Read Fulfulded Yeremiya 7 Bible Online

Yeremiya 7 - Fulfulded bible

Yeremiya 7

¹Jawmiraawo wolwani Yeremiya, o wi'i:

²“Dara haa dammugal haykaliiru Jawmiraawo, wooynu habaru ni'i: Onon yimɓe Yahuuda nastiranɓe dammuɗe ɗe'e ngam sujidango Jawmiraawo, nane ko Jawmiraawo wi'ata on.

³Ndaa nii Jawmiraawo honooɓe asama, Allah Isra'iila wi'i: Mbo'ine yahdu mooɗon e kuuɗe mooɗon, haa mi acca on on njooɗo haa nokkuure nde'e.

⁴Taa koole bolle fewooɓe wi'anɓe: Ɗum haykaliiru Jawmiraawo, ɗum haykaliiru Jawmiraawo, ɗum haykaliiru Jawmiraawo!

⁵Mbo'ine yahdu mooɗon e kuuɗe mooɗon, mbaɗe kiita ngooŋɗuka hakkunde mooɗon.

⁶Taa ɓille hoɗɓe e atiime'en e rewɓe yurumɓe. Acce mbarugo yimɓe ɓe ngalaa aybe haa ɗo. Taa tokke ɗowanteeɓe woɗɓe, ngam taa on kalka.

⁷Nden kam mi accan on on njooɗo haa ɗo nder lesdi ndi ndokkumi kaakiraaɓe mooɗon haa abada abadin.

⁸Ndaa, on ɗon koolo pewe meere ɗe nafataa.

⁹On ɗon ngujja, on ɗon mbara, on ɗon mbaɗa njeenu, on ɗon kuno pewe, on ɗon ngula uurle ngam Ba'al, on ɗon tokko ɗowanteeɓe ɓe on anndaa.

¹⁰Nden on ɗon ngara yeeso am nder suudu senaandu ngam am, on ɗon mbi'a: Min kisi! Nden on tokkitina waɗugo nyidduɗum ɗu'um fuu!

¹¹Kayya! On tammi suudu senaandu ngam am laati lowol fasooɓe na? Min boo kanjum ngi'mi, non Jawmiraawo wi'i.

¹²Kadi njehe haa Silo, haa nokkuure arannde nde njo'inmi innde am ton. Ndaare ko mbaɗmi nde ngam halleende ummaatoore am Isra'iila.”

¹³Jawmiraawo wi'i: “On ɗon mbaɗa hakkeeji ɗi'i fuu. Koo mi wolwani on tum, on cali nanugo. Nde mi ewni on, on njaabaaki.

¹⁴Ngam maajum, koo to on koolake suudu senaandu ngam am, mi waɗan ndu ko mbaɗmi Silo, non boo nokkuure nde ndokkumi on, onon e kaakiraaɓe mooɗon.

¹⁵Mi wudinan on daayiiɗum bee am bana mi wudiniri banndiraaɓe mooɗon, danygol Efrayim fuu.”

¹⁶“An kam, Yeremiya, taa do'ana yimɓe ummaatoore nde'e, taa ɓaŋgtu do'a e taa tora ngam maɓɓe, ngam mi nanantaa ma.

¹⁷A yi'ataa ko ɓe mbaɗata nder gure Yahuuda e dow laabi Urusaliima na?

¹⁸Ɓikkoy ɗon teena leɗɗe, baabiraaɓe maakoy ɗon kuɓɓa yiite, rewɓe boo ɗon njiiɓa kuroori haa ɓe tamsa tamseeje ngam lawru rewru ndu ɓe ewnata Mayramjo asama. Ɓe ɗon ndufa njaramji dufeteeɗi ngam labbi feere haa ɓe mettinammi ɓernde.

¹⁹Min ɓe mettinta ɓernde na? Kay, ɓe ɗon mettina ko'e maɓɓe, ɓe ɗon toskina ko'e maɓɓe.

²⁰Ngam maajum, ndaa Jawmiraawo wi'i: Mi rufan tikkere am saatunde dow nokkuure nde'e. Mi rufan nde dow yimɓe e dabbaaji, dow leɗɗe e nafuuda gese fuu. Tikkere am wulan bana yiite, nyifataako.

²¹Ɓesde kirseteeɗi mooɗon, guleteeɗi mooɗon, nyaame kusel maaji.” Non Jawmiraawo honooɓe asama, Allah Isra'iila wi'i.

²²“Saa'i mi wurtini kaakiraaɓe mooɗon lesdi Misra, mi umraay ɓe haala guleteeɗi e kirseteeɗi.

²³Ammaa mi umri ɓe ɓe ɗowtano yam, haa mi laato Allah maɓɓe, kamɓe boo ɓe laato ummaatoore am. Mi umri ɓe boo ɓe tokko laawol ngol umrumi ɓe tokkaago fuu, haa ɓe keɓa hayru.

²⁴Ammaa ɓe ɗowtaaki, ɓe kakkilaay. Ndaa ko ɓe mbaɗi: Ɓe tokki nufayeeje ɓerɗe maɓɓe caatuɗe, kalluɗe. Ɓe ngaylitani yam ɓaawe maɓɓe, naa geese maɓɓe.

²⁵Diga kaakiraaɓe mooɗon ngurti Misra haa wargo hannde, mi tokki nelugo nde weeti fuu annabi'en sukaaɓe am fuu haa maɓɓe.

²⁶Ammaa on nanaay, on kakkilaay. Ko'e mooɗon caati, on mbaɗi kalluɗum ko tulli kaakiraaɓe mooɗon.

²⁷An boo, Yeremiya, to a wolwani ɓe bolle ɗe'e fuu, ɓe nanantaa ma. To a ewnake ɓe, ɓe njaabataako.

²⁸Yeccu ɓe ɓe laati ummaatoore nde ɗowtantaako Jawmiraawo Allah muuɗum, nde jaɓataa elto boo. Gooŋgaaku majji, ɓe acci koo numugo ngu boo.”

²⁹Onon yimɓe Urusaliima, laɓe ko'e mooɗon, ngudine gaasa mooɗon! Ngime yimre boyki dow towndiije cooke, ngam min Jawmiraawo mi wudini yidere umminiinde tikkere am.

³⁰Jawmiraawo wi'i: “Yimɓe Yahuuda mbaɗi kalluɗum yeeso am, ɓe njo'ini labbi maɓɓe nyidduɗi nder suudu senaandu ngam am, ɓe coɓni ndu.

³¹Nder waadiwol Ɓii-Hinnom ɓe mahi hirsirde wi'eteende Tofet ngam wulugo ɓiɓɓe maɓɓe worɓe e rewɓe bana kirseteeɗi. Min mi umraay ɓe waɗugo ɗum, mi meeɗaay koo numugo ɗum.

³²Jawmiraawo wi'i: Fakat, saa'i waran nde ɓe ewnataako ɗum Tofet malla Waadiwol Ɓii-Hinnom, ammaa Waadiwol kirsol. Ngam ɓe uwan maayɓe haa Tofet ngam sooynde babal.

³³Ɓalli yimɓe ummaatoore nde'e laatoto nyaamdu colli e dabbaaji ladde, walaa mo riiwata ɗi.

³⁴Lesdi laatoto ladde meere, mi je'inan gimi seyo e hoolo welwelo e daande ɓaŋɗo e daande ɓaŋgeteeɗo nder gure Yahuuda, non boo dow laabi Urusaliima.”