Read Fulfulded Yeremiya 14 Bible Online

Yeremiya 14 - Fulfulded bible

Yeremiya 14

¹Jawmiraawo wolwani Yeremiya haala hokkere, wi'i:

²“Lesdi Yahuuda ɗon nder suno, berniiji maari ɗon mbaata, yimɓe maari ɗon njooɗi, ɗon mboya. Urusaliima ɗon ummina gookaali.

³Mawɓe maɓɓe ɗon nela maccuɓe muuɗum'en nyeɗoygo ndiyam. Ɓe njaha haa gaawi, ammaa ndiyam woodaa. Ɓe ngarta bee bulki cooki, ɓe ɗon cakli, ɓe ɗon cudda ko'e maɓɓe ngam mettamɓeram e toskaare.

⁴Lesdi waɗi ɓoli ngam iyeende woodaa. Ngam maajum remooɓe boo caklake, ɗon cudda ko'e muuɗum'en.

⁵Koo lelwa haa ladde boo rimi, nden acci ɓiyum keccel, ngam huɗo woodaa.

⁶Bamɗe ladde ɗon ndari dow towndiije cooke, ɗon laaha bana cuuli. Gite maaje tampi tefugo huɗo, ammaa ko woodaa.”

⁷Yeremiya wi'i: “Hakkeeji amin ɗon ngullo min, yaa Jawmiraawo, ammaa wallu min ngam daliila innde maaɗa. Nde ɗuuɗɗum, min tuurtani ma, min mbaɗi hakkeeji dow maaɗa!

⁸An woni tammunde Isra'iila e kisnoowo mum diga ɓillaaje. Ngam ɗume laatiiɗa bana jananno nder lesdi, bana jahoowo baalanɗo jemmaare woore tan?

⁹Ngam ɗume laatiiɗa bana cakliiɗo, bana cemmbiɗɗo mo waawataa hisnugo? Fakat a ɗon wondi bee amin, yaa Jawmiraawo, innde maaɗa ɗon ewne caka amin, taa accu min!”

¹⁰Ndaa nii Jawmiraawo wi'i dow yimɓe ummaatoore nde'e: “Ɓe ngiɗi gaance jamum, ɓe naŋgtaay kosɗe maɓɓe. Ngam maajum mi seyortaako ɓe. Mi siftoran zunuubaaji maɓɓe, mi hiitoto hakkeeji maɓɓe.”

¹¹Jawmiraawo wi'i yam: “Taa do'ana yimɓe ummaatoore nde'e hayru.

¹²Koo to ɓe cuumake, mi nanataa bojji maɓɓe. Koo to ɓe lii'anake yam kirsaaɗi e dokke nyaamdu, mi yerdataako ɓe. Ammaa mi halkan ɓe bee konu e weelo e nyawu kalluŋgu ndaaɓoowu.”

¹³Mi wi'i: “Yaa Jawmiraawo Allah, a anndi annabi'en ɗon ngecca ɓe: On ngi'ataa konu, weelo naŋngataa on, ammaa Jawmiraawo hokkan on jam timmuɗam haa nokkuure nde'e.”

¹⁴Jawmiraawo jaabi yam: “Annabi'en ɗon ngaazo fewre bee innde am. Min mi nelaay ɓe, mi umraay ɓe koo ɗume, mi wolwanaay ɓe. Ko ɓe ngaazoto on, ɗum wahayuuji pewooji e hatti e dewki labbi e fewjere ɓerɗe maɓɓe non.

¹⁵Min Jawmiraawo mi ɗon wi'a ko mbaɗanmi annabi'en waazotooɓe bee innde am koo to mi nelaay ɓe, wi'anɓe konu malla weelo waɗataa nder lesdi: Mi halkan annabi'en ɓe'e bee konu e weelo.

¹⁶Yimɓe nanɓe annabaaku maɓɓe, kamɓe boo ɓe maayran bee konu e weelo, ɓe ngudinan ɓalli maɓɓe haa laabi Urusaliima, walaa uwanɗo ɓe. Non ɗum laatanto ɓe fuu, rewɓe maɓɓe e ɓikkoy maɓɓe ngorkoy e ndehoy. Mi lornan halleende maɓɓe dow ko'e maɓɓe.

¹⁷Yeccu ɓe wolde nde'e: Jemma e naaŋge gite am accataa rufugo gonɗi, ngam ummaatoore am nde ngiɗmi ɗum fiyaama piyol naawŋgol.

¹⁸To mi wurtake haa ngesa, mi yi'an mbaraaɓe bee kaafahi. To mi nasti berniwol, ndaa maayanɓe bee weelo. Koo annabi'en e liman'en boo ɗon ngiilo nder lesdi, ɓe anndaa ko ɓe mbaɗata!”

¹⁹Yeremiya wi'i: “Yaa Jawmiraawo, a wudini Yahuuda cuy na? A ganyɗo Siyona na? Ngam ɗume piyɗa min naawɗum bana nii haa min mbaawataa nyawndeego? Min ngeli jam, ammaa booɗɗum woodaa. Min tammo min nyawndoto, ammaa ndaa, sey kultoreeŋgol.

²⁰Yaa Jawmiraawo, min anndi halleende amin e aybe kaakiraaɓe amin, min mbaɗi hakke dow maaɗa.

²¹Ammaa ngam daliila innde maaɗa, taa wudin min, taa yawnu Urusaliima, jooɗorde tedduŋgal maaɗa. Siftor alkawal maaɗa bee amin, taa fiistu ngal!

²²Walaa lawru haa ummaatooje waawata toɓnugo iyeende, asama boo waawataa toɓnugo waabiliire. Tammunde hayru amin ɗon haa maaɗa, yaa Jawmiraawo Allah amin, ngam an waɗata kuuje ɗe'e fuu!”