Read Fulfulded Yeremiya 13 Bible Online

Yeremiya 13 - Fulfulded bible

Yeremiya 13

¹Jawmiraawo wi'i yam: “Yah, soodu taadorgol leŋ, taada ngol dow keeci ma, ammaa taa ndiyam meema ngol.”

²Mi soodi taadorgol man bana Jawmiraawo umruno yam, mi taadi ngol.

³Jawmiraawo wolwani yam ɗiɗawre, o wi'i:

⁴“Yah haa maayo Efratis. Hoo'u taadorgol ngol cooduɗa, ngol taadiiɗa, yah nyukkinoy ngol nder ceekgol tapaare.”

⁵Mi yehi, mi nyukkinoy ngol baŋnge Efratis, bana Jawmiraawo umruno yam.

⁶Ɓaawo nyalɗe ɗuuɗɗe Jawmiraawo wi'i yam: “Lorta haa Efratis, hoocoy taadorgol ngol mi umruno ma nyukkinoygo ton.”

⁷Mi lorti ton, mi ɗaɓɓiti nyukkorde taadorgol, mi hoo'i ngol. Ammaa ndaa, ngol wonnake, ngol nafataa sam.

⁸Nden Jawmiraawo wolwani yam fahin, wi'i:

⁹“Bana non kalkiranmi mawnitaare Yahuuda e mawnitaare Urusaliima ɗuuɗnde.

¹⁰Yimɓe ummaatoore hallunde nde'e cali nanango yam, ɓe ɗon mbaɗa ko ɓerɗe maɓɓe caatuɗe ngiɗi, ɓe ɗon cujidana ɗowanteeɓe woɗɓe, ɓe ɗon ɗowtano ɓe. Ɓe laatoto bana taadorgol ngo'ol ngol nafataa sam!

¹¹Bana no goɗɗo taadori keeci mum bee taadorgol, non taadoriimi yimɓe Isra'iila e Yahuuda fuu haa am, haa ɓe laato ummaatoore am, ɓe mbaŋgina maŋngu, ɓe maŋgta innde am, ɓe teddina nde, ammaa ɓe nanaay.”

¹²“Yeccu yimɓe ɓe'e: Ndaa nii Jawmiraawo, Allah Isra'iila wi'i: Sey bulki fuu keewa bee njaram. Ɓe mbi'ete: Moy anndaa bulki ɗon ngam heewugo bee njaram?

¹³Nden yeccu ɓe: Jawmiraawo wi'i: Mi yarnan yimɓe lesdi ndi'i njaram haa ɓe nguyka, laamiiɓe jooɗiiɓe dow leeso laamu Daawuda e liman'en e annabi'en e jooɗiiɓe nder Urusaliima fuu.

¹⁴Mi sampitan ɓe, oo dow oya, baabiraaɓe e ɓikkoy fuu. Mi enɗataa koo moy, mi yurmintaa koo moy, mi hinnataako koo moy. Walaa ko haɗatammi halkugo ɓe, non Jawmiraawo wi'i.”

¹⁵Jawmiraawo wi'i: Nane, keɗite! Taa mawnite!

¹⁶Teddine Jawmiraawo, Allah mooɗon hiddeko o waɗa nyiɓre, hiddeko kosɗe mooɗon pergo dow kooseeje ngam nyiɓɓuki. On ɗon ndeeni jayŋgol, ammaa o laatinan ngol nyiɓre, nyiɓre ɓaleere kurum.

¹⁷To on nanaay, mi woyan nder cuuɗiiɗum ngam mawnitaare mooɗon. Mi woyan ɗuuɗɗum, gite am ndufan gonɗi ngam tokkere Jawmiraawo daheteende.

¹⁸Jawmiraawo wi'i yam: “Yeccu laamiiɗo e daada mum ɓe njippo leeso laamu, ngam meetaleeji tedduŋgal maɓɓe yani diga dow ko'e maɓɓe.

¹⁹Konne'en maɓɓi gure nder Lesdi Fombina, walaa maɓɓitanɗo ɗe. Yimɓe Yahuuda fuu ndahaama.

²⁰Ɓaŋgtu gite, laar, an Urusaliima! Konne'en ɗon ngara diga woyla. Toy yimɓe halfitinaaɓe haa juuɗe maaɗa? Toy yimɓe ma ɓe mantortooɗa?

²¹A woowi bee jananɓe bana sooba'en maaɗa. Ɗume mbi'ata to Jawmiraawo laamini ɓe dow maaɗa? Saa'i man luuwe naŋngete bana ɗe debbo ɓesnanɗo.

²²To a ƴami ngam ɗume irin ɗu'um laatani ma, ngam ɗume ɓe ɓaŋgti gawarle limce maaɗa, ɓe toskini ma, anndu: Ngam ɗuuɗeeŋga aybeeji maaɗa.

²³Etiyopiyaajo waawan waylugo noonde laral mum na? Paaɗaawu waawan ittugo toɓɓe mum na? To ɗum heɓoto, nden kam onon jooɗiiɓe Urusaliima woowɓe halleende boo on ekkititto waɗugo ko wooɗi.

²⁴Mi saŋkitan on bana henndu ladde wifirta nyaande.

²⁵Kanjum laatoto geɗal maaɗa ngal mi yeɗani ma, ngam a yejjiti yam, a hooli pewe.

²⁶Jawmiraawo bee hoore muuɗum ɓaŋgtan gawarle limce maaɗa, yimɓe ndaaran toskaare maaɗa

²⁷dow towndiije e gese, mi yi'i kuuɗe nyidduɗe ɗe kuuwɗa, non boo njeenu ma e suunooji ma kalluɗi e daakaareeku ma. Kayto, onon yimɓe Urusaliima, on coɓi! Haa ndeye on laaɓata?”