Read Fulfulded Baruk 1 Bible Online

Baruk 1 - Fulfulded bible

Baruk 1

¹Ndaa deftere nde Baruk ɓii Neriya, ɓii Masiya ɓii Sedesiya ɓii Hasadiya ɓii Hilkiya winndi haa Baabila.

²O winndi nde nder hitaande jowaɓre diga Baabila'en kippi e nguli Urusaliima, nyannde joweeɗiɗawre nder lewru jowaɓru.

³Baruk jaŋngi deftere nde'e yeeso Yekoniya ɓii Yowakim laamiiɗo Yahuuda e yeeso mooɓre warnde nango jaŋgde maajum.

⁴Jooɗiiɓe Baabila haa fomoonde maayo Sudi ngari fuu: Ministir'en, yerima'en laamiiɗo, baaba ci'e'en e yimɓe fuu diga pamaro haa mawɗo.

⁵Ɓe ɗonno mboya, ɓe ɗonno cuumo, ɓe ɗonno toro yeeso Jawmiraawo.

⁶Nden ɓe ngaɗi dokkal, koo moy fuu hokki ko waawi.

⁷Ɓe neldi dokkal man haa Urusaliima ngam limanjo Yowakim ɓii Hilkiya ɓii Salum e ngam liman'en woɗɓe e jama'aare wonnde bee maako haa Urusaliima.

⁸Diga nyannde sappo nder lewru Sivan, Baruk hooci paali ɗi ɓe koocuno nder haykaliiru Jawmiraawo, o yiɗi neldugo ɗi lesdi Yahuuda. Sedesiya ɓii Yusiya e laamiiɗo Yahuuda mbaɗno ɗi

⁹ɓaawo Nabukodonosor laamiiɗo Baabila dahno Yekoniya, mawɓe faada, gudi'en, ministir'en e jama'aare lesdi, yahri ɓe fuu Baabila.

¹⁰Egginaaɓe neldani yimɓe Urusaliima nelal nga'al: Min neldani on ceede ngam on cooda alud bee dabbaaji kirseteeɗi e guleteeɗi ngam yaafuye hakkeeji. On lii'ana Jawmiraawo kirsaaɗi e dokke.

¹¹Tore boo ngam Nabukodonosor laamiiɗo Baabila e ngam ɓiɗɗo mum Baltazar. Tore Allah haa faɓɓina ɓe bana asama dow lesdi.

¹²Ngaɗe ɗum haa Jawmiraawo hokka min semmbe, hokkita min seyo, haa min ngeeɗa haa aynuki Nabukodonosor laamiiɗo Baabila e ɓiɗɗo mum Baltazar, haa min kuuwana ɓe duuɓi ɗuuɗɗi e haa min keɓa mo'ere.

¹³Tore boo Jawmiraawo Allah meeɗen ngam amin, ngam min ngaɗi aybe dow maako e haa jonta o ittaay tikkere maako saatunde dow amin.

¹⁴Min neldan on deftere nde'e haa njaŋngon nde yeeso yimɓe fuu nder Haykaliiru yaake juulde bukkaaji malla nder wakkati feere nde fottani on.

¹⁵Ndaa ko mbi'oton: “Walaa ko min pelirta Jawmiraawo Allah meeɗen, ngam o adiliijo, ammaa enen en ɗon nder semteende, enen Yahuudu'en e jooɗiiɓe haa Urusaliima

¹⁶e laamiiɓe meeɗen, mawɓe faada meeɗen, liman'en meeɗen e kaakiraaɓe meeɗen.

¹⁷Gooŋga, en ngaɗi aybe yeeso Allah.

¹⁸En tuurti dow maako, en nanaay wolde Jawmiraawo Allah meeɗen yaake o wi'no en en tokko umrooje ɗe o hokki en.

¹⁹Diga nyalaade nde o wurtini kaakiraaɓe meeɗen diga Misra haa wargo hannde, en ɗowtanaaki Jawmiraawo, Allah meeɗen, en nanaay ko o wi'i.

²⁰Ngam maajum bana en ndaari hannde, masiibo ɗon tokki en, non boo naaloore nde Jawmiraawo barri en bee hunnduko Muusa jaggiiɗo mum nyannde nde o wurtini kaakiraaɓe meeɗen diga Misra haa o hokka ɓe lesdi keewndi kosam e njumri.

²¹O neli annabi'en ammaa en nanaay ko o wi'i en bee hunnduko maɓɓe.

²²Ammaa koo moy caka meeɗen fuu tokki numooji ɓernde muuɗum, rewi ɗowanteeɓe woɗɓe, waɗi kalluɗum yeeso Jawmiraawo Allah meeɗen.”