Read Fulfulded Gimi Boyki 5 Bible Online

Gimi Boyki 5 - Fulfulded bible

Gimi Boyki 5

¹Yaa Jawmiraawo, siftor ko waɗi min. Laar min, ngi'a toskaare amin.

²Maral amin laatani jananɓe, ɓe ɗon njooɗi nder cuuɗi amin.

³Min laati atiime'en, daadiraaɓe amin laati yurumɓe.

⁴Doole min cooda ndiyam ɗam min ngiɗi yarugo, non boo leɗɗe ɗe min kuɓɓirta yiite.

⁵Kaɓɓirgal ngal taasnuɓe min njowani min ɗon teddana daaɗe amin, min comi, ammaa dabare siwtaare walaa.

⁶Min ndooki haa Misra e Assuura, haa min keɓa nyaamdu, min kaara.

⁷Kaakiraaɓe amin mbaɗi hakke, maayi, ammaa kiita hakkeeji maɓɓe yowanake min.

⁸Maccuɓe ɗon laamano min, walaa kisnanɗo min juuɗe maɓɓe.

⁹Mbarooɓe ɗon haa gese, ngiɗi mbarugo min to min ɗon ɗaɓɓita nyaamdu ton.

¹⁰Ɓalli amin ɗon ngula bana kaatane daliila weelo.

¹¹Konne'en toskini rewɓe amin nder Siyona, non boo faanyɓe rewɓe amin nder gure Yahuuda fuu.

¹²Ɓe ɓili mawɓe amin dow leɗɗe, ndotti'en amin laati yawniiɓe.

¹³Suka'en ndoondi kaa'e namirɗe, derke'en ɗon ndo'o les ba'e leɗɗe.

¹⁴Ndotti'en acci jooɗaago haa dammuɗe berniwol, suka'en acci yimugo.

¹⁵Seyo ɓerɗe amin jinni, gamarle amin laati bojji.

¹⁶Ko min mantori fuu, majji. Bone laatanake min! Ngam min mbaɗi hakke!

¹⁷Ɓerɗe amin nyawi, gite amin purɗi,

¹⁸ngam hooseere Siyona ferwi, laati ladde, doldolɗe ɗon pija nder bille maare.

¹⁹Ammaa an, yaa Jawmiraawo, a duumiiɗo, leeso laamu ma ɗon tabiti haa foroy!

²⁰Ngam ɗume a yejjiti min haa foroy? Ngam ɗume a wudini min balɗe ngeendam amin fuu?

²¹Lortin min haa maaɗa, yaa Jawmiraawo, nden min lortoto fakat! Wartir koo ɗume fuu bana naane!

²²Malla a wudini min haa foroy na? Tikkere maaɗa walaa keerol na?