdi Misra. Ngam man taa goɗɗo soorra ɓe bana ɓe coorrirta maccuɓe.

⁴³Taa kolle ɓe ɓural, kule Allah mon.

⁴⁴To on ngoodi haaje maccuɓe e horɓe, coode ɓe haa ummaatooje taariiɗe on.

⁴⁵On coodan ɓiɓɓe jananɓe jooɗiiɓe caka mooɗon boo. Irin maɓɓe, danyaaɓe nder lesdi mon, on maran ɓe.

⁴⁶On ndonnan ɓiɓɓe mon jeyaaɓe ɓe'e, ɓe laatoto maccuɓe mon haa foroy. Ammaa taa on kolla Isra'iilaajo ɓural.

⁴⁷To goɗɗo jananno jooɗiiɗo baŋnge maaɗa malla koɗo riski, ammaa keeddiɗɗa Isra'iilaajo talkiɗi, soorri hoore mum haa koɗo malla haa jananno jooɗiiɗo baŋnge maaɗa malla haa goɗɗo danygol jananno,

⁴⁸nden kam soottugo mo heɓoto. Sey gooto caka deerɗiiko'en sootta mo

⁴⁹malla bappa maako malla ɓii bappa maako malla banndiiko goɗɗo sootta mo. Malla o sootta hoore maako, to o waawi.

⁵⁰Nden kam o narra bee coodnooɗo mo. Ɓe lima duuɓi diga wakkati coggu haa hitaande dimɗineeki yaalta, ɓe mbaɗa coottaari fodde limgal duuɓi e fodde ngeenaari kuuwoowo.

⁵¹Sey o yoɓa mo geɗal saman coggu fodde limgal duuɓi luttanɗi haa hitaande dimɗineeki yaalta, koo duuɓi ɗuuɗɗi, koo ɗi ɗuuɗaay boo,

⁵²

⁵³bana to o laatino kuuwanoowo ngeenaari hitaande hitaande. Taa jawmiiko holla mo ɓural.

⁵⁴To o heɓtaay ndimu bee laawol coottuki koo ngole, nden kam o rimɗan nder hitaande dimɗineeki, kaŋko e ɓikkoy maako fuu.

⁵⁵Ɗowtane umrooje ɗe'e, ngam Isra'iila'en ɓe jeyaaɓe Jawmiraawo, kaŋko o wurtini ɓe lesdi Misra, kaŋko woni Jawmiraawo Allah maɓɓe.”