Read Fulfulded Bataakewol Yeremiya 1 Bible Online

Bataakewol Yeremiya 1 - Fulfulded bible

Bataakewol Yeremiya 1

¹On laati aybuɓe heedi Allah. Kanjum waɗi laamiiɗo Nabukodonosor mo lesdi Baabila naŋngi on, yahri on haa Baabila.

²To on njottake ton, on neeɓoyan duuɓi ɗuuɗɗi haa yotto gide joweeɗiɗi. “Ammaa, ɓaawo wakkati maajum, Jawmiraawo wi'i, o wurtinan on jam.”

³Paame jonta on tammi laargo haa lesdi Baabila ɗowanteeɓe waɗaaɓe bee leɗɗe, bee kaŋŋeeri malla bee ceede. Ɓe ɗon ndoondi ɓe dow balbe to ɓe ɗon njaha mooɓtirde, ɓe kulna ummaatooje.

⁴Kakkile taa laatooɗon bana hoɗɓe ɓe'e. Kakkile, taa diina maɓɓe esta on.

⁵To on ngi'i ummaatoore nde'e ɗon sujida haa meema lesdi ɓaawo e yeeso labbi ɗi'i, mbi'e nder ɓerɗe mon: “Jawmiraawo, an tan he'i sujidaneego.”

⁶Ngam Jawmiraawo ɗon wi'a: “Malaa'ikaajo ɗon wondi bee mooɗon, o hisnan on.”

⁷Ɗum cehoowo sehi labbi ɗi'i. No ɗi pawnira bee kaŋŋeeri malla ceede fuu, ɗi nafataa sam e ɗi mbaawataa wolwugo.

⁸Haa maaji, yimɓe ɗon koocira kaŋŋeeri bana pawne haa paanyo debbo e bee kaŋŋeeri man, ɓe ɗon ngaɗana ɗi meetalol.

⁹Ndego, liman'en suklaniiɓe labbi man kooca kaŋŋeeri e ceede jo'inaaɗum ngam labbi man, ɓe kuuwtinira ngam haaje maɓɓe malla ɓe caaho ɗum ajaba'en.

¹⁰Labbi leɗɗe pawnaaɗi bee cardi e ceede, ɓe ɗon ɓorna ɗi bana to ɗum yimɓe!

¹¹Ammaa ɗi mbaawataa haɓtaago e puunndi e mooƴu. To ɓe ɓorni ɗi limce caɗɗe,

¹²sey ɓe piɗɗa collaaje haykaliiru takkotooɗe dow geese maaji.

¹³Bana mo dawranta lesdi ndi'i, ɗi ɗon njogi sawru laamu, ammaa ɗi mbaawataa boo mbargo toonyiiɗo ɗi.

¹⁴Goɗɗi caka maaji ɗon njogi laɓi malla fe'irde haa juŋngo maaji, ammaa ɗi mbaawataa haɓtaago to sooje'en malla to wuyɓe kippi ɗi. Naa ɗum ɗowanteeɓe, ngam maajum taa kule ɗi.

¹⁵Labbi ɗi yimɓe njo'ini nder haykaliiru nafataa bana taasaaje pusaaɗe.

¹⁶Gite maaji ɗon cuddi bee collaaje ɗe nastooɓe umminta bee kosɗe mum'en to ɓe ɗon ngiilo.

¹⁷To goɗɗo toonyake laamiiɗo, ɓe naŋnga ɗum ɓe kiito ɗum kiita mbareeki. Liman'en boo ɗon ngaɗa bana non ngam faddaago taa wuyɓe ngujja labbi ɗi'i, ɓe ɗon cemmbiɗina dammuɗe cuuɗi maaji bee paaɓi e kalji.

¹⁸Ɓe ɗon kuɓɓa pittirlaaji boo ko ɓuri haaje maɓɓe kamɓe, ammaa labbi man ndaarataa ko ngoota.

¹⁹Ɗi ɗon nanndi bee daŋraŋge nder haykaliiru maɓɓe, nder mum fuu nyoli. Gilɗi lesdi ɗon nyaama ɗi bana nyaamirta limce maaji, ammaa kanji kam ɗi kaanjitittaako.

²⁰Yeeso maaji fuu ɓalwi bee ɓalineeri cuurka ngonka nder haykaliiru.

²¹Bilwili, collon zawleeji e colli goɗɗi ɗon njooɗo dow ɓanndu maaji malla dow hoore maaji, non boo paatuuji ndego.

²²kanjum anndinta on ɗi laataaki ɗowanteeɓe. Ngam maajum taa kule ɗi.

²³E kaŋŋeeri ndi ɓe takki dow maaji ngam ŋarnugo ɗi, to ɓe piɗɗaay ndi, to ndi furɗi, ɗi mbaawataa aynugo ɗelko maaji. Yaake nde ɓe ɓolina ɗi, ɗi anndaa fuu!

²⁴Ɓe njoɓani ɗi caɗɗum, ammaa ɗi ngalaa yoŋki.

²⁵Nde ɗi mbaawataa yahgo, sey ɓe ndoondo ɗi dow balbe. Kanjum hollata ɗi ngalaa saman. Kanjum boo he'i semtingo suklaniiɓe ɗi.

²⁶To wooru caka labbi man do'ake, sey ɓe ummina ndu. To ɓe ndarni ndu, ndu waawataa yahgo bee hoore maaru. To ndu wuurake, ndu waawataa dartaago. Ammaa ɓe ɗon ngaddana maayɓe dokke ɗe ɓe lii'anto labbi ɗi'i!

²⁷Fahin boo kirseteeɗi ɗi liman'en ngaddanta ɗi, ɓe coorrita ɗi ngam hoore maɓɓe. Malla boo rewɓe liman'en man ngaɗan jorŋgel dow hokkugo laafuɓe e wuustuɓe.

²⁸Koo rewɓe ɓe cenaaki ngam ɓe ɗon mari al'aada maɓɓe malla ngam ɓe ɓesni ɗon meema ɗi. Bee misaaluuji ɗi'i paame naa ɗum ɗowanteeɓe e taa teddine ɗi.

²⁹Noy ɓe ewnorto kuuje gadaaɗe bee leɗɗe, kaŋŋeeri malla cardi ɗowanteeɓe, alhaali boo ɗum rewɓe lii'anto ɓe dokke?

³⁰Haa nokkuuje ɓe ndewata labbi ɗi'i, liman'en man ɗon njooɗi bana haa maayiti, limce ɗon ceeki, gaasa e wakkude ɗon laɓi, hoore suddaaki.

³¹Ɓe ɗon ciika bana dabbaaji ladde yeeso labbi ɗi'i bana to ɓe ɗon haa yeeso nyaamdu maayiti.

³²Sakkomaa liman'en ɗon ɓorta limce labbi ɗi ngam ɓe ɓorna rewɓe e ɓikkoy maɓɓe.

³³Fahin boo to a waɗani labbi man kalluɗum malla booɗɗum, kanji kam ɗi mbaawataa waataago bana ɗi mbaawataa hokkugo malla ittango laamiiɗo sumsum.

³⁴Non boo ɗi mbaawataa hokkugo goɗɗo ceede ngam o riska. E to a haɓɓi alkawal bee maaji bee togayeere, koo to a hiɓɓinaay togayeere man, labbi man mbaawataa ƴamtugo.

³⁵Ɗi mbaawataa hisnugo koo moy diga juuɗe maayde malla maa teetingo mo walla semmbe haa juuɗe ɓurɗo ɗum.

³⁶Ɗi ngalaa baawɗe wumtingo malla wurtingo goɗɗo diga ɓillaare,

³⁷ɗi njurmintaa debbo jurumɗo, ɗi mboonantaa atiimeejo.

³⁸Kuuje leɗɗe cuddaaɗe bee kaŋŋeeri malla ceede, saman mum'en fotan bee tapaaje ittaaɗe haa hooseere. Toskaare woodani suklaniiɓe ɗi!

³⁹Moy foti foondugo ɗi bee ɗowanteeɓe?

⁴⁰Woodi ko ɓurata ɗu'um: Yimɓe Baabila maa ɗon cemtina ɗi. To ɓe ngi'i paho, ɓe njahra mo haa lawru maɓɓe Beel, ɓe toro ndu hokkita paho hunnduko mum bana to Beel man ɗon faama!

⁴¹Ammaa ɓe mbaawataa numgo ndikka ɓe acca labbi ɗi. Kanjum woni faataare maɓɓe.

⁴²Rewɓe boo ɗon ngaɗa kanndawol bee ɓoggol e ɓe ɗon njaha dow laawol ngam wulgo dumo.

⁴³To goɗɗo caalotooɗo noddi gooto caka maɓɓe e waaldi bee maako, kaŋko go, o toskina keeddu maako ngam walaa goɗɗo tefi mo, walaa piistuɗo kanndawol maako.

⁴⁴Ko laarani labbi ɗi'i fuu, ɗum fewre. E noy innu numata ɗum ɗowanteeɓe?

⁴⁵Ɗum sehooɓe e tappooɓe jawe ngaɗi ɗi. E ɗi ɗon bana no sehooɓe ɓe'e ngiɗi ɗi laato: Kuuje tan, naa huunde feere.

⁴⁶Tappuɓe ɗi man maa ngeeɗataa haa ɓura yimɓe luttuɓe.

⁴⁷Noy kuuje cehaaɗe laatorto ɗowanteeɓe? Yimɓe ɓe'e ɗon ɗalana waranɓe ɓaawo maɓɓe miiluuji cemtuɗi.

⁴⁸To konu malla masiibo tiitake labbi ɗi'i, liman'en ngaɗan sawari ngam anndugo toy ɓe cuuɗoto bee maaji fuu.

⁴⁹Labbi ɗi'i kam mbaawataa daɗnugo ko'e maaji to konu fuɗɗi malla masiibo waɗi. E ko waɗi en paamataa ɗi laataaki ɗowanteeɓe?

⁵⁰Kanjum waŋginta leɗɗe pawnaaɗe bee cardi malla bee ceede, ɗum fewre meere. Ummaatooje e laamiiɓe paaman ɗi laataaki ɗowanteeɓe, ammaa ɗum kuuje ɗe yimɓe cehi e haa maaje walaa ko nanndi bee Allah.

⁵¹Ɗum laaɓi, naa ɗum ɗowanteeɓe. E moy saloto anndititgo ɗum?

⁵²Ɗi mbaawataa tabitingo laamiiɗo dow lesdi mum e ɗi mbaawataa toɓnugo ndiyam ngam yimɓe.

⁵³Ɗi mbaawataa ta'ugo kiita dow kuuje maɓɓe malla hisnugo kiitaaɗo bee faasikaare. Ɗi mbaawataa koo ɗume

⁵⁴bana colli piiranɗi hakkunde asama e lesdi. To nokkuure rewgo labbi pawnaaɗi bee kaŋŋeeri ɗon wula, liman'en maaji ndogga, cuuɗo, ammaa kanji kam ɗi ndillataa, ɗi ngula bana daŋraŋge suudu.

⁵⁵To laamiiɗo konneejo hippake ɗi bee mooɓe mum, ɗi ngalaa dabare haɓtaago.

⁵⁶E noy njaɓreten malla tammotooɗen ɗum ɗowanteeɓe? Labbi pawnaaɗi bee kaŋŋeeri e ceede mbaawataa hisugo wuyɓe.

⁵⁷To wuyɓe man naŋngi ɗi, luuwi kaŋŋeeri e ceede malla limce ɗe ɓe cuddiri ɗi, to ɓe ndilli bee ko ɓe kooci, labbi ɗi'i kam mbaawataa haɓtaago.

⁵⁸Laamiiɗo laatiiɗo cuusɗo malla kuuwruɗum nafanɗum jawmum, ɗum fuu ɗum ɓuran labbi laatiiɗi pewe meere ɗi'i. Dammugal kisnanŋgal ko woni nder saare malla daŋraŋgal haa saare laamu ɓuran labbi laatiiɗi pewe meere ɗi'i.

⁵⁹Naaŋge, lewru e koode fuu ɗon ndokka njayawri e ɗon mari nafuuda haa ko ɗum halfina.

⁶⁰Ma'ere kayre boo, to ma'i, ɗum wooɗi laareego, non boo henndu, to fuufi koo toy fuu.

⁶¹E non boo duule: To Allah umri ɗe, ɗe kuuɓidina lesdi, ɗe ɗon kuuwa ko Allah wi'i ɗe fuu.

⁶²Felmaaŋgo ngo Allah nulata diga dow ngam wulgo kooseeje e ladde, kaŋgo boo ɗon huuwa umroore nde Allah umri ngo. Ammaa tafol ngol ɓe ndokki labbi ɗi'i maraay ŋarol malla semmbe kuuje ɗe'e.

⁶³En potaay wi'go malla nanndingo ɗi bee ɗowanteeɓe, ngam ɗi mbaawataa hisnugo malla woonango ɓii Aadamaajo.

⁶⁴Paame ɗi laataaki ɗowanteeɓe, taa kule ɗi koo seɗɗa.

⁶⁵Ɗi mbaawataa naalugo malla barkiɗingo laamiiɓe

⁶⁶malla hollugo ummaatooje kaayeefiiji nder asama malla yaynugo bana naaŋge malla bana lewru.

⁶⁷Koo dabbaaji ladde maa ɓuran ɗi daraja, ngam kanji, ɗi ɗon mari baawɗe doggugo ngam ɗi cuuɗo, ɗi kisna ko'e maaji!

⁶⁸Walaa ko hollata en ɗum ɗowanteeɓe! Taa ndokke ɗi daraja koo seɗɗa.

⁶⁹Haa ngesa kurci, kulnirga colli walaa ko aynata. Non boo labbi ɗi yimɓe pawni bee kaŋŋeeri e ceede.

⁷⁰En poti foondugo labbi ɗi'i bee wumre gi'e nder ngesa, sonndu koo nduyeeru wara jooɗo dow maaru malla bana maayɗo cakkinaaɗo nder nyiɓre nder yenaande.

⁷¹Wakkati to on ndaari limce maaji caɗɗi ɗon timma, ngarta tekke, on paaman ɗi laataaki ɗowanteeɓe. Kanji maa gilɗi tammi nyaamgo ɗi, ɗi cemtinte haa lesdi maaji.

⁷²Goɗɗo mo walaa lawru, ɗowtaniiɗo Allah, ɓuran labbi ɗi'i ngam kaŋko o hisan toskineego.