Read Fulfulded Yeremiya 15 Bible Online

Yeremiya 15 - Fulfulded bible

Yeremiya 15

¹Nden Jawmiraawo wi'i yam: “Koo to Muusa e Samuyila ndarake yeeso am, torake yam, mi enɗataako yimɓe ummaatoore nde'e. Riiw ɓe yeeso am, ɓe ndilla!

²To ɓe ƴami ma: Toy min ndillata? Jaaba ɓe: Ndaa nii Jawmiraawo wi'i: Mo hoddirana maayrugo bee kaafahi, haa kaafahi o dillata. Mo hoddirana maayrugo bee weelo, haa weelo o dillata. Mo hoddirana daheeki[13] bee kaɓɓorli, haa kaɓɓorli o dillata.

³Mi ta'ani ɓe masiibooji nayi: Kaafahi ngam mbarugo ɓe, dawaaɗi ngam seekugo ɓe, colli e dabbaaji ngam nyaamugo ɓe e ngam nattingo ɓe.

⁴Mi laatinan ɓe nyidduɓe haa laamuuji duniyaaru fuu ngam daliila kuuɗe ɗe Manassa ɓii Hezekiya, laamiiɗo Yahuuda waɗi haa Urusaliima.

⁵Onon yimɓe Urusaliima, moy yurminta on? Moy enɗoto on? Moy yaaloto on ngam ƴamugo njamu mooɗon?

⁶Onon on ngudini yam, on ngaylitani yam ɓaawe mooɗon. Ngam maajum portanmi juŋngo am dow mooɗon ngam halkugo on. Mi somi yurmingo on.

⁷Nder gure lesdi fuu njaartumi on. Mi halkan ummaatoore am, mi mbaran ɓikkoy mooɗon, ngam on accaay laabi mooɗon kalluɗi.

⁸Mi ɗuɗɗini rewɓe yurumɓe haa mooɗon ko ɓuri njaareendi haa maayo. Mi neli kalkoowo dow daadiraaɓe honooɓe suka'en, bee juhuki ukkumi kultoreeŋgol maŋngol.

⁹Daada marɗo ɓiɓɓe njoweeɗiɗo faɗɗaama, o maaynaama. Naaŋge maako muti caka nyalawma, o toski, o semti. Luttuɓe mooɗon, mi hokki ɓe haa juuɗe konne'en mooɗon, ɓe mbara on bee kaafahi.” Non Jawmiraawo wi'i.

¹⁰Yeremiya wi'i: “Bone laatanto yam! Koni daada am danyimmi? Min laatiiɗo jokkiroowo e fitinamaajo ngam lesdi fuu! Mi hokkaay nyamaande, mi nyaamaay nyamaande, ammaa koo moy ɗon naalammi.”

¹¹Jawmiraawo wi'i: “Fakat mi hisni ma haa keɓa hayru. Mi huni konne'en ma torete saa'i ɓe ɗon nder ɓillaare e bone.

¹²Walaa gewanɗo njamndi ɓaleeri, sakkomaa iwndi lesdi woyla! Walaa boo gewanɗo njamndi mboɗeeri[14]!

¹³Mi nelan konne'en haa ɓe njaɓta jawdi e ndesaaji yimɓe am, ngam daliila hakkeeji ɗi ɓe mbaɗi koo toy nder lesdi.

¹⁴Mi laatinan ɓe maccuɓe konne'en maɓɓe nder lesdi ndi ɓe anndaa, ngam tikkere am saatunde dow maɓɓe ɗon wula bana yiite.”

¹⁵Yeremiya wi'i: “Yaa Jawmiraawo, a anndi kuuje fuu. Siftoram, yiidam, waata toonyooɓe yam. Taa juttin munyal maaɗa, ngam taa ɓe mbarammi. Anndu, mi ɗon munyana kuudi daliila ma.

¹⁶Mi jaɓi bolle ɗe a wolwani yam. Ɗe laatani ɓernde am seyo e welwelo, ngam an, yaa Jawmiraawo Allah honooɓe asama, innde maaɗa ɗon dow am.

¹⁷Mi meeɗaay jooɗodaago bee jalanɓe haa mi welwita bee maɓɓe. Mi maati juŋngo maaɗa dow am, ngam maajum njooɗiimi feere am, mi keewɗo tikkere.

¹⁸Ngam ɗume naaworla am jinnataa? Ngam ɗume huuduure am nyawndataako? Ngam ɗume nde sali hurgaago? A laatani yam bana maayel ngel hoolataake ngam ndiyam maagel ɓeeɓan!”

¹⁹Ngam maajum Jawmiraawo jaabi yam: “To a lortake, mi jaɓete fahin, a laatoto suka am fahin. To a wolwi nafoojum, naa meereejum, nden kam a laatoto annabiijo am fahin. Yimɓe tokkoto ma, ammaa naa an tokkoto ɓe.

²⁰Heedi yimɓe ɓe'e kam, mi laatinte bana mahol cemmbiɗŋgol ngol njamndi mboɗeeri. Ɓe kaɓan bee maaɗa, ammaa ɓe njaalataako ma. Ngam min mi ɗon wondi bee maaɗa ngam rimɗingo ma e hisnugo ma.

²¹Mi rimɗinte e juuɗe halluɓe e toonyooɓe.” Non Jawmiraawo wi'i.