Read Fulfulded Yeremiya 18 Bible Online

Yeremiya 18 - Fulfulded bible

Yeremiya 18

¹Jawmiraawo wolwani Yeremiya, wi'i:

²“Umma, yah haa saare mahoowo payanɗe, ton mi anndinte habaru am.”

³Mi yehi haa saare mahoowo payanɗe man. O ɗonno huuwa haa kuuwruɗum maako.

⁴Fayannde nde o ɗon maha, fottanaay mo. Ngam maajum o mahi fayannde feere bee loope man, bana ko fottani mo.

⁵Nden Jawmiraawo wolwani yam, wi'i:

⁶“Onon yimɓe Isra'iila, mi waawataa waɗugo on bana mahoowo payanɗe waarata loope na? Bana loope haa juŋngo mahoowo payanɗe, nonnon on laatori haa juŋngo am.” Nii Jawmiraawo wi'i.

⁷“Saa'i feere mi wi'an mi ɗoofa ummaatoore koo laamu, mi yibbina, mi halka ɗum.

⁸Ammaa to ummaatoore man wayliti, acci halleende muuɗum, nden kam mi faasitan waɗugo kalluɗum ko mbi'mi dow maare.

⁹Saa'i feere boo mi wi'an mi nyiɓa ummaatoore koo laamu, mi ɗisa ɗum.

¹⁰Ammaa to ummaatoore man waɗi kalluɗum yeeso am, to nde ɗowtanaaki yam, nden kam mi faasitan waɗugo booɗɗum ko mbi'mi dow maare.

¹¹Jonta kadi, yeccu yimɓe Yahuuda e jooɗiiɓe haa Urusaliima: Ndaa nii Jawmiraawo wi'i: Mi ɗon taaskano on sarru, mi ɗon nufano on huunde hallunde. Lorte diga laabi mon kalluɗi, mbo'itine laabi mon e kuuɗe mon!

¹²Ammaa ɓe njaaboto: Aa'a, woodaa! Min tokkoto numooji amin, min mbaɗan ko ɓerɗe amin kalluɗe caatuɗe ngiɗi.”

¹³Ngam maajum Jawmiraawo wi'i: “Ƴame ummaatooje fuu. Moy meeɗi nanugo irin ɗu'um? Yimɓe Isra'iila mbaɗi nyidduɗum masin.

¹⁴Mallimallooje cuddataa geereeje kooseeje Libanon tum na? Ndiyamji peewɗi ilooji e kooseeje man ɓeeɓan na?

¹⁵Ammaa yimɓe ummaatoore am ngejjiti yam, ɓe ɗon ngulana labbi meere uurle. Ngam maajum ɓe pergi dow laabi maɓɓe, dow laabi ɓooymaaji. Ɓe ɗon tokko laabi ɗi ceekaaka.

¹⁶Ɓe laatini lesdi maɓɓe kulniindi, njawniindi haa foroy. Koo moy caalotooɗo hultoran, dimmban hoore mum, hayɗinan.

¹⁷Mi saŋkitan yimɓe am yeeso konne'en maɓɓe bana collaaje ɗe henndu fuunaaŋge umminta. To halkere maɓɓe wari, mi waylitanan ɓe ɓaawo am, mi wallataa ɓe.”

¹⁸Nden yimɓe mbi'i: “Ngare, en kaɓɓa dabare dow Yeremiya! Liman'en ekkitinooɓe en tawreeta ɗon foroy, hikma'en carwanto en tum, annabi'en ngaazoto wolde Allah foroy. Kallinen mo, taa kakkilanen bolle maako sam!”

¹⁹Yeremiya tori Allah, wi'i: “Yaa Jawmiraawo, jaɓ tornde am, nan ko konne'en am mbi'ata.

²⁰Kadi halleende laatoto ngeenaari ngam mbooɗeeŋga na? Ammaa kamɓe ɓe ngasi ngaska ngam halkugo yam. Siftor no mi darori yeeso maaɗa, mi seetti ɓe ngam taa a waɗa ɓe fodde tikkere maaɗa!

²¹Ngam maajum yooftu ɓikkoy maɓɓe haa koy maaya bee weelo, koy mbare bee kaafahi! Rewɓe maɓɓe, sooynu ɓe ɓikkoy e worɓe! Waade nattina worɓe maɓɓe, suka'en mbare bee kaafahi nder haɓre!

²²Nel mooɓre jaɓtooɓe bee juhuki dow maɓɓe, haa yimɓe nana bojji iwanɗi diga cuuɗi maɓɓe! Ɓe ngasi ngaska ngam naŋngugo yam, ɓe tuufani kosɗe am tuuforli.

²³Ammaa an, yaa Jawmiraawo a anndi nufayeeje maɓɓe mbarooje ɗe ɓe nufi dow am. Taa yaafa zunuuba maɓɓe, taa sottin hakkeeji maɓɓe yeeso maaɗa! Accu ɓe ndo'o yeeso maaɗa, hiita ɓe saa'i tikkere ma!”