Read Fulfulded Baruk 3 Bible Online

Baruk 3 - Fulfulded bible

Baruk 3

¹“Jawmiraawo honooɓe asama, Allah Isra'iila, ɓernde amin ta'i, min tampi ammaa min ɗon mbookana ma.

²Jawmiraawo nan min, yurmin min, ngam min mbaɗi aybe yeeso ma.

³An a ɗon laami haa abada, minin kam min ɗon maata min halkuɓe haa foroy.

⁴Jawmiraawo honooɓe asama, Allah Isra'iila, nan tornde amin, minin min ɓuraay maayɓe Isra'iila, minin min ɓiɓɓe waɗooɓe aybe yeeso maaɗa, ɓe nanaay sawtu Jawmiraawo, Allah maɓɓe. Nden bone takkani min.

⁵Taa siftor aybe kaakiraaɓe amin, ammaa hannde siftor baawɗe ma e innde ma.

⁶An Jawmiraawo, Allah amin, min ngiman maŋgtooje maaɗa, yaa Jawmiraawo

⁷ngam maajum a hebbini ɓerɗe amin bee kulol ma haa min tore. Nder daheeki amin, min ngiman maŋgtooje ma ngam min ndaayni ɓerɗe amin diga halleende kaakiraaɓe amin aybuɓe yeeso ma.

⁸Ndaa hannde min dahaaɓe haa a saŋkiti min ngam ɓe kuɗa min, ɓe naala min. A hiiti min ngam aybe kaakiraaɓe amin, fiistuɓe alkawal maaɗa Jawmiraawo, Allah amin.”

⁹Nane, onon Isra'iila'en, umrooje ngeendam, acce ɗe nasta nder noppi mon haa on ekkito laataago hakkilɓe.

¹⁰Ɗume waɗi on, onon Isra'iila'en, on ɗon njooɗi nder lesdi konne'en, on ɗon naywa nder lesdi njananndi?

¹¹On ɗon coɓa bee maayɓe on limaaɓe caka maayɓe?

¹²Ngam on ngudini seeɓoore hikma.

¹³To on tokkino laawol Allah on njooɗotono jam.

¹⁴Ekkite toy neɗɗo heɓata hikma, semmbe, hakkiilo haa anndon boo haa juutal balɗe e haa yeeso seyiiŋgo e jam ngoni.

¹⁵Moy heɓti haa Hikma woni? Moy nasti nder ndesaaje maaka?

¹⁶Toy laamiiɓe ummaatooje? Toy eltooɓe dabbaaji ladde?

¹⁷Toy fijirooɓe colli? Toy sigooɓe cardi e kaŋŋeeri ɓe risku maɓɓe jinnataa, ɓe ɓiɓɓe Aadama kooli?

¹⁸Toy tappuɓe ceede bee tiinaare e suklanooɓe ɗe ammaa diidi kuuɗe maɓɓe ngalaa?

¹⁹Ɓe majji, ɓe maayi, ɓe ndilli joonde maayɓe, yimɓe feere ummi pellel maɓɓe.

²⁰Yimɓe ɓurɓe ɓe nderkaaku ndanyaama, ɓe njooɗi nder duniyaaru ammaa ɓe anndaa laawol jahranŋgol haa Hikma,

²¹ɓe paamaay laabi maaka, ɓe kakkilanaay Hikma sam. Ɓikkoy maɓɓe tokkaaki laawol ngol baabiraaɓe maɓɓe tokkino.

²²Ɓe meeɗaay nango Hikma haa Kanaana, ɓe meeɗaay laargo ka haa Teman.

²³Koo danygol Hagara tefŋgol ka nder duniyaaru, filooɓe Mediyan e Teman, taalooɓe e hikma'en anndaa laawol Hikma, ɓe ciftoraay laabi maaka.

²⁴Yaa Isra'iila! Fakat duniyaaru e asama, suudu Allah mawndu, maral maako

²⁵maŋngal, ngal walaa keerol, towŋgal haa ɓe mbaawataa foondugo ngal.

²⁶Haa ton maapinndi'en ndanyaama, yimɓe tedduɓe ɓooyma, marɓe darnde e honooɓe suusɓe.

²⁷Ammaa naa kamɓe Allah suɓi, o tinndinaay ɓe laawol Hikma.

²⁸Ɓe maayi daliila sooynde hakkiilo, ɓe majji nder ginnaaku maɓɓe.

²⁹Moy eeŋgi haa asamanji ngam hoocugo Hikma e jippingo ka diga duule?

³⁰Moy eeri mbeela ngam ɗaɓɓitoygo ka e soodi ka bee coggu kaŋŋeeri?

³¹Walaa goɗɗo anndi laawol maaka, walaa goɗɗo hakkilani laawol maaka.

³²Ammaa annduɗo kuuje fuu anndi Hikma. Daliila hakkiilo maako, o tawi ka. o taaskitini duniyaaru diga foroy o jo'ini dabbaaji nder maaru.

³³O neldi annoora, ka dilli, o ewni ka fahin, ka ɗowtani mo bee kulol.

³⁴Koode njalbiti haa pelle maaje bee seyo.

³⁵Allah ewni ɗe, ɗe njaabi: “Min ɗon” Horre fuu ɗon jalbita bee seyo ngam Tagɗo nde.

³⁶Tagoowo oo, ɗum Allah meeɗen, walaa potanɗo bee maako.

³⁷O heɓti laawol jahranŋgol haa Hikma fuu, o holli ngol ummaatoore Yaakubu, jaggiiɗo maako, ummaatoore Isra'iila, giɗaaɗo maako.

³⁸Diga yaake maajum, ɓe ɗon ndaara ka, ka ɗon jooɗo boo caka ɓiɓɓe Aadama.