Read Fulfulded Yeremiya 22 Bible Online

Yeremiya 22 - Fulfulded bible

Yeremiya 22

¹Jawmiraawo wi'i yam: “Yah haa saare laamiiɗo Yahuuda, anndin wolde nde'e:

²Nane wolde Jawmiraawo, an laamiiɗo Yahuuda, jooɗiiɗo dow leeso laamu Daawuda e saraaki'en ma e yimɓe ma wonɓe haa laamorde fuu.

³Ndaa nii o wi'i: Mbaɗe kiita ngooŋɗuka e adilaaku. Kisne jaɓtaaɗo nder juŋngo toonyoowo. Taa ɓille hoɗɓe e atiime'en e rewɓe yurumɓe, taa toonye ɓe! Acce mbarugo yimɓe ɓe ngalaa aybe haa nokkuure nde'e!

⁴To on mbaɗi ko umrumi on, nden kam laamiiɓe mon mba'oto pucci e mootaaji pucci, tokkoto laamaago dow leeso laamu Daawuda. Kamɓe e saraaki'en maɓɓe e yimɓe maɓɓe nastan dammuɗe laamorde nde'e.

⁵Ammaa to on ɗowtanaaki bolle ɗe'e, nden kam laamorde nde'e laatoto winnde. Min Jawmiraawo mi hunori ɗum bee hoore am.”

⁶Ndaa nii Jawmiraawo wi'i: “Laamorde laamiiɗo Yahuuda wooɗi haa gite am bana lesdi Gile'at e yeereere hooseere Libanon. Ammaa mi wartiran nde winnde e nokkuure ferwunde.

⁷Mi nelan worɓe ngam wilugo nde. Koo moy maɓɓe wara bee fe'irde mum, fe'a leɗɗe cemmbiɗɗe ma ɓurɗe wooɗugo, wubo ɗe nder yiite.

⁸Ɓaawoɗon yimɓe ummaatooje ɗuuɗɗe caaloto baŋnge berniwol ngo'ol, ɓe ƴamƴamtiran: Ngam ɗume Jawmiraawo waɗi berniwol maŋngol ngo'ol bana nii?

⁹Nden ɓe njaaboto: Ngam jooɗiiɓe ton piisti alkawal bee Jawmiraawo Allah muuɗum'en, ɓe cujidani ɗowanteeɓe woɗɓe, ɓe ndewi ɓe.”

¹⁰Onon yimɓe Yahuuda, taa mboye ngam laamiiɗo Yusiya maayɗo, taa cune daliila maako. Ammaa mboye ngam ɓiyiiko Sallum mo dilli, wartataa yi'ugo lesdi haa o danya.

¹¹Ndaa nii Jawmiraawo wi'i dow Sallum ɓii Yusiya mo laami haa pellel baaba muuɗum Yusiya, laamiiɗo Yahuuda mo wurti nokkuure nde'e: “O dilli, o wartataa.

¹²O maayan haa lesdi ndi ɓe ndahi mo, o meetataa yi'ugo lesdi ndi'i[17].”

¹³“Bone laatanto nyiɓanɗo saare mum bee sooynde adilaaku e cuuɗi mum dowji bee aybe, kuuwnanɗo heeddiɗɗiraaɓe mum, bilaa hokkugo ɓe ngeenaari.

¹⁴Bone laatanto bi'ɗo: Mi nyiɓan saare mawnde, cuuɗi dow cuuɗi, mi yaajina cuuɗi am.” O ɗon waɗa burɗe haa cuuɗi maako, o ɗon sudda mahi maaji bee leɗɗe booɗɗe, o ɗon woojina ɗi.

¹⁵Kadi a laamiiɗo ngam a ɗuɗɗina cuuɗi bee leɗɗe booɗɗe na? Baaba ma nyaami, yari. Ammaa o waɗi kiita ngooŋɗuka e adilaaku, ngam maajum o heɓi hayru.

¹⁶O jiŋngi laafuɗo e talakaajo, koo ɗume fuu yehi booɗɗum. Kanjum woni anndugo yam, non Jawmiraawo wi'i.

¹⁷Ammaa sey riba maaɗa kalluka tan a suklanto. A ɗon mbara yimɓe ɓe ngalaa aybe, a ɗon ɓilla yimɓe, a ɗon toonyo ɓe.

¹⁸Ngam maajum, ndaa nii Jawmiraawo wi'i dow Yooyakim ɓii Yusiya, laamiiɗo Yahuuda: “Walaa mo woyata maayde maako, wi'a: Kayto, deerɗam gorko! Kayto, deerɗam debbo! Walaa mo woyata mo: Kayto, jawmam! Kayto, barkaama!

¹⁹O heɓan uwol bana ngol wamnde. Ɓe ndasan ɓanndu maako yaasi dammuɗe Urusaliima, ɓe ngudina mo ton!”

²⁰Jawmiraawo wi'i: “An Urusaliima, wa'a dow hooseere Libanon, wooku. Ummin gookaali haa lesdi Baasan. Waɗ hoolo dow hooseere Abariima, ngam waaye'en ma fuu kalki.

²¹Mi wolwani ma saa'i a jooɗi jam, ammaa a sali nanugo. Bana non kuuwruɗa diga a derkeejo tawon, a yiɗaa ɗowtanaago yam.

²²Henndu ruuynan ardiiɓe ma, ɓe ndahan boo waaye'en ma. Nden a heewan semteende e toskaare ngam daliila halleende ma fuu.

²³A ɗon hoolɗina caka leɗɗe booɗɗe iwɗe Libanon. Ammaa a uuman, saa'i luuwe naŋngete bana ɗe ɓesnanɗo.”

²⁴Jawmiraawo wi'i dow Koniya[18] ɓii Yooyakim, laamiiɗo Yahuuda: “Fakat bana mi geeto, koo to a laatake halagaare haa juŋngo am nyaamo, mi ittete,

²⁵mi hokkete haa juuɗe yiɗɓe mbarugo ma, haa yimɓe hulnanɓe ma. Mi hokkete haa juuɗe Nabukodonosor, laamiiɗo Baabila e haa Kaldiya'en.

²⁶Mi sakkinte bee daada ma haa lesdi ndi on ndanyaaka nder muuɗum, ton maayoton.

²⁷On meetataa wartugo lesdi ndi ngenwoton wartugo nder muuɗum.”

²⁸Yeremiya wi'i: “Kadi Koniya laati bana mbulku pusŋgu ngu goɗɗo yiɗaa, ngu nafataa na? Ngam ɗume kaŋko e danygol maako hoocete, wudinte haa lesdi ndi ɓe anndaa?

²⁹Lesdi! Lesdi! Lesdi! Nan wolde Jawmiraawo!

³⁰Ndaa ko Jawmiraawo wi'i: Mbinnde innde gorko oo bana mo walaa ɓikkoy, mo walaa hayru balɗe mum fuu. Walaa koo gooto mo danygol maako heɓata jooɗaago dow leeso laamu Daawuda ngam laamanaago lesdi Yahuuda.”