Read Fulfulded Ezekiyel 11 Bible Online

Ezekiyel 11 - Fulfulded bible

Ezekiyel 11

¹Ruuhu eeŋgini yam, jippini yam haa dammugal suudu Jawmiraawo fuunaaŋgewal. Mi yi'i worɓe noogas e njowo dariiɓe haa yolnde maagal. Caka maɓɓe ngi'mi Yaajaniya ɓii Azzuru e Pelatiya ɓii Benaya, ardiiɓe jama'aare.

²Jawmiraawo wi'i yam: “Ɓii-Aadama, worɓe ɓe'e ɗon nufo zunuuba, ɗon ndawra kalluɗum nder berniwol ngo'ol.

³Ɓe ɗon mbi'a: Wakkati nyiɓugo cuuɗi siwaa! Berniwol woni fayannde, minin ngoni kusel nder maare.

⁴Ngam maajum waɗ annabaaku dow maɓɓe, ɓii-Aadama, waɗ annabaaku!”

⁵Nden Ruuhu Jawmiraawo wari dow am, wi'i yam: “Yeccu ɓe: Ndaa nii Jawmiraawo wi'i: Kanjum mbi'oton, onon yimɓe Isra'iila! Mi anndi numooji mooɗon.

⁶On mbari ɗuuɗɓe nder berniwol ngo'ol, laabi maagol keewi mbaraaɓe.

⁷Ngam maajum min Allah Jawmiraawo mbi'anmi bana ni'i: Yimɓe ɓe mbarɗon nder berniwol, kamɓe ngoni kusel, berniwol boo woni fayannde. Ammaa onon, mi wurtinan on diga maagol.

⁸On ɗon kula kaafahi, ngam maajum ukkanmi ki dow mooɗon. Min Allah Jawmiraawo wi'i ɗum.

⁹Mi wurtinan on berniwol, mi hokka on haa juuɗe jananɓe, mi waɗa on kiita.

¹⁰On maayran bee kaafahi, mi hiitoto on haa keerol lesdi Isra'iila. Nden kam on paaman min woni Jawmiraawo.

¹¹Bana non berniwol laatataako fayannde ngam mooɗon, onon boo on laatataako kusel nder maare. Mi hiitoto on haa keerol lesdi Isra'iila.

¹²Nden kam on paaman min woni Jawmiraawo. On ɗowtanaaki farillaaji am, on tokkaaki kiitaaji am. Ammaa on tokki kiitaaji ummaatooje taariiɗe on.”

¹³Saa'i mi ɗonno waɗa annabaaku, Pelatiya ɓii Benaya do'i, maayi. Mi sujidi, mi hooli: “Kayya, yaa Allah Jawmiraawo, a yiɗi nattingo luttuɓe Isra'iila fuu na?”

¹⁴Jawmiraawo wolwani yam, wi'i:

¹⁵“Ɓii-Aadama, jooɗiiɓe nder Urusaliima ɗon mbi'a dow deerɗiraaɓe ma e banndiraaɓe ma e yimɓe Isra'iila fuu: Ɓe daayiiɓe Jawmiraawo, minin mari lesdi jonta.

¹⁶Ngam maajum yeccu ɓe: Ndaa nii Allah Jawmiraawo wi'i: Koo nde mi riiwi ɓe daayiiɗum haa caka ummaatooje, mi saŋkiti ɓe nder lesɗe jananne, mi laatani ɓe nokkuure seniinde nder wakkati seɗɗa nder lesɗe ɗe ɓe njehi.

¹⁷Ngam maajum yeccu ɓe: Ndaa nii Allah Jawmiraawo wi'i: Mi mooɓtoyan on diga caka ummaatooje, mi hawritan on diga lesɗe ɗe mi saŋkititno on, mi hokkitan on lesdi Isra'iila.

¹⁸Ɓe ngaroyan ton, ɓe ittan labbi e kuuje nyidduɗe fuu.

¹⁹Mi hokkan ɓe ɓerɗe laaɓɗe e ruuhuuji kesi, mi wurtinan ɓerɗe tuurtanɗe diga ɓalli maɓɓe, mi hokkan ɓe ɓerɗe ɗowtiiɗe.

²⁰Nden kam ɓe ɗowtanto farillaaji am, ɓe tokkoto kiitaaji am. Ɓe laatoto ummaatoore am, min boo mi laatoto Allah maɓɓe.

²¹Ammaa huucitinɓe ɓerɗe muuɗum'en dow labbi e kuuɗe nyidduɗe, mi lornan kuuɗe maɓɓe dow ko'e maɓɓe. Min Allah Jawmiraawo wi'i ɗum.”

²²Nden keruba'en ɓaŋgti bileeji muuɗum'en, pallooje ummodi bee maɓɓe, tedduŋgal Allah Isra'iila ɗon dow maɓɓe.

²³Tedduŋgal Jawmiraawo ummi diga caka berniwol, jooɗoyi dow hooseere haa fuunaaŋge maagol[6].

²⁴Ruuhu eeŋgini yam, yahri yam haa dahaaɓe haa lesdi Kaldiya. Mi yi'i ɗum fuu nder wahayu mo Ruuhu Allah yi'ni yam. Nden wahayu man acci yam.

²⁵Mi limtani dahaaɓe ko Jawmiraawo yi'nino yam fuu.