Read Fulfulded Ezekiyel 43 Bible Online

Ezekiyel 43 - Fulfulded bible

Ezekiyel 43

¹Goɗɗo go yahri yam haa daldal yaasiwal haa nastirde fuunaaŋgeere.

²Mi yi'i tedduŋgal Allah Isra'iila'en, ɗon wara diga fuunaaŋge. Hoolo man laati bana iidaaŋgo ndiyamji mawɗi, duniyaaru yayni bee tedduŋgal maako.

³Wahayu mo ngi'mi, nanndi bee mo naane, nde Allah warino ngam halkugo Urusaliima. Mo nanndi bee ko ngi'noomi haa maayo Kebar boo. Mi sujidi.

⁴Tedduŋgal Jawmiraawo saali nder nastirde fuunaaŋgeere, nasti haykaliiru.

⁵Ruuhu Allah eeŋgini yam, jippini yam haa daldal nderwal. Ndaa, tedduŋgal Jawmiraawo heewi haykaliiru.

⁶Goɗɗo go ɗon dari baŋnge am. Mi nani boo goɗɗo feere ɗon wolwanammi diga nder haykaliiru.

⁷O wi'i: “Ɓii-Aadama, haa ɗo woni leeso laamu am e jaaɓruɗum kosɗe am. Haa ɗo njooɗotoomi caka yimɓe Isra'iila haa foroy. Kamɓe e laamiiɓe maɓɓe meetataa soɓnugo innde am seniinde bee daakaareeku maɓɓe, koo bee darnugo kaa'e maandorɗe ngam laamiiɓe maɓɓe maayɓe.

⁸Laamiiɓe njo'ini suudu muuɗum'en baŋnge suudu am, darduɗe dammugal maɓɓe boo baŋnge darduɗe dammugal am. Mahol gootol tan senndi hakkunde am bee maɓɓe. Ɓe coɓni innde am seniinde bee kuuɗe maɓɓe nyidduɗe. Daliila tikkere am kalkumi ɓe.

⁹Sey ɓe acca daakaareeku maɓɓe jonta, ɓe itta ɓalli laamiiɓe maɓɓe maayɓe. Nden kam mi jooɗoto caka maɓɓe haa foroy.”

¹⁰Jawmiraawo tokki wi'ugo: “Ɓii-Aadama, anndin yimɓe Isra'iila haala haykaliiru ndu'u, ngam ɓe cemtira kuuɗe maɓɓe kalluɗe e ɓe ndaarta misaalu nyiɓol ngo'ol.

¹¹To ɓe cemtiri kuuɗe maɓɓe, faamtin ɓe misaalu haykaliiru: Jaati maaru e ko woni nder maaru, nastirɗe e gurtorɗe maaru e umrooje e farillaaji dow maaru fuu. Winndu ɗum yeeso maɓɓe, haa ɓe paama no kuuje fuu mba'i, ɓe tokko umrooje e farillaaji man fuu.

¹²Ndaa umroore dow haykaliiru: Lesdi taariindi ndi'i ɓurndi senaago.”

¹³Ndaa poonduki hirsirde bee poondirgol maŋngol fodde fiyannde mawnde, waato fiyannde famarde e njaajirka newre. Gasol taari les maare. Luggirka maagol waɗi reetita meetir, njaajirka maagol boo reetita meetir. Faddorde nde towugo mum deydey hapakaare ɗon taari ngol haa yaasi.

¹⁴Yeɓre hirsirde lesre, towirka maare meetir gootel. Yeɓre ɗiɗawre lori ɓaawo, reeta meetir nder taarde fuu. Towirka maare, meetir ɗiɗi. Yeɓre dowre, kayre boo nde lori ɓaawo, reeta meetir nder taarde fuu.

¹⁵Towirka maare, meetir ɗiɗi. Dow yeɓre man ɓe ngulata kirseteeɗi. Seɓattooji maare njuuti dow maare bana luwe.

¹⁶Yeɓre dowre nde'e mari tolɗi nayi, njuutirka maare, meetir joweego, njaajirka maare boo meetir joweego.

¹⁷Yeɓre cakaare boo mari tolɗi nayi, meetir joweeɗiɗi ɗo bee to. Njaajirka gasol waɗi reeta meetir, faddorde maagol boo reetita meetir. Ba'orɗe ngam wa'aago haa hirsirde ɗon haa wakeere fuunaaŋgeere.

¹⁸Allah Jawmiraawo wi'i yam: “Ɓii-Aadama, nan farillaaji am. To hirsirde nyiɓaama, sey a sena nde bee wulugo guleteeɗi dow maare, bee wiccugo ƴiiƴam kirseteeɗi dow maare boo.

¹⁹Liman'en iwɓe lenyol Lewi, danygol Cadok, kamɓe ɓe ɓadito yam ngam kuugal. Min Allah Jawmiraawo umri ɗum. A hokka ɓe ngaari kalhaldi, ndi kirseteendi ngam ittuki hakke.

²⁰Hoo'u ƴiiƴam maari seɗɗa, a waɗa ɗam haa luwe hirsirde, non boo haa seɓattooji yeɓre maare cakaare e faddorde maare fuu. Bana nii laɓɓinirta e cenirta nde.

²¹Nden hoo'u ngaari kirsaandi ngam ittuki hakke go, ɓe ngula ndi haa nokkuure ta'aande yaasi nokkuure seniinde.

²²Jaŋngo man, sey a hoo'a njawdiri mbeewa ndi walaa aybe, lii'anam ndi kirseteendi ngam ittuki hakke. Sen hirsirde bee ƴiiƴam maari, bana a waɗno bee ngaari kalhaldi.

²³Ɓaawo a timmini laɓɓinki man, hoo'u gaggel e njawdiri mbaalu, ɗum walaa aybe ɗiɗi fuu.

²⁴Waddu ɗum yeeso am. Sey liman'en cammina mannda dow maajum, nden ɓe lii'ano yam ɗum guleteeɗum.

²⁵Nde weeti fuu lii'anam njawdiri mbeewa kirseteendi ngam ittuki hakke, non boo gaggel e njawdiri mbaalu, ɗum fuu ɗum walaa aybe. Waɗ ɗum nyalɗe joweeɗiɗi.

²⁶Sey liman'en cena hirsirde nyalɗe joweeɗiɗi, ɓe laɓɓina nde, ɓe taaskina nde ngam puɗɗuki kuugal.

²⁷Ɓaawo asaweere man, liman'en puɗɗa lii'aago guleteeɗi mooɗon e kirseteeɗi mooɗon ngam kawtal yimɓe bee Allah dow hirsirde nde'e. Nden kam mi yerdoto on. Min Allah Jawmiraawo wi'i ɗum.”