Read Fulfulded Ezekiyel 13 Bible Online

Ezekiyel 13 - Fulfulded bible

Ezekiyel 13

¹Ndaa wolde nde Jawmiraawo wolwani yam:

²“Ɓii-Aadama, waɗ annabaaku dow annabi'en Isra'iila waɗanɓe annabaaku iwŋgu haa numooji muuɗum'en. Yeccu ɓe: Nane ko Jawmiraawo wi'ata on!

³Ndaa nii Allah Jawmiraawo wi'i: Bone laatanto annabi'en faataaɓe. Ɓe ɗon tokko numooji maɓɓe, walaa ko ɓe ngi'i sam.

⁴Isra'iila'en! Annabi'en mooɗon laati bana doldolɗe haa bille!

⁵On cukkaay ceekli mahol, on mahaay boo mahol ngam faddaago yimɓe Isra'iila nder haɓre, saa'i nyalaade Jawmiraawo.

⁶Ɓe ɗon ngi'a wahayuuji meere, ɓe ɗon pewa bee waɗugo hatti. Ɓe ɗon mbi'a: Ndaa nii Jawmiraawo Allah wi'i! Alhaali boo, Jawmiraawo nelaay ɓe, ɓe ɗon tammo bolle maɓɓe kiɓɓoto.

⁷Onon annabi'en, wahayuuji ɗi ngi'ɗon laataaki meere na? Hatti mooɗon laataaki pewe na? On ɗon mbi'a: Ɗum wolde Jawmiraawo, alhaali boo mi wolwaay.

⁸Ngam maajum, ndaa nii Allah Jawmiraawo wi'i: Nde bolle mooɗon laatake meere e wahayuuji mooɗon boo fewre, mi honan on!

⁹Mi fortan juŋngo am ngam honugo annabi'en yi'ooɓe wahayuuji meere e fewooɓe bee hatti muuɗum'en. Ɓe nastataa dawriinde ummaatoore am, inɗe maɓɓe nastataa deftere inɗe yimɓe Isra'iila, ɓe meetataa nastugo lesdi Isra'iila boo. Bana non paamroton min woni Allah Jawmiraawo.

¹⁰Ngam ɓe ɗon majjina ummaatoore am bee wolwango nde haala jam, asee boo jam walaa. Ɗum laati bana to yimɓe nyiɓi mahol, ɓe ndanwini ngol.

¹¹Yeccu ranwinooɓe ɓe'e: Ngol yibban! Ngam iyeende saatunde toɓan, mallimallooje bana kaa'e toɓan, henndu saatundu wifan.

¹²To ngol yibbi, ɓe ƴaman on: Toy danwinol mon?

¹³Ngam maajum, ndaa nii Allah Jawmiraawo wi'i: Nder tikkere am, mi umminan henndu saatundu e nder ɓernuki am, mi toɓnan iyeende saatunde e mallimallooje bana kaa'e ndufoto ngam nattingo koo ɗume fuu.

¹⁴Mi yibbinan mahol ngol ndanwinɗon, mi yibbinan ngol fuu, haa caɓɓawal maagol waŋga. Ngol yibban, onon boo on kalkan les maagol. Nden kam on paaman min woni Jawmiraawo.

¹⁵Mi rufdan tikkere am fuu dow mahol e ranwinɓe ngol, nden mi wi'a on: Mahol halki! Ranwinɓe ngol boo kalki,

¹⁶waato annabi'en Isra'iila ɓe'e, waɗananɓe Urusaliima annabaaku, yi'anɓe jam berniwol saa'i jam woodaa. Min Allah Jawmiraawo wi'i ɗum.

¹⁷An, ɓii-Aadama, huucita gal faanyɓe rewɓe nder ummaatoore ma waɗanɓe annabaaku iwŋgu haa numooji muuɗum'en. Waɗ annabaaku dow maɓɓe,

¹⁸yeccu ɓe: Ndaa nii Allah Jawmiraawo wi'i: Bone laatanto rewɓe nyootooɓe leppi ngam haɓɓugo haa jokke juuɗe fuu e irin sallabiije boo ngam suddugo ko'e mawɗe e pamare ngam waɗugo hiila. Ɓe mbaɗan ɗum ngam naŋngugo yoŋkiiji. To on naŋngi yoŋkiiji yimɓe am, on kisnan yoŋkiiji mooɗon na?

¹⁹On ɗon coɓna senaare am yeeso ummaatoore am ngam keɓon tamndanɗe sa'iiruuri seɗɗa malla piccite tamseeje. Woodi yoŋkiiji, mi yiɗaa ɗi maaya, ammaa onon on ɗon mbara ɗi. Woodi yoŋkiiji goɗɗi boo, mi yiɗaa ɗi ngeeɗa, ammaa onon on ɗon kisna ɗi. On ɗon mbaɗa ɗum bee fewugo yimɓe ummaatoore am yiɗɓe nanugo pewe.

²⁰Ngam maajum, ndaa nii Allah Jawmiraawo wi'i: Mi ɗon wanya leppi ɗi kuuwtinirton ngam naŋngugo yoŋkiiji go. Mi seekan ɗi dow juuɗe mon, mi rimɗinan yoŋkiiji ɗi loohotooɗon bana colli.

²¹Mi seekan sallabiije mon, mi rimɗinan yimɓe ummaatoore am diga juuɗe mon, on meetataa loohaago ɓe. Bana non paamroton min woni Jawmiraawo.

²²On tampini ɓerɗe adili'en bee pewe, koo nde min mi naawnaay ɓe. Bana non on cemmbiɗiniri juuɗe halluɓe, ngam taa ɓe acca laabi maɓɓe kalluɗi, ɓe kisna yoŋkiiji maɓɓe.

²³Ngam maajum on meetataa yi'ugo wahayuuji mon meereeji, on meetataa waɗugo hatti boo. Mi hisnan ummaatoore am e juuɗe mon, nden on paaman min woni Jawmiraawo.”