Read Fulfulded Yeremiya 16 Bible Online

Yeremiya 16 - Fulfulded bible

Yeremiya 16

¹Jawmiraawo wolwani yam, wi'i:

²“Taa ɓaŋgu debbo, taa danyu ɓiɓɓe worɓe malla rewɓe haa nokkuure nde'e.

³Ndaa ko Jawmiraawo wi'i dow ɓikkoy ngorkoy e ndehoy ndanyeteekoy haa ɗo e dow baabiraaɓe e daadiraaɓe maakoy:

⁴Ɓe maayran nyawuji kalluɗi, walaa boyanɗo ɓe koo uwanɗo ɓe. Ɓe mbaaloto haa lesdi bana koonal. Ɓe kalkan bee kaafahi malla bee weelo, ɓalli maɓɓe laatoto nyaamdu colli e kuuje ladde.”

⁵Jawmiraawo wi'i: “Taa nastu saare suniiɓe, koo ngam woyugo koo ngam de'itingo. Mi ittani ummaatoore nde'e salaaman am e mbooɗeeŋga am e enɗam am.

⁶Mawɓe e leesɓe nder lesdi ndi'i maayan, ammaa walaa mo uwata ɓe, walaa mo woyata ɓe. Walaa mo ƴarata ɓanndu mum malla mo laɓata hoore mum ngam maɓɓe[15].

⁷Walaa mo nyaamdata koo yardata bee goɗɗo ngam de'itingo mo to goɗɗo saare maako maayi, koo to baaba maako malla daada maako maayi.

⁸Taa nastu saare haa yimɓe ɗon mbaɗa juulde, taa jooɗoda bee yimɓe ngam nyaamdugo e yardugo bee maɓɓe.

⁹Nan ko mbi'anmi, min Jawmiraawo honooɓe asama, Allah Isra'iila: Mi je'inan hoolo seyo e welwelo, non boo daande ɓaŋɗo e daande ɓaŋaaɗo haa nokkuure nde'e. Ɗum laatoto saa'i on yeeɗɓe, on ngi'an ɗum bee gite mon.

¹⁰To a anndini yimɓe ummaatoore nde'e kuuje ɗe'e fuu, ɓe ƴami ma boo: Ngam ɗume Jawmiraawo ta'ani min sarru naawŋgu bana ngu'u? Ɗume woni aybe amin? Hakkewol ngole min mbaɗi dow Jawmiraawo Allah amin?

¹¹Nden yeccu ɓe: Jawmiraawo wi'i: Kaakiraaɓe mooɗon acci yam, tokki ɗowanteeɓe woɗɓe, njaggani ɓe, cujidani ɓe. Ammaa min, ɓe acci yam, ɓe ɗowtanaaki tawreeta am.

¹²Onon boo on mbaɗi kalluɗum ko ɓuri kaakiraaɓe mooɗon. Koo moy mooɗon ɗon waɗa ko ɓernde mum saatunde, hallunde yiɗi, on nanantaa yam.

¹³Ngam maajum ndiiwanmi on diga lesdi ndi'i haa lesdi ndi on meeɗaay anndugo, koo onon koo kaakiraaɓe mooɗon. Ton njaggantooɗon ɗowanteeɓe woɗɓe jemma e naaŋge fuu, ngam mi hinnataako on.

¹⁴Saa'i ɗon wara nde kunotooɗo wi'ataa: Fakat bana Jawmiraawo mo wurtini yimɓe Isra'iila e lesdi Misra o geeto,

¹⁵ammaa o wi'an: Fakat bana Jawmiraawo mo wartiri yimɓe Isra'iila diga lesdi woyla e lesɗe ɗe o saŋkitino ɓe fuu, o geeto! Ngam mi hooran ɓe haa lesdi maɓɓe ndi ndokkumi kaakiraaɓe maɓɓe.” Non Jawmiraawo wi'i.

¹⁶“Mi nelan waawooɓe ɗuuɗɓe ɓe ngara naŋngugo yimɓe ɓe'e. Nden mi nelan loohooɓe ɗuuɗɓe ɓe loohoto ɓe dow kooseeje e towndiije e nder ceekli tapaaje fuu.” Non Jawmiraawo wi'i.

¹⁷“Mi ɗon yi'a kuuɗe maɓɓe, walaa ko suuɗi. Aybe maɓɓe wiirnataako yeeso am.

¹⁸Mi waatoto aybe maɓɓe e hakkeeji maɓɓe cowi ɗiɗi. Ngam ɓe coɓni lesdi am bee labbi maɓɓe maayɗi, ɓe kebbini maral am bee kuuje maɓɓe nyidduɗe.”

¹⁹Yeremiya wi'i: “Yaa Jawmiraawo, an woni semmbe am e aynol am e hisrude am nder nyalaade ɓillaare! Ummaatooje ngaran haa maaɗa diga keeri duniyaaru, mbi'an: Kaakiraaɓe amin ngoodino ɗowanteeɓe fewooɓe e labbi meereeji ɗi nafataa sam.

²⁰Goɗɗo waawan waɗango hoore mum ɗowanteeɓe na? Alhaali boo naa ɗum ɗowanteeɓe bee gooŋga!”

²¹Jawmiraawo wi'i: “Jonta anndinanmi ɓe semmbe am e baawɗe am. Nden ɓe anndan min woni Jawmiraawo.”