Read Fulfulded Ezekiyel 16 Bible Online

Ezekiyel 16 - Fulfulded bible

Ezekiyel 16

²“Anndin berniwol Urusaliima haala kuuɗe maagol nyidduɗe.

³Yeccu ngol: Ndaa nii Allah Jawmiraawo wi'i ma: An Urusaliima, iwde ma e asli ma haa lesdi Kanaani'en ngoni. Baaba ma o Amoriijo, daada ma boo Hetiijo.

⁴Haa danyeeki ma, nyannde ndanyaaɗa, ɓe ta'aay jaabuuru ma, ɓe ngiiwaay ma, ɓe ngiggaay ma bee mannda ngam laɓɓingo ma, ɓe caawaay ma bee limce.

⁵Walaa koo gooto yurmini ma haa o waɗane irin kuuɗe ɗe'e, walaa enɗuɗo ma sam. Nyalaade danyeeki ma ɓe ngudini ma haa ladde, ngam ɓe nefi ma.

⁶Mi saali, mi yi'i ma a ɗonno waali nder ƴiiƴam ma, a ɗonno dimmbo. Mi wi'i ma: A yeeɗa! Saa'i a ɗon dimmbo nder ƴiiƴam ma, mi wi'i ma: A yeeɗa!

⁷Mi mawnini ma! Mi laatini ma bana fuɗŋgo ladde. A mawni, a heɓi darnde, a wooɗi masin, a waɗi enɗi, gaasa ma fuɗɗi juutugo. Ammaa a temmbo tawon.

⁸Kadiboo mi saali, mi laari ma. Mi yi'i a heewti, a he'i te'eego. Mi we'iti alkibbaare am dow maaɗa ngam wiirnugo temmbuki ma. Nden mi hunani ma, mi haɓɓi alkawal bee ma, a laati te'aaɗo am.” Non Allah Jawmiraawo wi'i.

⁹“Mi yiiwi ma, mi looti ƴiiƴam haa ɓanndu ma, mi wuji ma nebbam.

¹⁰Mi ɓorni ma limce tuppitaaɗe, mi hokki ma paɗe laral ɗigguŋgal. Mi suddi ma bee limce leŋ e limce ɗigguɗe.

¹¹Mi hokki ma fawne e jawe ngam juuɗe ma e koɗel ngam daande ma,

¹²mi waɗi halagaare haa kine ma e yerihon haa noppi ma, mi waɗi fawne booɗɗe ɗe kaŋŋeeri dow hoore ma.

¹³Bana nii a pawniiɗo bee cardi e kaŋŋeeri, a ɓorniiɗo limce leŋ e limce ɗigguɗe e tuppitaaɗe. A heɓi kuroori ɗiggundi e njumri e nebbam ngam nyaamdu ma. A ɓesdi wooɗugo, a he'i heɓugo tedduŋgal laamu boo.

¹⁴Innde ma saŋkiti haa ummaatooje ngam daliila ŋarol ma, ngol timmuŋgol ngam min mi fawni ma.” Non Allah Jawmiraawo wi'i.

¹⁵“Ammaa a ɓaari ŋarol ma. Ɗuuɗɓe maŋgti ma, kanjum laatini ma daakaareejo. A waɗi daakaareeku bee koo moy caalotooɗo, a laati mo maɓɓe.

¹⁶A hoo'i limce ma marɗe noone feere feere, a waɗani hoore ma nokkuuje towɗe bee maaje, ton mbaɗɗa daakaareeku[10]. A waɗi ko meeɗaay e irin man meetataa boo.

¹⁷Fawne ma booɗɗe baɗaaɗe bee cardi am e kaŋŋeeri am ndi ndokkumaami, a wartiri ɗe labbi gorɗi, a waɗi daakaareeku bee maaji.

¹⁸A hoo'i limce ma tuppitaaɗe, a ɓorni ɗe. A jo'ini nebbam am e uurle am yeeso maaji.

¹⁹Non boo nyaamdu am ndu ndokkumaami, kuroori ɗiggundi e nebbam e njumri, a lii'ani ɗum bana dokkal uureeŋgol belŋgol, ndaa ko laati.” Non Allah Jawmiraawo wi'i.

²⁰“A hoo'i ɓiɓɓe ma worɓe e rewɓe ɓe ndanyanɗa mi, a hirsi ɓe ngam nyaamnugo labbi man. Kadi daakaareeku ma he'aay haa

²¹a hirsi ɓikkoy am, a lii'i koy bana dabbaaji guleteeɗi ngam labbi!

²²Nder kuuɗe ma nyidduɗe e daakaareeku ma fuu ngejjititɗa wakkati a ɓiŋngelno, a temmbel, a ɗonno dimmbo nder ƴiiƴam ma.

²³Ɓaawo halleende ma nde'e fuu — Kayto! Bone laatanto ma”, non Allah Jawmiraawo wi'i. —

²⁴“Ɓaawoɗon, a waɗani hoore ma baagaaje lesdi ngam waɗugo daakaareeku e nokkuuje towɗe haa babe fuu.

²⁵A nyiɓi nokkuuje towɗe haa kawtirɗe laabi koo ɗeye, a toskini ŋarol ma, a waaldi bee koo moy caalotooɗo, a ɗuɗɗini daakaareeku ma.

²⁶A waɗi daakaareeku bee heeddiɗɗiraaɓe ma Misra'en mawna-jakari'en, a ɗuɗɗini daakaareeku ma ngam tikkingo yam.

²⁷Ndaa mi forti juŋngo am dow maaɗa, mi usti mardi ma. Mi yoofti ma haa suuno faanyɓe rewɓe Filisti'en[11] konne'en ma. Kamɓe ɓe cemti ngam kuuɗe ma cemtiniiɗe.

²⁸A waɗi daakaareeku bee Assuura'en, ngam a saftataa. A waɗi daakaareeku bee maɓɓe, ammaa haaje ma humtaay.

²⁹A ɗuɗɗini daakaareeku ma haa Baabila, haa lesdi filooɓe, ammaa bee non fuu haaje ma humtaay.”

³⁰Allah Jawmiraawo wi'i: “Kayya, a ɗuuɗa-suunoojo! A ɗon huuwa kuuɗe ɗe daakaareejo ɓurduɗo hallugo!

³¹A waɗi waagaare lesdi ngam waɗugo daakaareeku haa kawtirɗe laabi fuu, a nyiɓi nokkuuje towɗe haa babe fuu. Ammaa a huuwaay bana daakaare'en feere, ngam a jaɓaay ngeenaari.

³²An debbo jeenoowo, mo acci gorum, ɗakkotiri bee jananɓe!

³³Rewɓe daakaare'en fuu keɓan caahuuji. Ammaa an a hokki caahuuji ma haa waaye'en ma fuu, a yoɓi ɓe haa ɓe ngara diga koo toy fuu ngam waɗugo daakaareeku bee maaɗa.

³⁴An a luuti dabare rewɓe daakaare'en woɗɓe fuu. Walaa mo ɗaɓɓiti ma. A jaɓaay ngeenaari, ammaa an hokki ɓe. A waɗi ko woɗɓe mbaɗaay.”

³⁵Ngam maajum, an daakaareejo, nan wolde Jawmiraawo!

³⁶Ndaa nii Allah Jawmiraawo wi'i: “A sudditi les maaɗa, a temmbiɗini ɓanndu ma ngam waɗugo daakaareeku bee waaye'en ma e labbi ma nyidduɗi fuu. A lii'ani ɗi ƴiiƴam ɓiɓɓe ma boo.

³⁷Ngam maajum mi mooɓtan waaye'en ma ɓe pottanɗa fuu, yimɓe ɓe ngiɗɗa e yimɓe ɓe a yiɗaa fuu. Mi mooɓtan ɓe haa maaɗa diga koo toy. Nden cudditanmi ɓanndu ma yeeso maɓɓe haa ɓe ngi'a temmbuki ma.

³⁸Mi hiitete kiita rewɓe jeenooɓe e rufooɓe ƴiiƴam, mi ukkan tikkere e kaajal dow maaɗa haa to ƴiiƴam suddi ma.

³⁹Mi hokkete haa juuɗe maɓɓe. Ɓe mbilan waagaare lesdi ma, ɓe ngibbinan nokkuuje ma towɗe. Ɓe ɓortete fuu, ɓe njaɓtan fawne ma booɗɗe, ɓe accete a temmbo.

⁴⁰Ɓaawo maajum ɓe mooɓtan yimɓe dow maaɗa, ɓe piɗete bee kaa'e, nden ɓe ta'an ɓanndu ma geɓe geɓe bee kaafaaje.

⁴¹Ɓe ngulan cuuɗi ma, ɓe mbaɗan kiita dow maaɗa yeeso rewɓe ɗuuɗɓe. Bana non timminiranmi daakaareeku ma, a meetataa yoɓugo waaye'en ma.

⁴²Bana non peewtiniranmi ɓernde am e accanmi kaajal am. Mi de'itan, metteeŋga ɓernde am jinnan.

⁴³Nde nii a siftoraay wakkati nderkaaku ma, a tikkini yam bee kuuɗe ɗe'e fuu, ngam maajum, ndaa yam min boo: Mi lornan kuuɗe ɗe'e dow hoore ma, min Allah Jawmiraawo wi'i ɗum. Naa a ɓesdi cemtiniiɗum dow kuuɗe ma nyidduɗe?

⁴⁴Baɗoowo balndi fuu waɗan balndol ngo'ol bee maaɗa: Bana daada wa'i, non ɓiyum debbo boo wa'ata.

⁴⁵A ɓii debbo jawiiɗo gorum e ɓiyum'en. A deerɗu deerɗa'en yawiiɓe worɓe muuɗum'en e ɓikkoy muuɗum'en. Daada mon o Hetiijo, baaba mon boo o Amoriijo.

⁴⁶Adda ma, ɗum Samariya, jooɗiiɗo bee ɓiyum'en rewɓe haa woyla. Minya debbo boo, jooɗiiɗo bee ɓiyum'en rewɓe haa fombina, ɗum Sodoma.

⁴⁷Tokkaago laabi maɓɓe e kuuɗe maɓɓe nyidduɗe he'aay ma, kuuɗe maaɗa fuu ɓuri ɗe maɓɓe hallugo.

⁴⁸Bana min Allah Jawmiraawo mi geeto, deerɗa Sodoma e ɓiyum'en rewɓe mbaɗaay bana an e ɓiya'en rewɓe mbaari.

⁴⁹Halleende deerɗa Sodoma, ndaa nde: Kaŋko e ɓiyiiko'en rewɓe ɓe njooɗi bee mawnitaare e haarannde e de'ere hoolɗiniinde, ammaa ɓe mballitaay laafuɓe e talaka'en.

⁵⁰Ɓe mawnitiiɓe, ɓe mbaɗi nyidduɗum yeeso am. Ngam maajum nattinmi ɓe bana ngi'ɗa.

⁵¹Samariya waɗaay koo reeta hakkeeji maaɗa. Kuuɗe ma nyidduɗe ɓuri ɗe maako ɗuuɗugo. Ngam daliila kuuɗe maaɗa nyidduɗe fuu, deerɗa'en laati bana ɓe ngalaano aybe.

⁵²Sey an boo a roondo toskaare ma jonta, ngam a seeti deerɗa'en bee kuuɗe ma ɓurɗe ɗe maɓɓe nyiddugo. Ɓe ɓuri ma adilaaku fakat. Sey a semta, a roondo toskaare ma, ngam a laatini deerɗa'en bana ɓe ngalaano aybe.

⁵³Ammaa mi wartiran joonde maɓɓe bana naane, joonde Sodoma bee ɓiyum'en e joonde Samariya bee ɓiyum'en, non boo joonde maaɗa caka maɓɓe,

⁵⁴ngam a roondo toskaare ma, a semtira kuuɗe ma fuu. Bana non nde'inirta ɓe.

⁵⁵Deerɗa'en Sodoma e Samariya bee ɓiɓɓe muuɗum'en rewɓe laatoto bana naane. Nden an boo bee ɓiya'en rewɓe, on mbootan bana naane.

⁵⁶Saa'i a mawnitiiɗono, a huuwtiniri innde deerɗa Sodoma bana misaalu halleende.

⁵⁷Saa'i man halleende maaɗa waŋgaayno tawon. Jonta rewɓe Edoom e heeddiɗɗiraaɓe muuɗum'en fuu ɗon kuɗe, rewɓe Filistiya taariiɓe ma ɗon njawo ma.

⁵⁸Sey a roondo kiita kuuɗe ma nyidduɗe cemtiniiɗe.” Non Jawmiraawo wi'i.

⁵⁹Ngam ndaa nii Allah Jawmiraawo wi'i: “Mi waɗete fodde kuuɗe ma, ngam a yawi hunayeere, a fiisti alkawal.

⁶⁰Ammaa min mi yejjitittaa alkawal ngal kaɓɓumi bee maaɗa saa'i a paanyono. Mi tabitinan alkawal duumiiŋgal bee maaɗa.

⁶¹An boo a siftoran kuuɗe ma caaliiɗe. A semtan to deerɗa'en ngari haa maaɗa, adda e minya ɗiɗo fuu, ngam mi hokkete ɓe, ɓe laato ɓiya'en, koo to ɓe nastataa nder alkawal am bee maaɗa.

⁶²Min mi haɓɓan alkawal bee maaɗa, an boo a faaman min woni Jawmiraawo,

⁶³ngam haa a siftora ko saali, a semta. A meetataa maɓɓititgo hunnduko ma ngam daliila toskaare ma. Ngam saa'i man njaafotoomi kuuɗe ma fuu.” Non Allah Jawmiraawo wi'i.