Read Fulfulded Baruk 2 Bible Online

Baruk 2 - Fulfulded bible

Baruk 2

¹Nden Jawmiraawo waɗi ko o wi'i dow meeɗen, dow alkaali'en, hiitooɓe nder lesdi Isra'iila, dow laamiiɓe, mawɓe faada meeɗen, dow yimɓe Isra'iila e Yahuuda fuu.

²O ukki masiibooji mawɗi dow Urusaliima, o meeɗaay ukkugo ɗuuɗɗi bana nii les asama fodde ko winnda boo nder Tawreeta Muusa,

³haa ɓe njotti nyaamgo kusel ɓiɓɓe maɓɓe worɓe e rewɓe.

⁴Nden o hokki ɓe haa juuɗe laamiiɓe taariiɓe ɓe fuu, haa ummaatooje haa Allah saŋkiti ɓe kuɗa ɓe e toskina ɓe.

⁵Dow en laato jaaliiɓe, en laati jaalaaɓe ngam en mbaɗi hakke dow Jawmiraawo, en nanaay ko o wi'i en.

⁶Allah Jawmiraawo meeɗen o adiliijo, ammaa enen bee kaakiraaɓe meeɗen, en ɗon nder semteende hannde.

⁷Jawmiraawo barrino en bee irin sarruuji feere feere, ammaa jonta ɗi ukkani en.

⁸En toraaki mo haa o waylita numooji meeɗen kalluɗi.

⁹Nden Jawmiraawo taaskitini sarruuji ɗi'i, o ukki ɗi dow meeɗen. Gooŋga, Allah o adiliijo nder kuuɗe o umri en fuu.

¹⁰Ammaa en nananaay mo, yaake o wi'no en en tokko umrooje ɗe o hokki en.

¹¹Jawmiraawo, Allah Isra'iila, a wurtini ummaatoore maaɗa diga lesdi Misra bee semmbe ma mawɗo e baawal ma maŋngal e bee alaamaaji e kaayeefiiji ma ɗuuɗɗi. A holli moy a woni bana min ndaari hannde boo. Jonta

¹²min annditi min ngaɗi aybe, min ɗowtanaaki umrooje ma fuu.

¹³Min ɗuuɗaay caka ummaatooje goɗɗe haa a saŋkiti min. Useni, waylitit tikkere ma.

¹⁴Nan, Jawmiraawo tornde amin, useni hisnu min ngam yiide ma, waɗ no dahɓe min mboonana min.

¹⁵Nden duniyaaru fuu anndan an woni Jawmiraawo, Allah amin e minin boo min lenyol Isra'iila, ummaatoore ma senaande.

¹⁶Jawmiraawo, diga joonde ma, laar min e hakkilan min, heɗita, nan min,

¹⁷maɓɓitit gite ma, laar. Gooŋga, maayɓe wonɓe haa joonde maayɓe, ɓen ɓe poofɗe maɓɓe timmi mbaawataa anndititgo tedduŋgal ma e adilaaku ma, yaa Jawmiraawo.

¹⁸Ammaa mo annditan tedduŋgal ma e adilaaku ma, ɗum goɗɗo cuniiɗo jamum, jahoowo turturnde, tampuɗo, marɗo gite cakliiɗe, beelaaɗo.

¹⁹Nden to min ngari yeeso maaɗa bee tornde amin, Jawmiraawo, Allah amin, naa adilaaku kaakiraaɓe e laamiiɓe amin min ɓarri.

²⁰Ngam dow amin a waŋgini tikkere ma hulniinde bana mbi'noɗa nder bolle annabi'en jagganiiɓe ma:

²¹Ndaa ko Jawmiraawo wi'i: “Ture, jaggane laamiiɗo Baabila, nden on njooɗoto nder lesdi ndokkaandi kaakiraaɓe mooɗon.

²²Ammaa to on nanaay sawtu Jawmiraawo e on cali leestanaago laamiiɗo Baabila,

²³mi je'inan gimi seyo, gookaali seyo e gimol te'ruɓe hesɓe nder berniwol Yahuuda e Urusaliima, lesdi fuu sirwoto bana to walaa jooɗiiɓe ton.”

²⁴Ammaa min nanaay yaake a wi'i min min leestana laamiiɗo Baabila. Nden a hiɓɓi barruye nde mbi'noɗa jaggiiɓe ma annabi'en, waato ɓe ngurtinan i'e laamiiɓe e kaakiraaɓe amin diga nder genaale muuɗum'en.

²⁵Laamiiɓe e kaakiraaɓe amin maayi nder boneeji kulniiɗi, ɓe weelaaɓe, nattinaaɓe, dahaaɓe. Ndaa i'e maɓɓe jonta, saŋkitaaɗe haa gulɗum naaŋge e jaaŋgol jemma.

²⁶A nattini hannde haykaliiru senaandu ma ngam aybe ummaatooje Isra'iila e Yahuuda.

²⁷Ammaa, Jawmiraawo Allah amin, a enɗi min, a woonani min

²⁸bana mbi'noɗa jaggiiɗo ma Muusa nyalaade nde a umri mo o winnda Tawreeta yeeso ɓiɓɓe Isra'iila, a wi'no:

²⁹“To on nanataa ko mbi'anmi, ummaatoore mooɗon mawnde hannde tammi laataago famarde e saŋkitiinde caka ummaatooje goɗɗe.

³⁰Mi anndi, on nanantaakam, ngam on jama'aare saata-ko'e'en. Ammaa nder lesdi daheeki mon, on tuuban.

³¹On annditan, min woni Jawmiraawo Allah mooɗon. Nden mi hokkan on ɓernde hakkilnde e noppi nananɗi.

³²Nder daheeki mon, on maŋgtatam, on ciftoran innde am.

³³On ciftoran laawol kaakiraaɓe mon e aybe maɓɓe, on accan nanaru e kalluɗi mooɗon.

³⁴Nden mi hooran on nder lesdi kunaniimi hoorugo kaakiraaɓe mooɗon Ibrahiima, Isiyaaku e Yaakubu, on maran ndi. On ustataa ammaa mi ɗuɗɗinan on.

³⁵Mi haɓɓan alkawal duumiiŋgal bee mooɗon, mi laatoto Allah mooɗon, onon boo on laatoto ummaatoore am. Mi meetataa wurtingo ummaatoore am Isra'iila diga lesdi ndi ndokkumoomi.”