Read Fulfulded Baruk 4 Bible Online

Baruk 4 - Fulfulded bible

Baruk 4

¹Hikma, ɗum deftere umrooje Allah, ɗum Tawreeta nduumiika. Koo moy jogi ka heɓan ngeendam, koo moy acci ka heɓan maayde.

²Tuube, yimɓe Yaakubu, naŋnge ka, bee maaka njehe haa annoora maaka!

³Taa ndokke yimɓe feere tedduŋgal mon, taa accane ummaatoore janannde barkaaji mon.

⁴Enen Isra'iila'en, en barkiɗinaaɓe ngam en anndi fakat ko fottanta Allah.

⁵Tiɗɗine ɓerɗe mon, onon yimɓe jama'aare am, onon sigooɓe ciftorki Isra'iila.

⁶Ɓe coorri on ummaatooje goɗɗe, ammaa naa ngam nattingo on. Allah hokki on haa juuɗe wanywanyɓe mooɗon ngam on mettini mo ɓernde.

⁷Labbi, on lii'ani dabbaaji, naa haa maako on toonyi tagɗo on.

⁸On ngejjiti Allah duumiiɗo, guurnuɗo on, on njarni Urusaliima, daada mon guurnuɗo on, bone.

⁹Kaŋko o yi'i bana noy Allah waŋginiri tikkere maako, nden o wi'i: “Naneeɗam, berniiji keddiiɗi Siyona, Allah neldani yam suno maŋngo.

¹⁰Ooho, mi laari daheeki ɓiɓɓe am worɓe e rewɓe, ki Duumiiɗo ukkani ɓe.

¹¹Mi mawnini ɓe nder seyo, nder bojji e suno, mi acci ɓe ɓe ndahe.

¹²Taa koo moy welwelta ngam am, mi cuddiiɗo, gudinaaɗo! Mi lutti feere am ngam hakkeeji ɓiɓɓe am luutɓe Tawreeta Allah.

¹³Ɓe anndaa umrooje Allah, ɓe kuuwaay fodde muuyo maako, ɓe tokkaaki laawol darnuŋgol ngol Allah holli ɓe.

¹⁴Ngare, onon berniiji ɓadiiɗi Siyona, ciftore Allah, Duumiiɗo, dahi ɓiɓɓe am worɓe e rewɓe.

¹⁵O neli dow maɓɓe ummaatoore daayiinde, ummaatoore mawnitiinde wolwannde wolde janannde, ummaatoore nde semtataa ndotti'en, nde walaa enɗam heedi ɓikkoy.

¹⁶Ɓe njahri ɓikkoy debbo jurumɗo ngiɗaakoy, ɓe acci mo feere maako, bilaa ɓikkoy maako ndehoy.”

¹⁷Ɓikkoy am, noy mballiranmi on?

¹⁸Mo yarni on bone, kaŋko hisnata on haa juuɗe wanywanyɓe mon.

¹⁹Njehe ɓikkoy am, min kam, mi luttan feere am haa ɗo, mi gudinaaɗo.

²⁰Mi ɓorti limce jam, mi ɓorni buhuure dookoowo, mi rookoto Duumiiɗo nder nyalɗe am fuu.

²¹Tiɗɗine ɓerɗe mon ɓikkoy am, mbookane Allah, o hisnan on toonyaare wanywanyɓe mon!

²²Ngam min, mi hooli Duumiiɗo, mi tammi o hisnan on. Kaŋko feere maako hokki yam seyo ngo'o: Mi anndi nii seɗɗa Duumiiɗo, dimɗinoowo mon yurminan on.

²³Gooŋga, mi acci on on ndilla nder suno e bojji! Ammaa Allah wartiran on haa am nder seyo e ilinaali haa foroy.

²⁴Bana berniiji Siyona ndaari jonta daheeki mooɗon bana nii boo ɗi ndaaran kisndam ɗam Duumiiɗo Allah mooɗon hokkan on bee tedduŋgal maŋngal.

²⁵Ɓikkoy am, munyane tikkere Allah bee munyal ɗuuɗŋgal. Ganyo mooɗon toonyi on, ammaa on ndaaran law halkere maako e on njaaɓan hoƴƴudu maako.

²⁶Ɓikkoy am tampukoy tokki laabi caatuɗi, ɓe kooci on bana dabbaaji ɗi konne'en ngujji.

²⁷Cemmbiɗe ɓikkoy am! Ngookane Allah: Kaŋko dahi on, o yejjitittaa on.

²⁸On numi luutgo laawol Allah. Sey jonta on tiino nde sappo ngam wartugo e tefgo mo.

²⁹Kaŋko ukkuɗo on bone waran hisna on, hokkan on seyo duumiiŋgo.

³⁰Urusaliima, tiɗɗin ɓernde! Mo inndani ma semmbiɗinan ma.

³¹Ɓen torruɓe ma, seyiiɓe laargo do'ere ma kalkan.

³²Bone laatanto berniiji ɗi huuwtiniri ɓikkoy ma bana maccuɓe, sakkomaa berniwol haa ɓikkoy njooɗi.

³³Gooŋga, bana ngol seyori do'ere ma, ngol manti ngam bone ma, bana non boo, ngol sunoto ngam ngol nattinte.

³⁴Mi ittanan ngol yimɓe maagol ɗuuɗɓe seynanɓe ngol e ƴaggaare maagol laatoto suno.

³⁵Duumiiɗo ukkanan ngol yiite balɗe ɗuuɗɗe e nder balɗe ɗuuɗɗe ngol laatoto weerde ginnaaji.

³⁶Urusaliima, laar gal fuunaaŋge, ndaa seyo ngo Allah ɗon waddane.

³⁷Laar ɓikkoy maaɗa ndahaakoy ɗon ngarta, koy mooɓti diga fuunaaŋge haa hiirnaaŋge, koy ɗon ceyo ngam wolde Ceniiɗo e tedduŋgal Allah.