Read Fulfulded Yeremiya 27 Bible Online

Yeremiya 27 - Fulfulded bible

Yeremiya 27

¹Nde Sedekiya ɓii Yusiya fuɗɗi laamaago nder lesdi Yahuuda, Jawmiraawo wolwani Yeremiya.

²Ndaa ko Jawmiraawo wi'i mo: “Waɗan hoore ma kaɓɓirgal e ɓoggi, yow ngal dow daande ma.

³Nden neldu ɗum laamiiɓe Edoom e Mo'ab e Ammoon e Tirus e Sidon, bee nelaaɓe maɓɓe warɓe haa Urusaliima ngam laarugo laamiiɗo Sedekiya.

⁴Yeccu ɓe: Ndaa nii Jawmiraawo honooɓe asama, Allah Isra'iila umri on wi'ugo jaagorɓe mon:

⁵Min bee baawɗe am mawɗe e juŋngo am fortaaŋgo tagrumi lesdi e yimɓe e dabbaaji gonɗi dow maari. Mi hokkan ɗum haa juŋngo mo ngiɗmi.

⁶Min hokki ummaatooje ɗe'e fuu haa juŋngo suka am Nabukodonosor, laamiiɗo Baabila. Mi hokki mo koo kuuje ladde boo haa ɗe kuuwana mo.

⁷Ummaatooje fuu njagganto mo. Ɗe njagganto ɓiɗɗo maako e taaniraawo maako boo, sey to saa'i wari haa ummaatooje ɗuuɗɗe e laamiiɓe marɓe baawɗe ɗowtina ummaatoore maako, kayre boo.

⁸To ummaatoore wonnde malla laamu salake jagganaago Nabukodonosor, laamiiɗo Baabila, jaɓaay kaɓɓirgal laamu maako, nden kam mi hiitoto ummaatoore man bee konu e weelo e nyawu kalluŋgu ndaaɓoowu, haa to mi nattini ummaatoore nde'e bee juŋngo maako.

⁹Taa nanane annabi'en mon, koo laarooɓe mon, koo hoyɗooɓe mon, koo waɗooɓe hatti, koo hiila'en wi'anɓe on: On njaggantaako laamiiɗo Baabila.

¹⁰Ɓe ɗon mbaɗa on annabaaku fewre haa ɓe ndaayna on e lesdi mon, haa mi riiwa on, on kalka.

¹¹Ammaa to ummaatoore jaɓi kaɓɓirgal laamiiɗo Baabila, huuwani mo, nden kam mi accan nde nde tokko remugo lesdi maare, nde jooɗo ton.” Non Jawmiraawo wi'i.

¹²Yeremiya yecci Sedekiya, laamiiɗo Yahuuda, habaru man. O wi'i: “Njaɓe kaɓɓirgal laamiiɗo Baabila dow daaɗe mon, kuuwane ummaatoore maako, nden on ngeeɗan.

¹³Walaa haaje on maayra bee konu e weelo e nyawu kalluŋgu ndaaɓoowu, an e ummaatoore ma! Ngam Jawmiraawo wi'i kanjum laatanto ummaatoore koo ndeyeere nde sali jagganaago laamiiɗo Baabila.

¹⁴Taa nane bolle annabi'en wi'anɓe on: On njaggantaako laamiiɗo Baabila. Ngam ɓe ɗon mbaɗa on annabaaku fewre.

¹⁵Jawmiraawo wi'i: Min kam, mi nelaay ɓe, ɓe ɗon pewa bee innde am, haa mi riiwa on, on kalka, onon e fewanɓe on wi'anɓe ɓe annabi'en.”

¹⁶Nden Yeremiya wolwani liman'en e ummaatoore fuu: “Ndaa nii Jawmiraawo wi'i: Taa nane bolle annabi'en mon waɗananɓe on annabaaku ni'i: Yeeso seɗɗa ɓe ngartiran kuuwruɗe haykaliiru Jawmiraawo diga Baabila. Ɓe ɗon pewana on.

¹⁷Taa nanane ɓe. Njaggane laamiiɗo Baabila, nden on ngeeɗan. Walaa haaje berniwol ngo'ol laato bille!

¹⁸To kamɓe ɓe laati annabi'en fakat, to wolde am ɗon wondi bee maɓɓe, sey ɓe toro yam min Jawmiraawo honooɓe asama, ngam taa kuuwruɗe luttuɗe nder haykaliiru am e nder saare laamiiɗo Yahuuda e nder Urusaliima njahre haa Baabila.

¹⁹Saa'i Nabukodonosor, laamiiɗo Baabila dahi Yekoniya ɓii Yooyakim, laamiiɗo Yahuuda e tedduɓe Yahuuda e Urusaliima fuu haa Baabila, o acci daŋraŋge e ko wi'ete loonde mawnde[23] e kuuwruɗe goɗɗe nder Urusaliima.

²¹Ndaa nii Jawmiraawo honooɓe asama, Allah Isra'iila wi'i dow kuuwruɗe luttuɗe nder haykaliiru Jawmiraawo e nder saare laamiiɗo Yahuuda e nder Urusaliima fuu:

²²Ɓe ndahan ɗe haa Baabila. Ton ɗe ngonata, sey to mi yaali ɗe fahin. Nden mi hooran ɗe haa nokkuure nde'e.” Nii Jawmiraawo wi'i.