Read Fulfulded Ezekiyel 10 Bible Online

Ezekiyel 10 - Fulfulded bible

Ezekiyel 10

¹Mi laari fahin. Haa dow kippol, dow ko'e keruba'en ngi'mi irin hayre safira nanndunde leeso laamu.

²Jawmiraawo wi'i ɓorniiɗo limce leŋ go: “Nastu caka pallooje tallotooɗe les keruba'en, kebbina juuɗe ma bee ƴulɓe yiite diga nokkuure caka keruba'en, a rufa ɗe dow berniwol!” Mi yi'i o nasti.

³Saa'i o nasti, keruba'en ɗon ndari haa wakeere haykaliiru nyaamre. Ruulde hebbini daldal haykaliiru nderwal.

⁴Tedduŋgal Jawmiraawo ummi diga dow keruba'en, wari haa les dammugal haykaliiru. Suudu heewi ruulde go, daldal saare fuu heewi jayŋgol tedduŋgal Jawmiraawo.

⁵Hoolo bileeji keruba'en ɗon nane haa daldal haykaliiru yaasiwal, bana sawtu Allah Baawɗo saa'i o ɗon wolwa.

⁶Jawmiraawo umruno ɓorniiɗo limce leŋ go: “Hoo'u yiite caka pallooje tallotooɗe, caka keruba'en.” Goɗɗo go yehi, dari kommbi falloore woore.

⁷Keruba forti juŋngo muuɗum, hoo'i yiite seɗɗa caka keruba'en go, hokki nge haa juuɗe ɓorniiɗo limce daneeje go. Kaŋko boo o jaɓi nge, o wurti.

⁸Goɗɗum nannduɗum bee juŋngo neɗɗo waŋgi les bileeji keruba'en.

⁹Mi laari, ndaa pallooje nayi bana ɗe moota pucci ɗon ndari baŋnge keruba'en, falloore woore baŋnge keruba gooto. Pallooje man ɗelki bana hayre kirisoliti,

¹⁰nayi fuu ɗe nannduɗe, woodi falloore woɗnde nder falloore fuu.

¹¹Ɗe ɗon njaha gal bakeeje maaje nayi fuu, ɗe ngaylitittaako to ɗe ɗon njaha. Haa hoore keruba yehi, ton ɗe njahata boo, ɗe ngaylitittaako nder yahdu maaje.

¹²Ɓalli keruba'en fuu, ɓaawe maɓɓe e juuɗe maɓɓe e bileeji maɓɓe e pallooje nayi fuu keewi gite.

¹³Mi nani ɗe ewnaama yirloode.

¹⁴Keruba fuu woodi geese nayi. Arano woodi yeeso keruba, ɗiɗaɓo woodi yeeso neɗɗo, tataɓo woodi yeeso mbarooga, nayaɓo woodi yeeso dutal.

¹⁵Keruba'en eeŋgi, ɗum tagle ɗe ngi'noomi haa maayo Kebar.

¹⁶To keruba'en ɗon ndilla, pallooje boo ɗon talla haa kommbi maɓɓe. To keruba'en ɓaŋgti bileeji muuɗum'en ngam eeŋgugo, pallooje luttataa haa lesdi. Ɗe ɗon haa kommbi maaje, ɗe celataa.

¹⁷To ɓe ndarake, kanje boo ɗe ndaro. To ɓe eeŋgi, kanje boo ɗe eeŋga, ngam Ruuhu tagle ɗon nder maaje.

¹⁸Tedduŋgal Jawmiraawo ummi diga les dammugal haykaliiru, jooɗi dow keruba'en.

¹⁹Mi laari keruba'en ɓaŋgti bileeji muuɗum'en, ndillidi bee pallooje. Ɓe ndari haa nastirde dammugal fuunaaŋgewal haa suudu Jawmiraawo. Tedduŋgal Allah Isra'iila ɗon haa dow maɓɓe.

²⁰Ɗum tagle geete ɗe ngi'noomi les Allah Isra'iila, haa maayo Kebar go. Mi annditi ɗum keruba'en.

²¹Koo moy maɓɓe woodi geese nayi e bileeji nayi e ko nanndi bee juuɗe neɗɗo ɗon les bileeji maɓɓe.

²²Geese maɓɓe nanndi bee ɗe ngi'noomi haa maayo Kebar. Ɗum kamɓe man. Koo moy maɓɓe tiiti yeeso muuɗum cir.