Read Fulfulded Ezekiyel 20 Bible Online

Ezekiyel 20 - Fulfulded bible

Ezekiyel 20

¹Nder nduuɓu njoweeɗiɗaɓu, lewru jowaɓru, nyannde sappoore maaru, woɗɓe ndotti'en Isra'iila ngari ƴamugo muuyo Jawmiraawo. Ɓe njooɗi yeeso am.

²Nden Jawmiraawo wolwani yam, wi'i:

³“Ɓii-Aadama, wolwan ndotti'en Isra'iila, yeccu ɓe: Ndaa nii Allah Jawmiraawo wi'i: On ngari ƴamugo muuyo am na? Fakat bana mi geeto, mi jaɓataa on ƴamammi. Min Allah Jawmiraawo wi'i ɗum.”

⁴Nden o tokki wi'ugo: “Ɓii-Aadama, a taaskake waɗango ɓe kiita na? Sey a ta'ana ɓe kiita. Siftinor ɓe kuuɗe nyidduɗe fuu ɗe kaakiraaɓe maɓɓe kuuwi.

⁵Yeccu ɓe: Ndaa nii Allah Jawmiraawo wi'i: Nyalaade nde mi suɓi Isra'iila, mi ɓaŋgti juŋngo am mi hunani yimɓe danygol Yaakubu. Mi waŋgani ɓe nder lesdi Misra, mi ɓaŋgti juŋngo am mi hunani ɓe, mi wi'i: Min woni Jawmiraawo, Allah mooɗon.

⁶Nyalaade man mi ɓaŋgti juŋngo, mi huni, mi wurtinan ɓe lesdi Misra, mi yahra ɓe nder lesdi ndi cuɓananmi ɓe, lesdi keewndi kosam e njumri, ɓurndi lesɗe fuu wooɗugo.

⁷Mi umri ɓe ngudina labbi maɓɓe nyidduɗi estanɗi ɓe, taa ɓe coɓa bee teddingo labbi Misra, ngam min woni Allah Jawmiraawo maɓɓe.

⁸Ammaa ɓe tuurtani yam, ɓe cali nanango yam. Ɓe fuu ɓe ngudinaay labbi maɓɓe nyidduɗi estanɗi ɓe, ɓe accaay teddingo labbi Misra boo. Mi taaskino rufugo tikkere am fuu dow maɓɓe nder Misra.

⁹Ammaa mi waɗaay ɗum, ngam taa ummaatooje taariiɗe ɓe kallina innde am. Ngam mi anndinnooɗo yimɓe Isra'iila yeeso maaje fuu, mi wurtinan ɓe lesdi Misra.

¹⁰Mi wurtini ɓe lesdi Misra, mi yahri ɓe nder ladde.

¹¹Mi anndini ɓe farillaaji am, mi ekkitini ɓe kiitaaji am. Koo moy tokki ɗi, yeeɗiran bee maaji.

¹²Mi hokki ɓe nyalɗe ciwtorɗe boo, ɗe laati alaama hakkunde am bee maɓɓe, ngam taa ɓe ngejjita min woni Jawmiraawo cenoowo ɓe.

¹³Ammaa yimɓe Isra'iila tuurtani yam nder ladde. Ɓe ɗowtanaaki farillaaji am, ɓe luuti kiitaaji am geeɗinanɗi tokkiiɗo ɗi fuu. Ɓe coɓni boo nyalɗe ciwtorɗe am nde ɗuuɗɗum. Mi taaskino rufugo tikkere am saatunde fuu dow maɓɓe nder ladde ngam nattingo ɓe.

¹⁴Ammaa mi waɗaay ɗum, ngam taa ummaatooje kallina innde am. Ngam ɗe ngi'i no mi wurtiniri ɓe lesdi Misra.

¹⁵Fahin mi hunani ɓe nder ladde, mi nastintaa ɓe nder lesdi ndi ngeɗanmi ɓe, lesdi keewndi kosam e njumri, ɓurndi lesɗe fuu wooɗugo.

¹⁶Ngam ɓe njawi farillaaji am, ɓe luuti kiitaaji am, ɓe coɓni nyalɗe ciwtorɗe ɗe ndarnumi boo. Ɓerɗe maɓɓe ɗakkotiri bee labbi maɓɓe.

¹⁷Ammaa mi enɗi ɓe. Mi mbaraay ɓe, mi nattinaay ɓe nder ladde.

¹⁸Mi yecci ɓiɓɓe maɓɓe nder ladde: Taa tokke umrooje baabiraaɓe mon, taa tokke al'aada maɓɓe, taa coɓne ko'e mon bee labbi maɓɓe.

¹⁹Min woni Allah Jawmiraawo mooɗon. Ɗowtane farillaaji am e kiitaaji am.

²⁰Cene nyalɗe ciwtorɗe ɗe ndarnumi, haa ɗe laato alaama hakkunde am bee mooɗon, haa on paama min woni Allah Jawmiraawo mooɗon.”

²¹“Ammaa ɓikkoy boo tuurtani yam. Ɓe ɗowtanaaki farillaaji am, ɓe luuti kiitaaji am geeɗinanɗi tokkiiɗo ɗi fuu. Kamɓe boo ɓe coɓni nyalɗe ciwtorɗe ɗe ndarnumi. Mi taaskino rufugo tikkere am fuu dow maɓɓe, haa mi feewtina ɓernde am dow maɓɓe nder ladde.

²²Ammaa mi halkaay ɓe, ngam taa ummaatooje kallina innde am. Ngam ɗe ngi'i no mi wurtiniri Isra'iila'en diga lesdi Misra.

²³Nder ladde boo, mi ɓaŋgti juŋngo am mi huni hunayeere haa mi saŋkita ɓe caka ummaatooje lesɗe feere feere,

²⁴ngam ɓe ɗowtanaaki farillaaji am, ɓe luuti kiitaaji am, ɓe coɓni nyalɗe ciwtorɗe, ɓe tokki labbi kaakiraaɓe maɓɓe.

²⁵Nden mi hokki ɓe farillaaji kalluɗi e kiitaaji ɗi ngeeɗintaa ɗowtaniiɓe ɗi.

²⁶Mi soɓni ɓe bee dokke maɓɓe, yaake ɓe ɗonno lii'o afɓe maɓɓe worɓe, ɓe ngula ɓe ngam labbi. Kanjum mbaɗmi ngam hiitaago ɓe, ngam haa ɓe paama min woni Jawmiraawo.

²⁷Ngam maajum, ɓii-Aadama, wolwan yimɓe Isra'iila, yeccu ɓe: Ndaa nii Allah Jawmiraawo wi'i: Fahin kaakiraaɓe mon ngewi umroore am, mbolwi kalluka dow am.

²⁸Mi nastini ɓe nder lesdi ndi kuniimi hokkugo ɓe. Nde ɓe ngi'i towndiije e leɗɗe cukkuɗe, ɓe lii'i kirsaaɗi haa nokkuuje ɗe'e fuu. Ɓe tikkini yam bee lii'ango labbi maɓɓe guleteeɗi marɗi uureeŋgol belŋgol e dokke maɓɓe dufeteeɗe.

²⁹Mi ƴami ɓe: Nokkuure townde nde njahoton, ɗum ɗume? Haa wargo hannde, innde maare Bama, waato nokkuure townde.

³⁰Ngam maajum yeccu yimɓe Isra'iila ni'i: Ndaa nii Allah Jawmiraawo wi'i: Onon on coɓni ko'e mooɗon bee tokkaago ko kaakiraaɓe mooɗon mbaɗno, on mbaɗi daakaareeku bee kuuɗe nyidduɗe ɗe ɓe kuuwno.

³¹Haa wargo hannde on ɗon coɓna ko'e mon, ngam on ɗon teddina labbi ɗi'i. On ɗon lii'ano ɗi ɓikkoy mon, on ngula koy. Kadiboo on ɗon ngara ƴamugo muuyo am, onon yimɓe Isra'iila! Allah Jawmiraawo wi'i: Fakat bana mi geeto, mi jaɓataa on ƴamammi.

³²On nufi laataago bana ummaatooje goɗɗe, bana yimɓe jooɗiiɓe nder lesɗe feere, haa on cujidana leɗɗe e kaa'e. Ɗum heɓataako.”

³³Allah Jawmiraawo wi'i: “Fakat bana mi geeto, mi laamanto on bee juŋngo semmbiɗŋgo, bee baawɗe am, mi rufan tikkere am dow mooɗon.

³⁴Mi wurtinan on nder ummaatooje, mi mooɓtan on diga lesɗe haa on caŋkiti. Mi waɗan ɗum bee juŋngo am semmbiɗŋgo bee rufugo tikkere am dow mooɗon.

³⁵Mi yahran on nder ladde. Ton ndarnanmi on yeeso am, haa mi ta'ana on kiita.

³⁶Mi ta'anan on kiita bana kuuwrumi kaakiraaɓe mon nder ladde Misra.” Non Allah Jawmiraawo wi'i.

³⁷“Mi saalinan on les sawru am, mi lima on bana gaynaako limrata tokkere mum. Mi ɗowan on fodde alkawal ngal kaɓɓumi bee mooɗon.

³⁸Mi wurtinan tuurtaniiɓe yam e mbarooɓe ko'e caka mooɗon. Mi wurtinan ɓe lesdi ndi ɓe ngoni jonta, ammaa ɓe lorataako haa lesdi Isra'iila. Nden kam on paaman min woni Jawmiraawo.”

³⁹Allah Jawmiraawo wi'i: “Onon yimɓe Isra'iila, njehe, ndewe labbi mon kadi! Ammaa ɓaawo maajum, fakat on ɗowtanto yam, on meetataa soɓnugo innde am seniinde bee dokke mon e labbi mon.”

⁴⁰Allah Jawmiraawo wi'i: “Haa ton dow hooseere am seniinde, dow hooseere Isra'iila townde, onon yimɓe Isra'iila fuu on njagganto yam. Ton mi yerdoto on, ton mi ƴamata on dokke mon itteteeɗe e dokke mon aartuɗe e kuuje mon cenaaɗe fuu.

⁴¹Mi wurtinan on caka ummaatooje lesɗe haa on caŋkiti fuu, mi mooɓtan on. Ɓaawo maajum njaɓanmi dokke mon guleteeɗe, mi yerdoto on. Mi hollan senaare am caka mooɗon yeeso ummaatooje fuu.

⁴²Mi hooran on haa lesdi Isra'iila ndi kuniimi hokkugo kaakiraaɓe mon. Nden kam on paaman min woni Jawmiraawo.

⁴³Ton on ciftoran kuuɗe mon coɓnuɗe on fuu. On ndaaran ko'e mon on nyidduɓe ngam kuuɗe mon kalluɗe ɗe kuuwɗon fuu.

⁴⁴Onon yimɓe Isra'iila, on paaman min woni Jawmiraawo, ngam mi waɗataa on fodde laabi mon kalluɗi e kuuɗe mon bonniiɗe, ammaa mi waɗan ngam mi teddina innde am.” Non Allah Jawmiraawo wi'i.