Read Fulfulded Ezekiyel 12 Bible Online

Ezekiyel 12 - Fulfulded bible

Ezekiyel 12

¹[7] Jawmiraawo wolwani yam, wi'i:

²“Ɓii-Aadama, a ɗon jooɗi caka tuurtooɓe. Ɓe ngoodi gite, ammaa ɓe ngi'ataa. Ɓe ngoodi noppi, ammaa ɓe nanataa, ngam ɓe tuurtooɓe.

³An, ɓii-Aadama, haɓɓu kuuje ma bana daheteeɗo. Dillu bee nyalawma gite maɓɓe, bana daheteeɗo. Yah bana daheteeɗo diga nokkuure ma haa nokkuure woɗnde, gite maɓɓe. Teema ɓe ngi'an, ɓe paaman ɓe tuurtooɓe.

⁴Caka nyalawma, gite maɓɓe, wurtin kuuje ma bana daheteeɗo. Kiikiiɗe boo dillu bana daheteeɓe ndillirta, gite maɓɓe.

⁵Ngam wurtaago suudu, sumpitit mahdi maaru gite maɓɓe, wurtin kuuje ma gal ton.

⁶Nden wakka kuuje ma gite maɓɓe. To jemma waɗi, ndilla. Wiirnu yeeso ma, taa a yi'a lesdi. Ngam mi waɗi ma a alaama ngam reentingo[8] yimɓe Isra'iila.”

⁷Mi waɗi ko Jawmiraawo umri yam. Caka nyalawma ngurtinmi kuuje am bana daheteeɗo. Kiikiiɗe mi sumpiti mahdi bee juuɗe am. Nde jemma waɗi, mi wurtini kuuje am, mi wakki ɗe gite maɓɓe.

⁸Jaŋngo man fajiri, Jawmiraawo wolwani yam, wi'i:

⁹“Ɓii-Aadama, Isra'iila'en tuurtooɓe ƴami ma ko a waɗi na?

¹⁰Yeccu ɓe: Ndaa nii Allah Jawmiraawo wi'i: Koŋngol ngo'ol laarani mawɗo gonɗo haa Urusaliima e yimɓe Isra'iila wonɓe ton fuu.

¹¹Wi': Mi laatani on alaama ngam reentingo on. Ko mbaɗmi, kanjum laatanto ɓe. Ɓe ndaheteeɓe.

¹²Mawɗo gonɗo caka maɓɓe wakkoto kuuje muuɗum bee jemma, o wurtoto. Ɓe cumpitan mahol ngam wurtingo mo. O wiirnan yeeso maako, ngam taa gite maako ngi'a lesdi.

¹³Mi we'itan zubaawol am dow maako, o naŋngeteeɗo nder tuuforgol am. Mi yahran mo haa Baabila, lesdi Kaldiya'en. Ammaa gite maako ngi'ataa ndi, o maayan ton.

¹⁴Wonduɓe bee maako, aynooɓe mo e honooɓe maako fuu, mi saŋkitan ɓe haa alkibilaaji fuu, mi losan kaafahi, mi taasnan ɓe bee maaki.

¹⁵Nden ɓe paaman min woni Jawmiraawo, saa'i caŋkitanmi ɓe caka ummaatooje, haa lesɗe jananne.

¹⁶Ammaa mi luttan woɗɓe maɓɓe, daɗanɓe kaafahi e weelo e nyawu kalluŋgu ndaaɓoowu, ngam ɓe anndina haala kuuɗe maɓɓe nyidduɗe fuu caka ummaatooje ɗe ɓe njahata. Nden ɓe paaman min woni Jawmiraawo.”

¹⁷Ndaa bolle ɗe Jawmiraawo wolwani yam:

¹⁸“Ɓii-Aadama, nyaam nyaamdu ma e yar ndiyam ma bee diwŋgol e saklere.

¹⁹Yeccu ummaatoore lesdi man: Ndaa nii Allah Jawmiraawo wolwani jooɗiiɓe haa Urusaliima nder lesdi Isra'iila: Ɓe nyaaman nyaamdu maɓɓe bee saklere, ɓe njaran ndiyam maɓɓe bee kultoreeŋgol, ngam lesdi maɓɓe ferwan, sookɗan, ngam daliila toonyaare jooɗiiɓe ton fuu.

²⁰Berniiji keewɗi yimɓe, perwan. Lesdi laatoto ladde hamaadaare. Nden kam on paaman min woni Jawmiraawo.”

²¹Jawmiraawo wolwani yam, wi'i:

²²“Ɓii-Aadama, ko woni balndol ngo'ol caka mooɗon dow lesdi Isra'iila, bi'anŋgol: Nyalɗe ɗon caalo, wahayu boo hiɓɓaay!

²³Ngam maajum yeccu yimɓe: Ndaa nii Allah Jawmiraawo wi'i: Mi majjinan balndol man, taa goɗɗo meeta waɗugo ngol nder Isra'iila. Ammaa yeccu ɓe: Nyalɗe ɗon ɓadito, wahayuuji fuu kiɓɓan!

²⁴Ngam wahayu meere malla annabaaku fewre meetataa laataago caka yimɓe Isra'iila.

²⁵Ngam min woni Jawmiraawo, mi wi'an ko ngiɗmi wi'ugo. Ko mbi'mi boo laatoto, neeɓataa. Onon tuurtooɓe, nder zamanu mooɗon mi waɗan boo ko mbolwumi. Min Allah Jawmiraawo wi'i ɗum.”

²⁶Jawmiraawo wolwani yam, wi'i:

²⁷“Ɓii-Aadama, ndaa ko yimɓe Isra'iila ɗon mbi'a: Wahayu mo gorko oo yi'ata, hiɓɓan nder balɗe daayiiɗe, o ɗon waɗa annabaaku ngam zamanuuji ɗi ngaraay tawon.

²⁸Ngam maajum yeccu ɓe: Ndaa nii Allah Jawmiraawo wi'i: Ko mbi'mi fuu, neeɓataa wargo, wolde am hiɓɓan fakat. Min Allah Jawmiraawo wi'i ɗum.”