Read Fulfulded Ezekiyel 42 Bible Online

Ezekiyel 42 - Fulfulded bible

Ezekiyel 42

¹Goɗɗo go wurtini yam, yahri yam haa daldal yaasiwal, gal woyla. O yahri yam haa suudu wonndu haa woyla suudu mawndu haa hiirnaaŋge haykaliiru go, haa woyla daldal hakkunde haykaliiru e suudu mawndu boo.

²Njuutirka suudu man haa wakeere woylaare, meetir cappanɗe jowi, njaajirka maaru boo meetir noogas e jowi.

³Haa wakeere woore ndu jokki bee daldal nderwal ngal meetir sappo, haa wakeere gaɗaare boo ndu ɗon tiitotiri bee taŋkol kaa'e haa sera daldal yaasiwal. Ndu ɗon bee laabi tati jowjowtirɗi bana ba'orɗe.

⁴Haa wakeere maaru woylaare, woodi laawol. Njaajirka maagol, meetir jowi, njuutirka maagol boo meetir cappanɗe jowi. Dammuɗe suudu ɗon gal laawol man.

⁵Taytaaji dowji nder suudu ɓuri rammugo dow cakaaji e lesji, ngam suudu fuu ɗon bee laabi tati jowjowtirɗi bana ba'orɗe. Walaa daŋraŋge nder maaru bana nder cuuɗi goɗɗi haa daldal yaasiwal.

⁷Taytaaji feere ɗon haa sera daldal yaasiwal. Njuutirka man waɗi meetir noogas e jowi. Woodi mahol tiitotirŋgol bee taytaaji suudu go gal wakeere daldal yaasiwal, njuutirka maagol waɗi meetir noogas e jowi. Njuutirka suudu go fuu waɗi meetir cappanɗe jowi.

⁹Haa wakeere suudu fuunaaŋgeere ndu'u, haa fuɗɗoode mahol go, goɗɗo garanɗo diga daldal yaasiwal nastan ngam yottaago haa dammuɗe taytaaji suudu ndu'u. Haa wakeere haykaliiru fombinaare, woodi suudu ɗiɗawru fotanndu kal-kal bee aranndu. Ndu ɓadi bee suudu mawndu haa hiirnaaŋge haykaliiru e daldal yeeso maaru go.

¹¹Yeeso taytaaji maaru, woodi laawol bana haa wakeere woylaare. Ndu foti kal-kal bee suudu woylaaru, non boo nyiɓaalo maaru e dammuɗe maaru fuu.

¹²Haa wakeere maaru fuunaaŋgeere, haa fuɗɗorde mahol tiitotirŋgol bee suudu ndu'u, goɗɗo garanɗo diga daldal yaasiwal nastan ngam yottaago dammuɗe taytaaji suudu haa wakeere maaru fombinaare.

¹³Goɗɗo go wi'i yam: “Cuuɗi ɗi'i haa woyla e fombina, baŋnge daldal hakkunde haykaliiru e suudu mawndu haa hiirnaaŋge, ɗi ceniiɗi. Liman'en huuwooɓe yeeso Jawmiraawo, nyaaman ton dokke ɓurɗe senaago. Ɓe njo'inan dokke ɓurɗe senaago nder maaji, waato dokke nyaamdu e kirsaaɗi ngam ittuki hakke e joɓki aybe. Ngam cuuɗi ɗi'i ɗi ceniiɗi.

¹⁴Ɓaawo liman'en kuuwi nder haykaliiru, taa ɓe ngurto ɓe njaha haa daldal yaasiwal bilaa ɓortugo limce kuugal maɓɓe nder cuuɗi ɗi'i tawon, ngam ɗe cenaaɗe. Nden ɓe ɓorno limce goɗɗe, ɓe njaha haa nokkuure nde yimɓe ngoni.”

¹⁵Nde goɗɗo go timmini foondugo ko woni nder saare haykaliiru, o wurtini yam haa nastirde fuunaaŋgeere. Nden o foondi yaasi saare.

¹⁶O foondi wakeere fuunaaŋgeere bee sawru foondirdu, meetir teemeɗɗe ɗiɗi bee cappanɗe jowi[39].

¹⁷Nden o foondi wakeere woylaare, meetir teemeɗɗe ɗiɗi bee cappanɗe jowi.

¹⁸Nden o foondi wakeere fombinaare, meetir teemeɗɗe ɗiɗi bee cappanɗe jowi.

¹⁹Nden o yehi haa wakeere hiirnaaŋgeere, o foondi bee sawru foondirdu, meetir teemeɗɗe ɗiɗi bee cappanɗe jowi.

²⁰Bana nii o foondiri saare haa bakeeje nayi fuu. Mahol ɗon taari nde, njuutirka maagol, meetir teemeɗɗe ɗiɗi bee cappanɗe jowi, njaajirka maagol boo meetir teemeɗɗe ɗiɗi bee cappanɗe jowi. Mahol man ɗon sennda hakkunde ceniiɗum e ko senaaki.