Read Fulfulded Yeremiya 24 Bible Online

Yeremiya 24 - Fulfulded bible

Yeremiya 24

¹Jawmiraawo yi'ni yam cilaaje ɗiɗi keewɗe ibbe jo'inaaɗe yeeso haykaliiru Jawmiraawo. Ɗum waɗi ɓaawo nde Nabukodonosor, laamiiɗo Baabila haɓɓi Yekoniya[20] ɓii Yooyakim, laamiiɗo Yahuuda e mawɓe Yahuuda e kila'en e worɓe waɗooɓe sanaa'a fuu, dahi ɓe haa Baabila.

²Silaawo wooto heewi ibbe booɗɗe masin, bana ibbe aartuɗe ɓenndugo. Silaawo woɗŋgo heewi ibbe ɗe mbooɗaay sam, goɗɗo waawataa nyaamugo ɗe.

³Jawmiraawo ƴami: “Yeremiya, ko ngi'ata?” Mi jaabi: “Ibbe. Booɗɗe maaje mbooɗi masin. Luttuɗe boo mbooɗaay sam, goɗɗo waawataa nyaamugo ɗe.”

⁴Nden Jawmiraawo wi'i yam.

⁵Ndaa nii Jawmiraawo Allah Isra'iila wi'i: “Mi ɗon laara dahaaɓe diga Yahuuda haa lesdi Kaldiya'en bana ibbe booɗɗe ɗe'e.

⁶Mi woonanan ɓe, mi enɗan ɓe haa mi hoora ɓe haa lesdi ndi'i. Mi tammi tabitingo ɓe, mi nattintaa ɓe. Mi tammi ɗisugo ɓe, naa ittugo ɓe.

⁷Mi hokkan ɓe faamu ngam anndugo min woni Jawmiraawo. Nden ɓe laatoto ummaatoore am, min boo mi laatoto Allah maɓɓe, ngam ɓe lortoto haa am bee ɓernde woore.

⁸Ammaa Sedekiya, laamiiɗo Yahuuda e saraaki'en muuɗum e luttuɓe Urusaliima, jooɗiiɓe haa lesdi ndi'i malla haa Misra, min Jawmiraawo mi nanndinan ɓe bana ibbe ɗe nyaamataake ngam ɗe mbooɗaay.

⁹Mi ukkanan ɓe sarru naawŋgu, haa laamuuji duniyaaru fuu kultora daliila maɓɓe. Yimɓe kuɗan ɓe, njancan ɓe, njalan ɓe, naalan bee innde maɓɓe haa nokkuuje ɗe ndiiwanmi ɓe fuu.

¹⁰Mi ukkanan ɓe konu e weelo e nyawu kalluŋgu ndaaɓoowu, haa ɓe natta nder lesdi ndi ndokkumi ɓe e kaakiraaɓe maɓɓe.”