Read Fulfulded Yeremiya 39 Bible Online

Yeremiya 39 - Fulfulded bible

Yeremiya 39

¹Nder nduuɓu Sedekiya, laamiiɗo Yahuuda, njoweenayaɓu, nder lewru sappooru, Nabukodonosor, laamiiɗo Baabila wardi bee jama'aare konu muuɗum fuu, hippi Urusaliima.

²Nder nduuɓu Sedekiya sappo e go'oowu, lewru nayaɓru, nyannde joweenayaɓre maaru, ɓe cumpiti mahi berniwol.

³Nden mawɓe laamiiɗo Baabila fuu nasti, njooɗi haa Dammugal Cakaawal. Nder maɓɓe Nergal-Sarecer e Samgar-Nebo e Sarsekim, mawɗo saraaki'en e Nergal-Sarecer feere, ardiiɗo annduɓe alaamaaji koode non boo mawɓe laamiiɗo Baabila woɗɓe.

⁴Nde Sedekiya, laamiiɗo Yahuuda e honooɓe muuɗum fuu ngi'i ɗum, ɓe ngurti berniwol bee jemma, ɓe ndoggiri laawol jarne laamiiɗo e dammugal caka mahi ɗiɗi, ɓe ngurtori waadiwol Urdun.

⁵Ammaa jama'aare konu Kaldiya'en taasni ɓe, jokki Sedekiya nder ƴoole baŋnge Yeriko. Ɓe naŋngi mo, ɓe njahri mo haa laamiiɗo Baabila haa Ribla nder lesdi Hamat. Ton Nabukodonosor hiiti mo.

⁶O umri hirsugo ɓiɓɓe Sedekiya yeeso maako. O umri hirsugo tedduɓe Yahuuda boo.

⁷Nden o ɗoofi gite Sedekiya, o haɓɓi mo bee callalluuji njamndi mboɗeeri, ɓe njahri mo haa Baabila.

⁸Kaldiya'en nguli saare laamiiɗo e cuuɗi yimɓe, ɓe ngibbini mahi Urusaliima.

⁹Nden Nebuzaradan, hooreejo aynooɓe laamiiɗo hoo'i luttuɓe nder berniwol e hawtannooɓe mo, dahi ɓe haa Baabila.

¹⁰Walaa mo o acci, sey leesɓe, talaka'en nder lesdi Yahuuda, o hokki ɓe gese e gese inabooje.

¹¹Nabukodonosor, laamiiɗo Baabila umruno Nebuzaradan, hooreejo aynooɓe muuɗum, ngam daliila Yeremiya, wi'no mo:

¹²“Hoo'u Yeremiya, hakkilan mo, taa hallan mo sam. Ammaa waɗan mo ko o wi'ete fuu.”

¹³Ngam man Nebuzaradan, mawɗo saraaki'en e Nebusazaban, ardiiɗo annduɓe alaamaaji koode e Nergal-Sarecer e mawɓe laamiiɗo Baabila fuu

¹⁴neli ɗaɓɓitoygo Yeremiya haa daldal saare laamiiɗo haa aynooɓe aynata. Ɓe acci mo haa juŋngo Gedaliya ɓii Ahikam ɓii Safan, ngam o hoora mo jam. Bana nii Yeremiya jooɗori caka ummaatoore.

¹⁵Saa'i Yeremiya ɗonno haɓɓi haa daldal saare laamiiɗo haa aynooɓe aynata, Jawmiraawo wolwani mo, wi'i:

¹⁶“Yah, yeccu Ebed-Melek Etiyopiyaajo: Ndaa nii Jawmiraawo honooɓe asama, Allah Isra'iila wi'i: Mi timminan ko mbi'mi dow berniwol ngo'ol. Mi ukkanan ngol sarru, naa hayru, an bee hoore ma a yi'an ɗum nyannde man.

¹⁷Ammaa mi hisnete nyalaade man. A hokkataake haa juuɗe yimɓe ɓe kulata.

¹⁸Mi aynete fakat, ngam taa a maaya bee kaafahi. A hisnan yoŋki ma ngam a hoolake yam.” Non Jawmiraawo wi'i.