Read Fulfulded Yeremiya 37 Bible Online

Yeremiya 37 - Fulfulded bible

Yeremiya 37

¹[31] Nabukodonosor, laamiiɗo Baabila laaminno Sedekiya ɓii Yusiya dow lesdi Yahuuda, haa pellel Koniya ɓii Yooyakim.

²Ammaa Sedekiya e suka'en mum e yimɓe lesdi ɗowtanaaki ko Jawmiraawo wi'i bee hunnduko annabi Yeremiya.

³Laamiiɗo Sedekiya neli Yehukal ɓii Selemiya e Sefaniya ɓii Ma'aseya, limanjo, haa annabi Yeremiya, ɓe mbi'a mo: “Useni tora Jawmiraawo Allah meeɗen ngam amin!”

⁴Saa'i man Yeremiya ɗon waanca caka yimɓe tawon, o siwaa nastineego nder fursina.

⁵Jama'aare konu Firawna wurtino Misra. Nde Kaldiya'en hippunooɓe Urusaliima nani haala ka'a, ɓe ndaayti Urusaliima.

⁶Jawmiraawo wolwani annabi Yeremiya:

⁷Ndaa nii Jawmiraawo, Allah Isra'iila wi'i: “Mbi'e laamiiɗo Yahuuda mo neli on ƴamugo yam: Jama'aare konu Firawna wurtiinde wallugo on, loroto haa lesdi Misra.

⁸Kaldiya'en loroto haa ɗo ngam honugo berniwol ngo'ol. Ɓe nyaaman ngol, ɓe ngulan ngol.

⁹Ndaa nii Jawmiraawo wi'i: Taa pewane ko'e mon bee wi'ugo: Kaldiya'en accan en, ndillan daayiiɗum bee meeɗen fakat! Ngam ɓe accaay en!

¹⁰Koo to on njaalake jama'aare Kaldiya'en honɓe on fuu, haa yuwaaɓe waaliiɓe nder cuuɗi laymaaji muuɗum'en tan luttani ɓe, fakat ɓe ummoto, ɓe ngulan berniwol!”

¹¹Jama'aare konu Kaldiya'en daayti, acci Urusaliima, daliila jama'aare konu Firawna.

¹²Saa'i man Yeremiya wurti Urusaliima, o yiɗi yahugo lesdi Benyamin ngam jaɓoygo geɗal babal ndonŋgu maako caka banndiiko'en.

¹³Ammaa nde o yotti Dammugal Benyamin, hooreejo aynooɓe ton, mo innde mum Yiriya ɓii Selemiya ɓii Hananiya, naŋngi annabi Yeremiya, wi'i mo: “A yiɗi hawtango Kaldiya'en.”

¹⁴Yeremiya wi'i: “Ɗum fewre! Mi yiɗaa hawtango ɓe.” Ammaa Yiriya nananaay mo. O jogiti Yeremiya, o yahri mo yeeso saraaki'en.

¹⁵Kamɓe ɓe tikkani Yeremiya, ɓe ɓocci mo e ɓe maɓɓi mo nder suudu Yonatan, binndoowo, ngam ɓe laatinno ndu fursina.

¹⁶Ɓe njolli mo nder ngaska, ton o jooɗi nyalɗe ɗuuɗɗe.

¹⁷Nden laamiiɗo Sedekiya neli ɗaɓɓitoygo mo. Nder saare maako o ƴami Yeremiya bee sirri: “Woodi wolde iwnde diga Jawmiraawo na?” Yeremiya jaabi: “Ooho, ndaa nde: A hokkaama haa laamiiɗo Baabila.”

¹⁸Nden Yeremiya ƴami laamiiɗo Sedekiya: “Aybewol ngole mbaɗmi dow maaɗa koo dow saraaki'en ma e ummaatoore ma haa on nastini yam nder fursina?

¹⁹Toy annabi'en mon waɗɓe on annabaaku, wi'ɓe: Laamiiɗo Baabila warataa honugo on e honugo lesdi ndi'i?

²⁰Useni, barkaama, jaɓ tornde am. Taa lornitam haa suudu Yonatan, binndoowo, ngam taa mi maaya ton.”

²¹Laamiiɗo Sedekiya umri ɓe maɓɓa Yeremiya haa daldal saare laamiiɗo haa aynooɓe aynata. Ton ɓe ndokka mo nyalɗe fuu tamseere diga Laawol Tamsooɓe, sey to tamseeje timmidi nder berniwol. Bana nii Yeremiya jooɗori haa daldal saare laamiiɗo haa aynooɓe aynata.