Read Fulfulded Ezekiyel 35 Bible Online

Ezekiyel 35 - Fulfulded bible

Ezekiyel 35

¹Ndaa Jawmiraawo wolwani yam, wi'i:

²“Ɓii-Aadama, laar gal lesdi kooseeje Se'ir, waɗ annabaaku dow maaje.

³Yeccu lesdi ndi'i: Ndaa nii Allah Jawmiraawo wi'i: An lesdi kooseeje Se'ir, mi honete! Mi fortan juŋngo am dow maaɗa, mi laatinte ladde meere, hulniinde.

⁴Mi wartiran berniiji ma bille, a laatoto ladde meere. Nden a faaman min woni Jawmiraawo.

⁵Ngam diga ɓooyma a konneejo am. A acci Isra'iila'en haa konne'en mbari ɓe bee kaafahi nder wakkati ɓillaare maɓɓe, saa'i kiita ragareeha dow hakkeeji maɓɓe.

⁶Ngam maajum, fakat bana min Allah Jawmiraawo mi geeto, mi wartirte ƴiiƴam, ƴiiƴam boo tokkoto ma. A miijaaki rufugo ƴiiƴam, ngam maajum ƴiiƴam tokkoto ma.

⁷Lesdi kooseeje Se'ir, mi wartirte ladde meere, mi mbaran koo moy caalotooɗo dow maaɗa.

⁸Mi suddan kooseeje ma bee nyawmanɗe, mbaraaɓe bee kaafahi cuddan towndiije e waadiiji ma fuu.

⁹Mi laatinan lesdi ma ladde haa foroy, walaa mo meetata jooɗaago nder berniiji ma.” Nden kam a faaman min woni Jawmiraawo.

¹⁰A wi'i: Mi maran ummaatooje ɗiɗi, Yahuuda e Isra'iila bee lesɗe maaje. A tammi marugo ɗe, koo to min Jawmiraawo mi ɗon ton.

¹¹Ngam maajum, fakat bana min Allah Jawmiraawo mi geeto, mi warjoto tikkere ma e kaajal ma e nganyŋgu ma dow yimɓe am. Saa'i ɓe ngi'an no mi hiitorto ma, mi anndinan hoore am caka maɓɓe.

¹²Nden kam a faaman min Jawmiraawo mi nani bolle ma kalluɗe fuu, nde mbi'ɗa: Kooseeje Isra'iila perwi, ɗe ndokkaama yam, sey mi nyaama ɗe.

¹³Hunnduko ma mawniti dow am, a wolwi bolle ƴaggiiɗe dow am. Min mi nani ɗum.

¹⁴Ndaa nii Allah Jawmiraawo wi'i: “Mi wartirte ladde meere, haa duniyaaru fuu seyoro do'ere ma,

¹⁵bana an a seyi saa'i Isra'iila, lesdi maral am laati bille. Lesdi kooseeje Se'ir, lesdi Edoom fuu, a fuu a laatoto ladde meere. Nden koo moy faaman min woni Jawmiraawo.”