Read Fulfulded Ezekiyel 28 Bible Online

Ezekiyel 28 - Fulfulded bible

Ezekiyel 28

¹Ndaa Jawmiraawo wolwani yam, wi'i:

²“Ɓii-Aadama, yeccu mawɗo Tirus: Ndaa nii Allah Jawmiraawo wi'i: Ɓernde ma mawniti, a wi'i: Min mi ɗowanteeɗo, mi mari joonde caka ɗowanteeɓe haa caka mbeela. A laari hoore ma bana Allah, ammaa a neɗɗo maayanɗo, naa a ɗowanteeɗo.

³A tammi a ɓuri Daniyel hikma, walaa sirri suuɗi haa maaɗa.

⁴Anndal ma e hakkiilo ma ndiskini ma. A heɓi cardi e kaŋŋeeri, a nastini ɗi nder ndesaaje ma fuu.

⁵Bee anndal ma ɗuuɗŋgal e filu ma a ɗuɗɗiniri maral ma. Ngam daliila risku ma, ɓernde ma mawniti.

⁶Ngam maajum min Allah Jawmiraawo mi wi'i: Ngam a nanndini numo ma bee numo am,

⁷ndaa, mi yahran jananɓe dow maaɗa, ɓuranɓe saatugo nder ummaatooje fuu. Ɓe losan kaafaaje maɓɓe dow maaɗa ngam ɓe nattina anndal ma booɗŋgal, ɓe njawa daraja ma.

⁸A maayan maayde naawnde nder luggeeŋga ndiyamji, ɓe njippinte nder ngaska lugguka.

⁹To ɓe ngari mbarugo ma, a tokkoto wi'ugo a ɗowanteeɗo na? To mbarooɓe ma naŋngi ma, nden kam a neɗɗo meere, naa a ɗowanteeɗo sam.

¹⁰A maayan maayde yurumnde bana saadooni'en haa juuɗe jananɓe ɓe'e. Min Allah Jawmiraawo wi'i ɗum.”

¹¹Kadiboo Jawmiraawo wolwani yam, wi'i:

¹²“Ɓii-Aadama, waɗ gimol ngam woyugo laamiiɗo Tirus! Yeccu mo: Ndaa nii Allah Jawmiraawo wi'i: Naane ɓe mbaari ma misaalu huunde timmunde. Yaake man a keewɗo anndal, a ŋarniiɗo timmuɗo.

¹³A ɗon jooɗi nder Adnin, jarne Allah. A pawniiɗono bee kaa'e feere feereeje marɗe saman ɗuuɗɗo: Yaspa, sardiyus, tupas, kirisoliti, lipinlaare, onikis, imiradi, haako-haakoore, safira[23]. A woodi boo fawne kaŋŋeeri feere, kuuwaaɗe ngam maaɗa nyalaade nde a taga.

¹⁴Mi laatinino ma keruba mawɗo, aynoowo. Mi jo'inino ma dow hooseere am seniinde, a ɗonno waanca caka kaa'e ɗelkanɗe.

¹⁵A walaano feloore diga nyannde tageeki ma haa halleende ma waŋgi.

¹⁶A sukli bee filu, kanjum laatini ma a toonyoowo, marɗo hakke. Ngam maajum mi riiwi ma e hooseere am seniinde. An keruba aynoowo, mi halki ma caka kaa'e ɗelkanɗe.

¹⁷Ɓernde ma mawniti ngam daliila ŋarol ma, a wonni hikma ma ngam mawningo daraja ma. Mi sakkini ma haa lesdi, mi acci ma ton ngam reentingo[24] laamiiɓe yi'ɓe ma.

¹⁸Bee aybeeji ma ɗuuɗɗi e filu ma kalluŋgu a soɓniri nokkuuje ma cenaaɗe. Ngam maajum kuɓɓumi yiite nder maaɗa, nge wuli ma. Mi wartiri ma ndoondi yeeso laarɓe ma fuu.

¹⁹Annduɓe ma nder ummaatooje kultori daliila maaɗa, a laatani ɓe kulniiɗo. A halki haa foroy.”

²⁰Ndaa Jawmiraawo wolwani yam, wi'i:

²¹“Ɓii-Aadama, laar gal berniwol Sidon. Waɗ annabaaku dow maagol.

²²Yeccu ngol: Ndaa nii Allah Jawmiraawo wi'i: An Sidon, mi honete, mi teddinan hoore am nder maaɗa. Yimɓe paaman min woni Jawmiraawo, saa'i mi waŋginta senaare am nder maaɗa bee hiitaago wonɓe nder maaɗa.

²³Mi ukkante nyawu kalluŋgu ndaaɓoowu, mi ilnan ƴiiƴam haa buuwi ma. Kaafahi ukkanto ma nder taarde fuu, mbaran yimɓe ma. Nden kam ɓe paaman min woni Jawmiraawo.”

²⁴Jawmiraawo wi'i: “Nder ummaatooje taariiɗe, jawotooɗe yimɓe Isra'iila walaa koo woore meetata laataago bana gi'e e giŋngille ngam naawnugo yimɓe Isra'iila. Ɗe paaman min woni Allah Jawmiraawo.”

²⁵Ndaa nii Allah Jawmiraawo wi'i: “Mi hooran yimɓe Isra'iila diga ummaatooje haa caŋkititmi ɓe. Bana non mbaŋginiranmi senaare am yeeso ummaatooje fuu. Yimɓe Isra'iila njooɗoto fahin nder lesdi muuɗum'en ndi ndokkumi Yaakubu, jagganiiɗo yam.

²⁶Ɓe njooɗoto ton bee hoolaare, ɓe nyiɓan cuuɗi, ɓe njuboto gese inabooje boo. Ammaa mi hiitoto heeddiɗɗiraaɓe maɓɓe yawiiɓe ɓe saa'i Isra'iila'en njooɗoto jam. Nden kam ɓe paaman min woni Allah Jawmiraawo maɓɓe.”