Read Fulfulded Yeremiya 31 Bible Online

Yeremiya 31 - Fulfulded bible

Yeremiya 31

¹Jawmiraawo wi'i: “Saa'i maajum mi laatoto Allah ngam ci'e yimɓe Isra'iila fuu, kamɓe boo ɓe laatoto ummaatoore am.

²Yimɓe daɗɓe kaafahi keɓi mo'ere nder ladde. Isra'iila ɓadi heɓugo de'ere.

³Jawmiraawo waŋgani ɓe diga daayiiɗum, wi'i: Onon yimɓe am, diga ɓooyma mi yiɗi on,[26] ngam man mi ɗon tokko mo'ango on.

⁴Mi darnitan on haa on ndaro, onon yimɓe Isra'iila. On ngurtoto fahin bee bawɗi, on ngama bee seyo.

⁵On njuboto gese inabooje fahin dow kooseeje Samariya, remooɓe ɗe nyaaman ko ɓe njubi.

⁶Fakat saa'i ɗon wara haa aynooɓe koola dow kooseeje Efrayim: Umme, njehenma Siyona haa Jawmiraawo Allah men!”

⁷Ndaa nii Jawmiraawo wi'i: “Mbaɗe hoolo seyo ngam daliila Yaakubu, mbelmbelte ngam ummaatoore ɓurnde mawnugo. Ngooyne maŋgtoore, mbi'e: Jawmiraawo, hisnu yimɓe ummaatoore ma, luttuɓe Isra'iila!

⁸Ndaa, mi wartiran ɓe diga lesdi woyla, mi mooɓtan ɓe diga keerol duniyaaru ɓurŋgol daayaago. Bumɗo e boosɗo ngardan bee maɓɓe, reedu'en e ɓesnanɓe fuu, mooɓtorde mawnde wartata haa ɗo.

⁹Ɓe ngardan bee bojji, ɓe toroto yam saa'i mi ɗon ɗowa ɓe. Mi yahran ɓe haa maaje ndiyam, dow laawol booɗŋgol ngam taa ɓe pergo. Ngam mi laatani Isra'iila bana baaba, Efrayim boo woni afo am.”

¹⁰Onon ummaatooje, nane koŋngol Jawmiraawo, anndine ngol haa duuɗe daayiiɗe! Mbi'e: “Mo saŋkiti Isra'iila'en, mooɓtan ɓe, aynan ɓe bana gaynaako aynirta tokkere mum.”

¹¹Ngam Jawmiraawo sootti yimɓe Yaakubu, rimɗini ɓe diga juŋngo ɓurɗo ɓe semmbe.

¹²Ɓe ngaran, ɓe mbelmbeltan dow hooseere Siyona, seyo maɓɓe waŋgan daliila barkaaji Jawmiraawo, waato alkamaari e inaboojam e nebbam e baali e na'i ɗum o hokki ɓe. Ɓe laatoto bana jarne cafaaɗe, ɓerɗe maɓɓe meetataa torraago.

¹³Nden faanyɓe ngaman bee seyo, suka'en e ndotti'en fuu ceyoto. Jawmiraawo wi'i: “Mi de'itinan ɓe, haa bojji maɓɓe laato seyo, torra ɓerɗe maɓɓe laato welwelo.

¹⁴Mi haarnan liman'en bee kusel marŋgel ɓellere, mi hebbinan ummaatoore am bee kuuje am booɗɗe.” Non Jawmiraawo wi'i.

¹⁵Ndaa nii Jawmiraawo wi'i: “Gookaali ummi haa Rama, bojji kaaɗɗi e yooyooji ɗuuɗi. Ɗum Rahiilu ɗon woya ɓikkoy mum. O sali de'itineego, ngam koy maayi.”

¹⁶Jawmiraawo wi'i: “Accu woyugo e ilnugo gonɗi! Mbarjaari torra ma ɗon, ɓikkoy ma ngartan diga lesdi konne'en.

¹⁷Yeeso ɗo, tammunde ɗon ngam maaɗa, ɓikkoy ma ngartan haa lesdi muuɗum'en.” Non Jawmiraawo wi'i.

¹⁸“Mi nani yimɓe Efrayim ɗon mboya, ɗon mbi'a: Yaa Jawmiraawo, a elti min. Minin boo min njaɓi elto ma bana ga'i ɗi eltaaka. Lortin min, nden min lortoto, ngam an woni Jawmiraawo Allah amin.

¹⁹Min ngayliti, min acci ma, ammaa jonta min ɗon mimsito. Min keɓti hakkiilo amin, ngam man min piyi biɓɓe amin. Min cemti, min toskake, ngam min mbaɗi aybe, saa'i min derke'en tawon.

²⁰An Efrayim[27], a ɓiɗɗo am giɗaaɗo, a ɓiŋngel am ngel ɓurmi yiɗgo. Nde ngiɗmi felugo ma fuu, mi siftoran no mi yiɗiri ma. Ngam maajum ɓernde am ɗon waylo nder am, mi hinnoto ma fakat.” Non Jawmiraawo wi'i.

²¹“Darnu alaamaaji, jo'in maandorɗe haa laawol. Heɓtu laawol ngol tokkinooɗa. Wartu, Isra'iila, wartu haa berniiji maaɗa!

²²Haa ndey on accata yiilaago, onon tuurtuɓe? Ndaa, min Jawmiraawo mi tagi goɗɗum kesum haa duniyaaru: Debbo muuyan gorko[28]!”

²³Ndaa nii Jawmiraawo honooɓe asama, Allah Isra'iila wi'i: “To mi wartiri joonde yimɓe bana naane, ɓe mbi'an fahin nder lesdi Yahuuda e nder gure maari: Jawmiraawo barkiɗin Urusaliima, jooɗorde adilaaku, hooseere seniinde!

²⁴Yimɓe njooɗoto nder lesdi Yahuuda e nder gure maari fuu, hawtaade bee remooɓe e waynaaɓe bee tokke muuɗum'en.

²⁵Mi semmbiɗinan koo moy comɗo, mi haarnan koo moy dolɗo.”

²⁶Nden Yeremiya fini, tawi ɗoyŋgol muuɗum weli!

²⁷Jawmiraawo wi'i: “Saa'i ɗon wara haa mi hebbina lesdi Isra'iila e lesdi Yahuuda bee yimɓe e dabbaaji.

²⁸Bana mi tiɗɗiniri ɗoofugo e fe'ugo, ngam halkugo e yibbingo e wonnugo, bana non mi tiɗɗiniran nyiɓtaago e jubaago ɓe.” Non Jawmiraawo wi'i.

²⁹“Saa'i man ɓe meetataa wi'ugo: Baabiraaɓe muri lammuɗum, ammaa ɗum nyii'e ɓikkoy mbaati.

³⁰Naa non, ammaa koo moy muri lammuɗum, nyii'e mum tan mbaatata. Koo moy maayan ngam hakkeeji muuɗum tan.”

³¹Jawmiraawo wi'i: “Nyalɗe ɗon ngara haa mi haɓɓa alkawal kesal bee yimɓe Isra'iila e yimɓe Yahuuda.

³²Ngal laatataako bana alkawal ngal kaɓɓumi bee kaakiraaɓe maɓɓe nyannde mi naŋngi juuɗe maɓɓe ngam wurtingo ɓe lesdi Misra. Koo mi laati jawmiiɓe, kamɓe ɓe piisti alkawal bee am.

³³Ammaa to saa'i man wari, mi haɓɓan alkawal bee yimɓe Isra'iila bana ni'i: Mi nastinan tawreeta am nder hakkiilooji maɓɓe, mi winndan ka nder ɓerɗe maɓɓe. Min mi laatoto Allah maɓɓe, kamɓe boo ɓe laatoto ummaatoore am.

³⁴Walaa haaje goɗɗo ekkitina keeddiɗɗum malla deerɗum, wi'a mo: Anndu Jawmiraawo. Ngam ɓe fuu ɓe anndatam, diga leesɗo maɓɓe haa mawɗo maɓɓe. Ngam mi yaafoto aybeeji maɓɓe, mi meetataa siftorgo hakkeeji maɓɓe.” Non Jawmiraawo wi'i.

³⁵Jawmiraawo jo'ini naaŋge ngam yaynugo nyalawma, lewru e koode boo ngam yaynugo jemma. O ɗon ummina mbeela haa ƴuuge maaga koola. Innde maako Jawmiraawo honooɓe asama. Kaŋko o wi'i: “Sonaa to umrooje ɗowanɗe tagefo ɗe'e nafataa fahin, ummaatoore Isra'iila tabitittaako ummaatoore yeeso am.

³⁷To goɗɗo waawi foondugo asamanji e wiɗitaago caɓɓaaje lesdi, nden kam mi wudinan yimɓe Isra'iila fuu ngam kuuɗe maɓɓe.” Non Jawmiraawo wi'i.

³⁸“Saa'i ɗon wara nde yimɓe nyiɓtoto berniwol ngo'ol, diga suudu Hananiyel towndu haa Dammugal Toldu.” Non Jawmiraawo wi'i.

³⁹“Diga ton keerol maagol yahan gal hiirnaaŋge haa yotto towndiire Gareb, nden ngol waylititto, ngol yahan Go'a.

⁴⁰Waadiwol nyawmanɗe e ndoondi e babe fuu haa yotto maayel Kederon, haa yotto Dammugal Pucci haa fuunaaŋge, ɗum fuu ɗum laatoto cenaaɗum ngam Jawmiraawo, ɗum meetataa yibbineego koo halkeego haa foroy.”