Read Fulfulded Suzan 1 Bible Online

Suzan 1 - Fulfulded bible

Suzan 1

¹Yahuuduujo bi'eteeɗo Yowakim ɗonno jooɗi haa Baabila.

²O te'i debbo feere bi'eteeɗo Suzan ɓii Helkiya. Debbo oo o ŋarniiɗo, o kulɗo Allah boo.

³Saaro'en maako ɓe nuɗɗinɓe, ɓe mawninno mo nder ɗowtaare heedi Tawreeta Muusa.

⁴Yowakim mari jawle ɗuuɗɗe. O mari jarne kommbi saare maako. Yahuudu'en ɗuuɗɓe ɗon ngara haa maako ngam heɓgo sawari ngam o ɓurduɗo tedduŋgal caka maɓɓe.

⁵Hitaande nde'e, ndotti'en ɗiɗo nder ummaatoore Yahuudu'en suɓaama ngam laataago hiitooɓe. Dow maɓɓe Allah wolwi wakkati o wi'i: “Sooynde adilaaku ummori gal Baabila, nde tokkori boo dow ndotti'en suklaniiɓe kiita, kamɓe haanduɓe laataago yimɓe ardiiɓe ummaatoore.”

⁶Ndotti'en ɓe'e mboowi yahgo haa Yowakim e marɓe haaje hiiteego fuu ɗon njaha tawa ɓe ton.

⁷To naaŋge wuli, yimɓe fuu kuuca, Suzan ɗon nasta haa jarne gorum haa o waanca ton.

⁸Ndotti'en ɗiɗo go ɗonno ndaara mo tum haa nokkuure nde'e haa yiide maako naŋngi ɓe.

⁹Hakkiilo maɓɓe jiiɓi, ɓe luuti laawol Allah, ɓe acci tokkaago laawol umrooje maako.

¹⁰Ɓe ɗiɗo fuu, ɓernde maɓɓe ɗon ɓili dow Suzan, ammaa ɓe mbi'mbi'tiraay ko ɓillata ɓe

¹¹ngam koo moy maɓɓe ɗon semta wi'go oya no o yiɗi waaldugo bee maako.

¹²Nii non, nde weeti fuu, koo moy ɗon tefa dabare yi'go mo.

¹³Nyannde feere nde naaŋge wuli, ɓe ngurti saare Yowakim, ɓe njaɓɓotiri bee wi'wi'tirgo: “Kuucen haa men, ɗum wakkati hacitaago”.

¹⁴Ammaa nde ɓe cenndiri, koo moy lori haa saare Yowakim go. Nde ɓe potti ton, ɓe ƴamtotiri hujja e koo moy wi'i tanum yiide maako ngam Suzan. Nden kam, ɓe carwootiri noy ɓe ngiidata bee maako to o ɗon feere maako.

¹⁵Ɓe ɗon ndeeni wakkati. Nyannde feere, Suzan yehi haa jarne gorum bana ko woowa, horɓe ɗiɗo tan ɗofti mo. Nde ɗum wakkati gulɗum, o yiɗno yiiwaago.

¹⁶Walaa innu fuu haa ton sey ndotti'en ɗiɗo suuɗiiɓe, aynanɓe mo.

¹⁷Suzan neli horɓe mum tefana mo nebbam e uurle, o umri ɓe boo, ɓe maɓɓa dammuɗe nastirɗe mawɗe haa o yiiwo.

¹⁸Ɓe ngaɗi ko o wi'i, ɓe ngurtori gal dammugal sera waddoygo ko jaagorɗo maɓɓe ƴami ɓe, ɓe ngi'aay ndotti'en suuɗiiɓe.

¹⁹Nde ɓe ngurti, ndotti'en go ngurti haa ɓe cuuɗino, ɓe njaawani Suzan,

²⁰ɓe mbi'i mo: “Dammuɗe nokkuure nde'e ɗon maɓɓi e walaa gi'anɗo en. Minin boo, min ɗon cuuni ma. Jaɓ waaldugo bee amin.

²¹To a sali boo, min kaadante bee wi'go min tawi ma bee sukaajo e a farti horɓe ma daliila man.”

²²Suzan uumi, wi'i: “Ndaa mi nasti nder ɓillaare, walaa dabare wurtaago! To mi jaɓi ko on ngiɗi, mi hiitete kiita mbareeki ngam mi njeeni, to mi salake boo, mi daɗataa on.

²³Ammaa ndikka on kaadanammi dow gooŋga am dow mi waɗa hakke yeeso Jawmiraawo.”

²⁴Nden Suzan wooki bee semmbe. Ndotti'en go boo mbooki bee semmbe, ɓe ɗon kaadana mo.

²⁵Gooto caka ndotti'en go doggi maɓɓiti dammuɗe jarne.

²⁶Nde huuwooɓe wonɓe haa saare nani gookaali, ɓe portoyi gal dammuɗe sera haa ɓe ndaara ko waɗi Suzan.

²⁷Ndotti'en go limti ɓe ko waɗi. Huuwooɓe go cemti ngam ɓe meeɗaay nango haala bana ka'a dow Suzan.

²⁸Jaŋngo maajum yimɓe mooɓti haa saare Yowakim gorko Suzan, ndotti'en ɗiɗo go ngaroyi, ɗon annini hiitaago mo kiita mbareeki.

²⁹Nde yimɓe fuu kawti, ɓe umri: “Sey ɓe ngadda Suzan ɓii Helkiya, debbo Yowakim”. Ɓe neli goɗɗo waddoya mo.

³⁰O waroyi, o ɗon tokkotiri bee saaro'en maako e ɓiyiiko'en e deerɗiiko'en.

³¹O ŋarniiɗo masin.

³²Hiitooɓe man, ɗum ndotti'en go, ɓe nyidduɓe, ɓe umri ɓe itta suddaare maako ngam ɓe keɓa ɓe ngi'a ŋarol maako haa ɓe cafta.

³³Yimɓe maako bee warɓe laargo mo fuu ɗon mboya.

³⁴Hiitooɓe go ummi caka yimɓe, njo'ini juuɗe muuɗum'en dow hoore Suzan.

³⁵kaŋko boo o ɗon woya. Nder bojji maako, o tijji asama. Nder ɓernde maako, o ɗon hooli Jawmiraawo.

³⁶Ndotti'en mbi'i: “Wakkati min ɗon ngiilo feere amin nder jarne gorko Suzan, debbo oo wardi bee horɓe maako ɗiɗo. O maɓɓi dammuɗe mawɗe ɗe jarne fuu e o farti horɓe maako.

³⁷Woodi sukaajo ɗonno suuɗi haa ɗon, wurti ɓaditi mo, wari waaldi bee maako.

³⁸Minin boo min ɗonno haa lonyoodu jarne man, sey min ndaari nyidduɗum ɗu'um, min njaawani ɓe.

³⁹Min tawi ɓe ɗon mbaali ɓe fuu. Min mbaawaay naŋngugo sukaajo oo ngam o ɓuri min semmbe, o teeti o maɓɓitoyi dammugal jarne, o doggi, o daɗi.

⁴⁰Ammaa min naŋngi debbo oo e min ƴami mo moy woni derkeejo oo.

⁴¹Ammaa o sali jaabaago min. Ndaa ko min ngiɗi anndingo on.” Mooɓtirde fuu jaɓani ɓe ko ɓe mbi'i ngam ɓe ndotti'en nder ummaatoore e ɓe hiitooɓe boo. Suzan hiitaama kiita mbareeki.

⁴²O wooki bee semmbe: “Allah duumiiɗo, a anndi ko suuɗi, a anndi boo kuuje fuu hiddeko ɗe waɗa.

⁴³A anndi boo fakat ko yimɓe ɓe'e mbi'i dow am ɗum fewre. A ɗon laara, mi maayan, alhaali boo waala ko mbaɗmi, ɗum haadoore ɓe kaadani yam.”

⁴⁴Jawmiraawo nani do'a Suzan.

⁴⁵Wakkati ɓe ɗon njahra mo haa ɓe mbara mo, Allah ummini Ruuhu Ceniiɗo haa sukaajo bi'eteeɗo Daniyel.

⁴⁶O wooki bee semmbe, o wi'i: “Mi laatataako ceedoowo dow maayde debbo oo!”

⁴⁷Yimɓe fuu ngayliti gal maako, ɓe ƴami mo: “Ɗume ngiɗɗa wi'go?”

⁴⁸Suka dari caka maɓɓe, wi'i: “Onon Isra'iila'en on sooyɓe hakkiilo fuu na? On kiiti debbo nder ummaatoore mon kiita mbareeki bilaa dilgo yimɓe, bilaa tefgo gooŋga.

⁴⁹Lorte haa nokkuure kiita! Worɓe ɓe'e, ɓe kaadani mo dow fewre!”

⁵⁰Yimɓe fuu njaawɗi, lorti. Ndotti'en feere mbi'i Daniyel: “War, jooɗa caka amin e wi'i min ko numɗa ngam Allah hokki ma hikma yimɓe marɓe duuɓi.”

⁵¹Daniyel wi'i: “Cenndite ndotti'en ɗiɗo ɓe'e. Mi ƴaman ɓe feere feere.”

⁵²Ɓe cennditi ɓe. Daniyel ewni ndottiijo arano, wi'i mo: “Ndottiijo keewɗo halleende, wakkati yoɓgo hakke ma ɗi ngaɗɗa ɓooyma yottake.

⁵³A hiitori bilaa adilaaku, a haɓɓi adili'en, a yoofti aybinaaɓe. Jawmiraawo boo umri nii: Taa hiita kiita mbareeki adiliijo malla gooŋgaajo.

⁵⁴Jonta boo, to gooŋga a tawtori Suzan bee sukaajo, wi'i min haa les lekki kiye tawɗa ɓe?” Ndottiijo go jaabi: “Haa les tanni.”

⁵⁵Daniyel wi'i: “Yowwa, ndaa fewre nde tammi ittugo ma yoŋki! Fakat Allah umri malaa'ikaajo maako gooto o wara, o haɓɓe, o mbare.”

⁵⁶Daniyel lorni oo kam e o umri ɓe ngadda oya boo. O wi'i mo: “Taaniraawo Kanaana naa taaniraawo Yahuuda, ŋarol debbo oo jiiɓi ma hakkiilo! Yiide ma dow maako majjini ma hakkiilo!

⁵⁷Non on ngaɗi bee rewɓe laamu ɓooyma ngu Isra'iila, on mbaaldi bee maɓɓe ngam ɓe ɗon kula on. Ammaa debbo, koo gooto mo lesdi Yahuuda, jaɓanaaki on nyidduɗum ɗu'um!

⁵⁸Jonta kam, wi'am haa les lekki kiye tawɗa ɓe?” Oo boo jaabi: “Haa les ibbi.”

⁵⁹Daniyel wi'i mo: “Ndaa fewre nde hiitete kiita mbareeki, an boo! Fakat malaa'ikaajo Allah ɗon reeni, kaafahi haa juŋngo ngam hiitaago ma. O mbaran on, on ɗiɗo fuu.”

⁶⁰Yimɓe mooɓtiiɓe fuu ngooki, ngetti Allah kisnanɗo hooliiɓe mo.

⁶¹Nden ɓe ngayliti dow ndotti'en ɗiɗo seedanooɓe fewre ɓe Daniyel naŋngi nder bolle muuɗum'en go. Ɓe kiiti ɓe kiita nganyaandi ka ɓe kiitino goɗɗo nder ummaatoore maɓɓe.

⁶²Ɓe mbaɗi fodde umroore Tawreeta Muusa, ɓe mbari ɓe. Nyannde man, yoŋki mo walaa aybe hisnaama.

⁶³Helkiya e debbo mum maŋgti Allah ngam daliila Suzan ɓiŋngel maɓɓe non boo Yowakim, gorko maako hawtaade bee asŋgol maɓɓe fuu ngam ɓe annditi walaa cemtiniiɗum haa ngeendam Suzan.

⁶⁴Diga nyannde man, Daniyel boo heɓi daraja yeeso yimɓe.