Read Fulfulded Ezekiyel 2 Bible Online

Ezekiyel 2 - Fulfulded bible

Ezekiyel 2

¹O wi'i yam: “Ɓii-Aadama, dara dow kosɗe ma, haa mi wolwane.”

²Nde o wi'i yam ɗum, Ruuhu nasti nder am, darni yam dow kosɗe am, mi nani bolwananɗo yam.

³O wi'i yam: “Ɓii-Aadama, mi ɗon nele haa yimɓe ummaatoore Isra'iila tuurtuɓe, ɓe tuurtani yam. Kamɓe e kaakiraaɓe maɓɓe ɓe laati tuurtaniiɓe yam haa wargo hannde.

⁴Yimɓe ɓe'e kam, ko'e maɓɓe caati. Mi neli ma haa maɓɓe, a yecca ɓe: Ndaa nii Allah Jawmiraawo wi'i.

⁵Koo ɓe nanan, koo ɓe caloto nanugo ngam ɓe tuurtooɓe, ammaa ɓe paaman annabiijo ɗon caka maɓɓe.

⁶An boo, ɓii-Aadama, taa hul ɓe, taa hul bolle maɓɓe. Ngam giŋngille e gi'e ɗon taari ma, a ɗon jooɗi dow jahe. Ammaa taa hul bolle maɓɓe, taa gite maɓɓe kulne, ngam ɓe tuurtooɓe.

⁷Yeccu ɓe bolle am, koo ɓe nanan, koo ɓe caloto nanugo, ngam ɓe tuurtooɓe.

⁸Ɓii-Aadama, nan ko mi wi'ete. Taa tuurtu bana tuurtooɓe ɓe'e! Maɓɓitit hunnduko ma, nyaam ko mi hokkete!”

⁹Mi laari, ndaa juŋngo ɗon forti heedi am, ngo ɗon jogi deftere taggaande.

¹⁰O taggiti nde yeeso am, nde winndaama nder e yaasi fuu. Ndaa ko winnda: Bolle mettamɓeram e uumaali e bone.