Read Fulfulded Ezekiyel 18 Bible Online

Ezekiyel 18 - Fulfulded bible

Ezekiyel 18

¹Ndaa Jawmiraawo wolwani yam, wi'i:

²“Koni on tokkoto waɗugo balndol ngo'ol nder lesdi Isra'iila, bi'anŋgol: Baabiraaɓe muri lammuɗum, nyii'e ɓikkoy mbaati?

³Fakat bana min Allah Jawmiraawo mi geeto, on meetataa waɗugo balndol ngo'ol nder lesdi Isra'iila.

⁴Yoŋki koo moy, koo baaba koo ɓiɗɗo, min jeyi. Baɗɗo hakke, kaŋko maayata.

⁵Ndaare goɗɗo adiliijo, darnuɗo, baɗanɗo adilaaku,

⁶mo nyaamataa kirsanaaɗum labbi dow kooseeje, mo rewataa labbi yimɓe Isra'iila, mo toskintaako debbo keeddiɗɗum, mo waaldataa bee kayloowo boo.

⁷O toonyataa goɗɗo, o hokkitan ko jaɓɗo nyamaande wallinani mo bana jeŋngina, o jaɓtataa kuuje goɗɗo. O nyaamnan dolɓe, o holtinan mo walaa limce.

⁸O hokkataa nyamaande bee ndiyam sam. O saloto waɗugo kalluɗum, o hiitoto jokkirgol hakkunde yimɓe bee gooŋga.

⁹O ɗowtanto umrooje am, o tokkoto kiitaaji am bee hakkiilo. Kaŋko woni adiliijo. Fakat o yeeɗan.” Non Allah Jawmiraawo wi'i.

¹⁰“Ammaa teema o danyi ɓiɗɗo pasoowo, mbaroowo ko'e, kuuwanɗo kuuɗe

¹¹ɗe baaba mum meeɗaay huuwugo. O ɗon nyaama kirsanaaɗum labbi dow kooseeje, o ɗon toskina debbo keeddiɗɗum.

¹²O ɗon toonya laafuɓe, o ɗon jaɓta, o ɗon jogito ballinaaɗum jeŋngina. O ɗon rewa labbi, o ɗon waɗa nyidduɗum.

¹³O ɗon hokka nyamaande bee ndiyam, o ɗon ɗuɗɗina ɗam. Kadi kaŋko o yeeɗan na? O yeeɗataa! Nde o waɗi nyidduɗum ɗu'um fuu, fakat o maayan. Aybe ƴiiƴam maako wartan dow hoore maako.

¹⁴Ammaa teema o danyi ɓiɗɗo, ɓiɗɗo oo yi'i hakkeeji baaba mum fuu, ammaa o tokkaaki ɗi,

¹⁵o nyaamaay kirsanaaɗum labbi dow kooseeje, o rewaay labbi yimɓe Isra'iila, o toskinaay debbo keeddiɗɗiraawo maako,

¹⁶o toonyaay goɗɗo, o jaɓaay jeŋngina, o jaɓtaay. Ammaa o nyaamni dolɓe, o holtini mo walaa limce.

¹⁷O waɗaay halleende, o ɗaɓɓaay ndiyam nyamaande sam, o tokki kiitaaji am, o ɗowtani umrooje am, kaŋko o maayataa ngam hakkeeji baaba maako, ammaa fakat o yeeɗan.

¹⁸Ɗum baaba maako toonyino woɗɓe, jaɓtino ɓe, waɗino halleende caka yimɓe muuɗum. Kaŋko maayata ngam daliila aybeeji maako.

¹⁹Ammaa onon on ɗon mbi'a: Ngam ɗume ɓiɗɗo yarataa bone ngam hakkeeji baaba mum? Ngam ɓiɗɗo waɗi gooŋgaaku e adilaaku. O ɗowtani farillaaji am fuu, o tokki ɗi bee hakkiilo. Ngam maajum o yeeɗan fakat.

²⁰Baɗɗo hakke, kanyum maayata. Ɓiɗɗo yarataa bone ngam daliila aybe baaba mum malla baaba ngam aybe ɓiyum. Adiliijo heɓan mbarjaari kuuɗe mum adiliije, kalluɗo boo yaran bone ngam kuuɗe mum kalluɗe.

²¹To kalluɗo acci waɗugo hakkeeji fuu, to o ɗowtanake farillaaji am fuu, to o huuwi kuuɗe darnuɗe e adiliije, fakat o yeeɗan, o maayataa.

²²Mi siftortaa hakkeeji maako sam. O yeeɗan ngam daliila kuuɗe adiliije ɗe o huuwi.

²³Min Allah Jawmiraawo mi ɗon ƴama on: Kadi mi seyorto maayde kalluɗo na? Walaa, ammaa mi yiɗi o lorto diga yahdu maako, o yeeɗa!

²⁴Ammaa to adiliijo acci adilaaku mum, waɗi sooynde adilaaku, to o tokki huuwugo kuuɗe nyidduɗe ɗe halluɓe kuuwata fuu, nden kam o yeeɗan na? Walaa! Mi siftortaa kuuɗe maako adiliije sam. O maayan ngam o yewi umrooje am, o waɗi hakkeeji dow am.

²⁵Ammaa on ɗon mbi'a: Laawol Jawmiraawo fottaay. Nane, onon yimɓe Isra'iila. On ɗon numa laawol am fottaay na? Kayya, laabi mooɗon ɗin pottaay!

²⁶To adiliijo acci adilaaku mum, waɗi sooynde adilaaku, o maayan ngam man, o maayan ngam sooynde adilaaku maako.

²⁷To kalluɗo acci halleende mum, waɗi gooŋgaaku e adilaaku, nden kam o hisni yoŋki maako.

²⁸To o annditi tuurtolji maako, nden o acci ɗi fuu, o yeeɗan fakat, o maayataa.

²⁹Ammaa onon yimɓe Isra'iila'en on ɗon mbi'a: Laawol Jawmiraawo fottaay. On ɗon numa laabi am pottaay na? Kayya, laabi mooɗon ɗin pottaay!

³⁰Ngam maajum, onon Isra'iila'en, min Allah Jawmiraawo ɗon wi'a on: Mi hiitoto koo moy mooɗon fodde laabi mum. Lorte diga tuurtolji mon, ngam taa aybe mon do'a on.

³¹Acce tuurtolji mon fuu, kesɗitine ɓerɗe mon e ruuhuuji mon. Malla on ngiɗi maayugo na, onon Isra'iila'en?

³²Mi seyortaako maayde goɗɗo. Lorte, ngeeɗe!” Non Allah Jawmiraawo wi'i.