Read Fulfulded Ezekiyel 19 Bible Online

Ezekiyel 19 - Fulfulded bible

Ezekiyel 19

¹Jawmiraawo wi'i yam: Yim yimre boyki dow mawɓe Isra'iila.

²Kayto! Daada ma wonno mbarooga, o ɗonno waali caka barooɗe, o wuurni ɓikkoy mum.

³O mawnini ɓiŋngel gootel caka maakoy, ngel laati mbarooga cemmbiɗŋga, ngel ekkiti faɗɗugo kusel, ngel ɗon nyaama yimɓe.

⁴Yimɓe ummaatooje nani habaru maaga, ɓe naŋngi nga nder ngaska maɓɓe. Nden ɓe mbaɗani nga njamndi nder kine, ɓe njahri nga daayiiɗum haa Misra.

⁵Daada reeni haa somi, tammunde walaa fahin, nden nga mawnini ɓiyiiga feere. Kaŋgel laati mbarooga cemmbiɗŋga.

⁶Nga ɗon waanca nder mooɓre barooɗe. Nde nga ekkiti faɗɗugo kusel, kaŋga boo nga fuɗɗi nyaamugo yimɓe.

⁷Nga ɗon fusa laamorɗe maɓɓe cemmbiɗɗe, nga ɗon wila berniiji maɓɓe. To nga telɓi, nga ubbi bee semmbe, koo moy nder lesdi ɗon hula.

⁸Ummaatooje taariiɗe fuu ngari, mooɓi ngam haɓugo bee maaga. Yimɓe mbaɗi zubaawol dow maaga, nga yolli nder ngaska maɓɓe.

⁹Nden ɓe ndasi nga, ɓe maɓɓi nga nder maɓɓirga, ɓe njahri nga haa lesdi Baabila, yeeso laamiiɗo. Ton ɓe njogi nga nder suudu semmbiɗndu, ngam taa ubbaaŋgo maaga nane fahin dow kooseeje haa lesdi Isra'iila.

¹⁰“Daada maaɗa ɗon nanndi bee inabohi jubaaki ɓadiiɗum bee maayo, ki heewi ɓiɓɓe e haakooji ngam ndiyam ɗon ɗuuɗi haa nokkuure man.

¹¹Lice maaki, fakat ɗe cemmbiɗɗe, non ɗe pottani cabbi laamiiɓe. Lekki mawni haa ki nasti nder duule, koo moy yi'i ki towi, ki sukki.

¹²Juuɗe tikkuɓe ɗoofi ki, nden ɓe ngibbini ki haa lesdi. Henndu fuunaaŋge ɗaylini ɓiɓɓe maaki, lice maaki ngewaama bee semmbe, nden ɗe njoori, ɗe ngule bee yiite.

¹³Jonta lekki jubaama nder ladde, ki ɗon dari nder lesdi njoorndi, ndi walaa ndiyam.

¹⁴Yiite wurti diga dubbeere maaki, wuli lice e ɓiɓɓe maaki. Lice maaki cemmbiɗɗe fuu njinni, walaa lisal ngam sawru laamiiɗo.” Yimre nde'e laati yimre boyki. Yimɓe ngiman nde ngam woyugo.