Read Fulfulded Yeremiya 43 Bible Online

Yeremiya 43 - Fulfulded bible

Yeremiya 43

¹Nde Yeremiya timmini yeccugo yimɓe ummaatoore ko Jawmiraawo Allah maɓɓe neli mo anndingo ɓe fuu,

²Azariya ɓii Hosa'ya e Yohanan ɓii Kareha e worɓe elewɓe fuu mbi'i mo: “A ɗon fewa! Jawmiraawo Allah amin nelaay ma wi'ugo min, taa min njaha Misra ngam faɓɓoygo ton.

³Ammaa Baruku ɓii Neriya ummini ma dow amin, ngam hokkugo min haa juuɗe Kaldiya'en, haa ɓe mbara min malla ɓe ndaha min haa Baabila.”

⁴Bana non Yohanan e mawɓe konu fuu e ummaatoore fuu ɗowtanaaki Jawmiraawo umruɗo ɓe jooɗaago nder lesdi Yahuuda.

⁵Yohanan e mawɓe konu fuu koo'i luttuɓe Yahuuda fuu, njahri ɓe haa Misra. Ɓe koo'i yimɓe wartuɓe Yahuuda diga lesɗe haa ɓe caŋkitino fuu,

⁶worɓe, rewɓe, ɓikkoy e ɓiɓɓe laamiiɗo rewɓe, koo ɓeye ɓe Nebuzaradan, hooreejo aynooɓe laamiiɗo Baabila accino haa Gedaliya ɓii Ahikam ɓii Safan. Ɓe koo'i boo annabi Yeremiya e Baruku ɓii Neriya.

⁷Ɓe ɗowtanaaki umroore Jawmiraawo, ɓe njehi Misra, haa yotti berniwol Tahapanes.

⁸Haa Tahapanes Jawmiraawo wolwani Yeremiya, wi'i mo:

⁹“Hoo'u kaa'e mawɗe, nastin ɗe nder taŋkol yeeso nastirde suudu Firawna haa Tahapanes. Waɗ ɗum haa gite Yahuudu'en.

¹⁰Nden yeccu ɓe: Ndaa nii Jawmiraawo honooɓe asama, Allah Isra'iila wi'i: Mi nelan waddugo suka am Nabukodonosor, laamiiɗo Baabila, ngam mi jo'ina leeso laamu maako dow kaa'e ɗe nastinmi ɗo, kaŋko o we'itan laymaaru maako haa dow maaje.

¹¹O waran o hippo lesdi Misra. Mo hoddirana maayugo, maayan. Mo hoddirana daheego, daheteeɗo. Mo hoddirana mbareego bee kaafahi, mbareteeɗo bee kaafahi.

¹²Mi huɓɓan yiite nder cuuɗi ɗowanteeɓe Misra. Laamiiɗo Baabila wulan ɗowanteeɓe Misra malla o yahran ɓe haa Baabila. O laɓɓinan lesdi Misra bana gaynaako ittirta tenɗi haa limce mum. Ɓaawo man o hoota jam.

¹³O yibbinan daŋraŋge cenaaɗe haa Bayti-Semes nder lesdi Misra, o wulan cuuɗi ɗowanteeɓe Misra.”