Read Fulfulded Yeremiya 48 Bible Online

Yeremiya 48 - Fulfulded bible

Yeremiya 48

¹Ndaa nii Jawmiraawo honooɓe asama, Allah Isra'iila wi'i: “Bone dow yimɓe Nebo! Berniwol maɓɓe halkaama. Konne'en nyaami Kiriyatayim, toskini yimɓe maagol. Ɓe ngibbini cuuɗi maagol cemmbiɗɗi, toskini yimɓe maagol.

²Maŋngu Mo'ab majji. Haa Hesbon, konne'en nufi kalluɗum dow Mo'ab: Ngare! En kalka ummaatoore nde'e! An boo, Madamen[38], a halkan, ngam kaafahi ɗon taasne.

³Yimɓe ɗon ngooka haa Horonayim: Halkere e yibbere naawnde!

⁴Mo'ab sampitaama! Nane no ɓikkoy mboyrata.

⁵Nane hoolo bojji dogguɓe dow laawol wa'iiŋgol haa Lukit e gookaali bone dow laawol jippiiŋgol haa Horonayim.

⁶Ɓe ɗon mbi'a: Ndogge, kisne yoŋkiiji mon! Ndogge bana wamnde ladde[39]!

⁷An Mo'ab, a tuugi semmbe ma e risku ma. Ammaa jonta konne'en nyaamete, an boo. Ɗowanteeɗo ma Kemos o daheteeɗo, bee liman'en mum e saraaki'en mum fuu.

⁸Nattinoowo ukkanto berniwol koo ngole, walaa koo gootol daɗata. Waadiwol e ƴoolde ɗiɗi fuu kalkan.” Non Jawmiraawo wi'i.

⁹“Mbaɗane lesdi Mo'ab bileeji, ndi fiira ndi daayto. Berniiji maari laatoto bille, walaa mo jooɗoto ton.”

¹⁰Naaloore dow koo moy kuuwanɗo kuugal Jawmiraawo bee yeebaare. Naaloore dow naŋgtanɗo kaafahi mum e rufugo ƴiiƴam.

¹¹Jawmiraawo wi'i: “Diga fuɗɗam Mo'ab jooɗi bee de'ere e hoolaare, meeɗaay daheego. Mo'ab nanndi inaboojam mbaaliiɗam ɗam meeɗaay wayleego. Dakam maajam wonnaaki, ɗam luuɓɗam bana naane. Ammaa saa'i ɗon wara haa mi nela yimɓe ngam ɓe loowa Mo'ab haa mbulku ngoɗŋgu bana inaboojam. Ɓe ndufa ko woni nder bulki, ɓe pusa ɗi.

¹²

¹³Nden Mo'abi'en cemtiran lawru Kemos, bana Isra'iila'en cemtiri bee lawru wonndu haa Baytila ndu ɓe kooli ɗum.

¹⁴Onon worɓe Mo'ab, noy mbi'roton on honooɓe semmbiɗɓe, waawɓe konu?

¹⁵Kalkoowo lesdi Mo'ab wa'i dow berniiji maari, suka'en maari wooɗɓe njippi ngam mbareego.” Non Laamiiɗo mo innde mum Jawmiraawo honooɓe asama wi'i.

¹⁶“Halkere Mo'ab ɓadake wargo, sarru maari ɗon ɓadito bee jaawal.

¹⁷Onon heeddiɗɗiraaɓe Mo'ab, onon annduɓe innde maari fuu, mboye ndi! Mbi'e: Kayya! Laamu maari cemmbiɗŋgu yewi, maŋngu maari e baawɗe maari njinni!

¹⁸Onon jooɗiiɓe Dibon, njippe joonde mon teddunde e njooɗe nder mbulwuldi! Ngam nattinoowo Mo'ab ukkani on, wili cuuɗi mon cemmbiɗɗi.

¹⁹Onon jooɗiiɓe haa Aro'er, ndare haa laawol, ayne, ƴame daɗɓe dogganɓe fuu ko waɗi.

²⁰Ɓe njaaboto: Lesdi Mo'ab nattinaama! Mboye ndi, ngam ndi toskake! Ngooyne nder waadiwol Arnon no Mo'ab wilaama!

²¹Kiita wari dow berniiji ƴoolde, dow Holon e Yahas e Mofa'at

²²e Dibon e Nebo e Bayti-Dibilatayim

²³e Kiriyatayim e Bayti-Gamul e Bayti-Me'on

²⁴e Keriyot e Bosra e berniiji Mo'ab ɓadiiɗi e daayiiɗi fuu.

²⁵Baawɗe Mo'ab ta'i, semmbe maari majji.” Non Jawmiraawo wi'i.

²⁶Jawmiraawo wi'i: “Nguykine Mo'ab, ngam ɗum mawniti dow am. Mo'ab talloto nder tuure mum, haa yimɓe fuu njala ɗum.

²⁷An Mo'ab, siftor no a jaliri Isra'iila'en. A dimmbi hoore ma dow maɓɓe bana to ɓe naŋngaaɓe caka mooɓre wuyɓe.

²⁸Onon jooɗiiɓe Mo'ab, ngurte berniiji mon. Njooɗe caka tapaaje! Laate bana poola mbaɗanŋga saɓɓo mum haa sera gaaruwol.

²⁹Mo'ab ɗon mawnito masin. Mi nani no yimɓe maari mawnitori, no ɓe njukori, no ɓe ƴaggori, no ɓe ɓurniri ko'e maɓɓe dow yimɓe.

³⁰Min Jawmiraawo mi anndi ƴaggaare maɓɓe. Njuka maɓɓe laati meere, kuuɗe maɓɓe boo ngalaa nafuuda.

³¹Ngam maajum mboyanmi Mo'ab, mi ɗon wooka daliila lesdi Mo'ab fuu, mi ɗon uuma ngam yimɓe Kir-Heeres.

³²Mi woyan yimɓe Sibama ko ɓuri yimɓe Ya'ajer. An berniwol Sibama, a laati bana inabohi ki lice mum njotti gaɗa Weendu Mannda, haa yotto Ya'ajer. Ammaa jonta nattinoowo ukkani ƴaamnde ɓiɓɓe leɗɗe ma e inabooje ma.

³³Seyo e welwelo majji nder lesdi Mo'ab ndimoori. Inaboojam acci ilugo e ɓiɗɗirɗe, walaa ɓiɗɗoowo inabooje, hoolo seyo mum jinni.

³⁴Yimɓe Hesbon e El'ale ɗon mboya, hoolo bojji maɓɓe ɗon yotto Yahas, haa yahugo Co'ar e Horonayim e Egilat-Silisiya. Koo maayel Nimrim boo ɓeeɓi.

³⁵Mi nattinan nder Mo'ab koo moy gulanɗo uurle haa towndiije e lii'antooɗo labbi mum kirseteeɗi.” Non Jawmiraawo wi'i.

³⁶“Ngam maajum ɓernde am ɗon woya dow Mo'ab e yimɓe Kir-Heeres, ɗon sonƴa bana wommbere, ngam ko ɓe paggi fuu, majji.

³⁷Koo moy femmbi hoore mum, laɓi wakkude mum. Ɓe fuu ɓe ƴari juuɗe maɓɓe, ɓe ɓorni limce buhuuje[40].

³⁸Dow soorooji lesdi Mo'ab e babe maari fuu, sey bojji. Ngam mi fusi Mo'ab bana mbulku ngu faalaaka.” Non Jawmiraawo wi'i.

³⁹“Mo'ab nattinaama! Mboye! Lesdi Mo'ab toskake, ndi laati daliila kultoreeŋgol e jancoore ngam ummaatooje taariiɗe ndi.”

⁴⁰Ndaa nii Jawmiraawo wi'i: “Ummaatoore suuyan dow Mo'ab bana dutal ngal weeɗi bileeji mum.

⁴¹Kiriyot nyaamaama, cuuɗi cemmbiɗɗi maɓɓitaama. Nyalaade man honooɓe Mo'ab semmbiɗɓe kulan bana debbo ɓesnanɗo.

⁴²Mo'ab natti, yimɓe ummaatoore maari njinni ngam ɓe mawniti dow am.

⁴³Kultoreeŋgol e ngaska e tuuforgol laatanto on, onon yimɓe Mo'ab.” Non Jawmiraawo wi'i.

⁴⁴“Dogguɗo kultoreeŋgol do'oto nder ngaska. Gurtiiɗo ngaska nastan tuuforgol. Ngam mi taynori hitaande hiitaago Mo'ab.” Non Jawmiraawo wi'i.

⁴⁵“Dogguɓe tampi, ɗaɓɓi hisrude nder berniwol Hesbon. Ammaa yiite jamni nder maagol, ɗemŋgal yiite wurti diga laamorde Sihon, nyaami lesdi Mo'abi'en yiɗɓe haɓre, diga keerol maari haa caka maari.

⁴⁶Bone laatani Mo'ab! Yimɓe sujidanɓe Kemos kalki. Ɓiɓɓe maɓɓe worɓe e rewɓe laati haɓɓaaɓe dahaaɓe.

⁴⁷Ammaa haa timmoode balɗe ngartiranmi Mo'ab bana naane.” Non Jawmiraawo wi'i. Kanjum woni kiita maako dow Mo'ab.