Read Fulfulded Ezekiyel 41 Bible Online

Ezekiyel 41 - Fulfulded bible

Ezekiyel 41

¹Nden goɗɗo go yahri yam nder haykaliiru. O foondi mahi haa buttuli dammugal ɗiɗi fuu, meetir tati bee reeta ɗo bee to.

²Njaajirka dammugal waɗi meetir jowi, tekkeeŋga mahi haa buttuli dammugal boo, meetir ɗiɗi bee reeta ɗo bee to. O foondi haykaliiru, njuutirka maaru waɗi meetir noogas, njaajirka maaru boo, meetir sappo.

³Nden o yehi haa suudu sakkitiindu. O foondi mahi haa buttuli dammugal ɗiɗi fuu, meetir tati ɗo bee to. Njaajirka dammugal waɗi meetir tati bee reeta, tekkeeŋga mahi haa buttuli dammugal boo, meetir gootel.

⁴O foondi suudu ndu'u, njuutirka maaru waɗi meetir sappo, njaajirka maaru boo meetir sappo. Nden o wi'i yam: “Kanjum woni nokkuure ɓurnde senaago.”

⁵Goɗɗo go foondi mahol haykaliiru yaasiwol, meetir tati. Woodi suudu marndu taytaaji, taariindu haykaliiru fuu. Suudu man ɗon ɗakkotiri bee haykaliiru. Njaajirka maaru waɗi meetir ɗiɗi.

⁶Suudu man ɗon yowndindiri suudu dow suudu tati. Suudu nduyeeru fuu woodi taytaaji cappanɗe tati. Diga yeɓre les haa yeɓre caka haa yeɓre dow, tekkeeŋga mahol haykaliiru tokki ustaago, ngam taa geɓe man nasta nder mahol haykaliiru, ammaa ɗe mbaalo dow mahol yaasiwol.

⁷Haa suudu dow suudu fuu, ko taari haykaliiru, njaajirka cuuɗi ɓesdi ngam ɗum hoosi yeɓre tekkeeŋga mahol haykaliiru. Ngam maajum to goɗɗo ɗon wa'o, babal suudu ɗon yaaja. Diga suudu lesru, goɗɗo waawan yahugo haa cakaaru e dowru.

⁸Mi yi'i taŋkol taariiŋgol haykaliiru fuu, towirka maagol foti kal-kal bee caɓɓaaje suudu marndu taytaaji haa haykaliiru, sawru wooru haa dow babal.

⁹Mahol suudu man yaasiwol waɗi meetir ɗiɗi bee reeta. Hakkunde taŋkol e cuuɗi liman'en go, woodi daldal taariiŋgal haykaliiru, njaajirka maagal waɗi meetir sappo.

¹¹Woodi dammugal nastugo taytaaji haa wakeere haykaliiru woylaare, non boo dammugal haa wakeere fombinaare. Njaajirka taŋkol taariiŋgol taytaaji ɗi'i waɗi meetir ɗiɗi bee reeta.

¹²Woodi suudu mawndu haa hiirnaaŋge haykaliiru, daldal ɗon hakkunde haykaliiru e suudu man. Njuutirka maaru, meetir cappanɗe nayi e jowi, njaajirka maaru meetir cappanɗe tati e jowi, mahi maaru boo, meetir ɗiɗi bee reeta.

¹³Goɗɗo go foondi yaasi haykaliiru. Njuutirka maaru waɗi meetir cappanɗe jowi. Suudu mawndu bee daldal maaru haa hiirnaaŋge go waɗi kanjum boo meetir cappanɗe jowi.

¹⁴Njaajirka yeeso haykaliiru hawtaade bee daldal jaasŋgal haa fuunaaŋge waɗi meetir cappanɗe jowi.

¹⁵Nden o foondi suudu mawndu bee daldal maaru haa hiirnaaŋge go, hawtaade bee laabi haa bakeeje maaru ɗiɗi fuu. Njuutirka maajum, kadiboo meetir cappanɗe jowi. Mahi haykaliiru e suudu sakkitiindu e zawleeru sakkitiindu,

¹⁶nder maaji fuu ɓe takki leɗɗe diga les haa yotti burɗe. Leɗɗe gaafaaɗe ngam burɗe e laabi taariiɗi haykaliiru waato laawol leswol e cakaawol e dowwol ɗon cuddi bee leɗɗe.

¹⁷Mahdi nder haykaliiru fuu, diga dammugal nastirde haa yotti suudu sakkitiindu fawnaama bee leɗɗe cehaaɗe[36]:

¹⁸Suuraaji dibinooje e keruba'en bee tokkindirki nder taarde fuu. Koo moy keruba woodi geese ɗiɗi,

¹⁹yeeso neɗɗo gal dibinoohi haa wakeere nde'e e yeeso mbarooga gal dibinoohi haa wakeere ndeya. Bana non dow mahdi nder taarde fuu,

²⁰diga les haa yotti tiiɗe dammuɗe.

²¹Darduɗe dammuɗe nder suudu haykaliiru mari tolɗi[37] nayi. Yeeso dammugal suudu ɓurndu senaago, taabal jo'inaama.

²²Ɗum nanndi bee hirsirde huuwraande leɗɗe. Towirka maare, meetir bee reeta, njaajirka maare boo meetir gootel. Seraaji maare e be'itiiɗum maare e buttuli maare fuu mbaɗaama bee leɗɗe. Goɗɗo go wi'i yam: “Ɗo woni taabal gonŋgal yeeso Jawmiraawo.”

²³Woodi dammugal nastugo suudu haykaliiru marŋgal pareeje ɗiɗi. Dammugal nastugo suudu ɓurndu senaago boo woodi pareeje ɗiɗi.

²⁴Dammugal ngale fuu woodi pareeje ɗiɗi, ɗe maɓɓititto haa nyaamo e nano.

²⁵Woodi suuraaji dibinooje e keruba'en cehaaɗi nder pareeje haykaliiru, bana dow mahdi. Haa yaasi zawleeru haykaliiru, woodi daŋki leɗɗe cehaaɗe haa dow nastirde maaru.

²⁶Burɗe taarniraaɗe leɗɗe ɗon nder mahi suudu man, dow mahi boo suuraaji dibinooje[38].