Read Fulfulded Yeremiya 17 Bible Online

Yeremiya 17 - Fulfulded bible

Yeremiya 17

¹Jawmiraawo wi'i: “Onon yimɓe Yahuuda, hakkeeji mon mbinndaama bee binndirgol njamndi, ngol hunnduko mum ɓuri hayre saatugo. Ɗi mbinndaama bana non haa nder ɓerɗe mooɗon, haa dow luwe haa seɓattooji kirsirɗe mooɗon boo.

²Nden kam ɓiɓɓe mon ciftoran kirsirɗe e daŋraŋge Asera baŋnge leɗɗe kecce fuu e dow towndiije.

³Onon rewanɓe labbi dow kooseeje e nder waadiiji, mi hokkan jawdi e ndesaaji mooɗon haa konne'en ngam daliila hakkeeji ɗi mbaɗɗon koo toy nder lesdi mooɗon.

⁴Doole juuɗe mon njoofa lesdi ndi ndokkumi on. Mi laatinan on maccuɓe konne'en mooɗon nder lesdi ndi on anndaa, ngam caatal tikkere am dow mooɗon nde kuɓɓuɗon wulan haa foroy.”

⁵Ndaa nii Jawmiraawo wi'i: “Naaloore dow neɗɗo mo hooloto ɓii-Aadamaajo, mo ɓernde mum wayliti, acci Jawmiraawo.

⁶O nanndi bee wumre nder ladde hamaadaare, o meeɗataa yi'ugo hayru. Ammaa o jooɗoto nder ladde yoornde, haa nokkuure lammunde. Walaa mo jooɗoto ton.

⁷Barka laatanto neɗɗo mo hooloto Jawmiraawo, mo tabitini hoolaare mum dow Jawmiraawo.

⁸O nanndi bee lekki jubaaki baŋnge ndiyam, gurtinanki ɗaɗi mum gal maayel. To nguleeŋga waɗi, ki hulataa, ngam haakooji maaki kecci. Nder hitaande hokkere boo ki saklataako, ki ɗon tokko rimugo.

⁹Ɓernde neɗɗo ɓuri koo ɗume fuu naafikaaku, nde halli masin. Moy waawata faamugo nde?

¹⁰Min Jawmiraawo mi linyan ɓernde, mi wiɗititto numooji. Mi warjoto koo moy fodde yahdu mum e fodde nafuuda kuuɗe mum.

¹¹Mo riski bee rikici nanndi bee gerlal boofiiŋgal dow geeraaɗe ɗe ngal rufaay. Haa reeta balɗe maako risku maako majjiran mo, haa timmoode boo o paataaɗo non.”

¹²Suudu amin seniindu woni jooɗorde tedduŋgal, ndu tabiti dow hooseere diga fuɗɗam.

¹³Yaa Jawmiraawo, an woni tammunde Isra'iila. Accuɓe ma keewan mbustu. Ɓe majjan bana inɗe binndaaɗe nder mbulwuldi, ngam ɓe acci Jawmiraawo, seeɓoore ndiyam ndokkanɗam ngeendam.

¹⁴Yeremiya wi'i: “Yamɗitinam, yaa Jawmiraawo, nden mi yamɗitan. Hisnam, nden mi hisan fakat. An woni mo maŋgtanmi ɗum.

¹⁵Yimɓe ɗon mbi'ammi: Toy koŋngol Jawmiraawo go? Sey ngol hiɓɓa kadi!

¹⁶Min mi meeɗaay yerɓugo ma a nela sarru dow maɓɓe. Mi yelaay nyalaade bone ngam maɓɓe. An a anndi ɗum, yaa Jawmiraawo. A anndi ko mbi'mi.

¹⁷Taa laatanam daliila kultoreeŋgol, ngam an woni hisrude am nder nyalaade hallunde!

¹⁸Semtin toonyooɓe yam, ammaa taa mi semta! Hulnu ɓe, ammaa taa hulnam! Ukku nyalaade hallunde dow maɓɓe, halku ɓe cowi ɗiɗi!”

¹⁹Jawmiraawo wi'i yam: “Yah, dara haa Dammugal Ummaatoore, ngal laamiiɓe Yahuuda nastirta e ngurtirto berniwol, non boo haa dammuɗe Urusaliima goɗɗe fuu!

²⁰Wi' laamiiɓe e yimɓe Yahuuda e jooɗiiɓe haa Urusaliima, nastiranɓe dammuɗe man fuu: Nane ko Jawmiraawo wi'ata on:

²¹Ndaa ko o wi'i: Kakkilane ko'e mooɗon, taa ndoonde doŋngal nder nyannde siwtorde, taa nastine doŋngal koo ngale haa dammuɗe Urusaliima.

²²Taa ngurtine doŋngal e cuuɗi mon nyannde siwtorde, taa kuuwe kuugal boo. Ammaa cene nyannde siwtorde bana umrumi kaakiraaɓe mon.

²³Kamɓe ɓe nananaay yam, ɓe kakkilaay, ammaa ɓe caatini ko'e maɓɓe, ɓe cali nanango yam, ɓe njaɓaay elto am.”

²⁴Jawmiraawo wi'i: “Sey on ɗowtano yam booɗɗum. Taa on nastina doŋngal koo ngale haa dammuɗe berniwol ngo'ol nyannde siwtorde. Cene nyannde maajum, taa kuuwe kuugal koo ngale nder maare.

²⁵Nden kam laamiiɓe mon e ardiiɓe mon njooɗoto dow leeso laamu Daawuda. Ɓe mba'oto pucci e mootaaji pucci, kamɓe ɓe nastiran dammuɗe berniwol ngo'ol. Non boo yimɓe Yahuuda e Urusaliima. Yimɓe njooɗoto haa berniwol ngo'ol foroy.

²⁶Woɗɓe ngaran diga berniiji Yahuuda e gure taariiɗe Urusaliima, diga lesdi Benyamin e lesdi towndiije, diga kooseeje e Lesdi Fombina. Ɓe ngaddan guleteeɗi e kirseteeɗi e dokke nyaamdu e uurle, ɓe ngaddan dokke gettooje haa suudu am.

²⁷Ammaa sey on ɗowtano yam. Sey on cena nyannde siwtorde, taa on nastina doŋgle haa dammuɗe bernixol Urusaliima nder nyannde man. To naa non, mi huɓɓan yiite haa dammuɗe Urusaliima. Nge wulan cuuɗi maagol booɗɗi, nge nyifataako.”