Read Fulfulded Ezekiyel 44 Bible Online

Ezekiyel 44 - Fulfulded bible

Ezekiyel 44

¹Goɗɗo go yahri yam haa nastirde haa daldal yaasiwal haa wakeere haykaliiru fuunaaŋgeere. Nastirde man ɗonno maɓɓi.

²Jawmiraawo wi'i yam: “Zawleeru ndu'u maɓɓaama, ndu meetataa maɓɓiteego boo. Walaa neɗɗo nastata ndu, ngam min Jawmiraawo Allah Isra'iila'en, mi nasti haa maaru.

³Sey laamiiɗo tan wara ɗo ngam nyaamugo nyaamdu yeeso am. O nasta ndu bee laawol zawleeru yolndeeru, o wurtoro bee laawol man boo.”

⁴Nden goɗɗo go tokkini yam gal nastirde woylaare, yahri yam yeeso haykaliiru. Mi laari, ndaa, suudu Jawmiraawo heewi tedduŋgal maako. Mi sujidi.

⁵Jawmiraawo wi'i yam: “Ɓii-Aadama, hakkilan ko ngi'ata, ko nanata fuu. Mi anndinte umrooje e farillaaji dow haykaliiru fuu. Anndu mo heɓan nastugo e wurtaago haa nokkuure seniinde.

⁶Yeccu yimɓe Isra'iila tuurtooɓe ɓe'e: Ndaa nii Allah Jawmiraawo wi'i: Onon Isra'iila'en, kuuɗe mon nyidduɗe ke'i!

⁷On coɓni suudu am seniindu. Saa'i on lii'ani yam ɓellere e ƴiiƴam kirsaaɗi, on acci jananɓe nasti ndu. Kamɓe ɓe saadooni'en, heefeerɓe. Bana nii on piistiri alkawal am bee kuuɗe mon nyidduɗe fuu.

⁸Onon on kuuwaay kuugal diina nder nokkuure am seniinde, ammaa on kalfitini ngal haa juuɗe jananɓe.”

⁹Ndaa nii Allah Jawmiraawo wi'i: “Walaa jananno saadooniijo keefeero nastata nokkuure am seniinde, koo to o ɗon jooɗi caka Isra'iila'en boo.

¹⁰Lewi'en accuɓe yam nde Isra'iila'en luttuɓe ngayliti, acci yam ngam tokkaago labbi, sey ɓe ndoondo kiita aybe maɓɓe.

¹¹Ɓe kuuwanammi nder nokkuure am seniinde. Ɓe ayna nastirɗe maare, ɓe kuuwa nder suudu haykaliiru, ɓe kirsa dabbaaji ɗi yimɓe ngaddata ngam lii'anaago yam guleteeɗi e kirseteeɗi, ɓe kuuwana yimɓe.

¹²Ɓe ardi yimɓe Isra'iila nder dewal labbi, bana nii ɓe nastiniri yimɓe nder aybe. Ngam maajum min Allah Jawmiraawo mi ɓaŋgti juŋngo am, mi huni: Fakat ɓe hiiteteeɓe ngam aybe maɓɓe.

¹³Ɓe kuuwantaa yam kuugal limanku, taa ɓe ɓadito kuuje am ceniiɗe, sakkomaa kuuje ɓurɗe senaago. Sey ɓe ndoondo toskaare maɓɓe ngam kuuɗe maɓɓe nyidduɗe.

¹⁴Ammaa mi yowanan ɓe kuuɗe kuuweteeɗe nder saare haykaliiru fuu.”

¹⁵Allah Jawmiraawo wi'i: “Liman'en iwɓe lenyol Lewi, danygol Cadok, tokki huuwango yam nder suudu am seniindu, saa'i Isra'iila'en luttuɓe ngayliti, acci yam. Ngam maajum ɓe ɓadito yam ngam huuwango yam, ɓe lii'ano yam ɓellere e ƴiiƴam kirseteeɗi.

¹⁶Kamɓe ɓe nasta nokkuure am seniinde, ɓe kakkilana kuugal am.

¹⁷Koo ndey ɓe nastata suudu nastirde haa daldal nderwal, sey ɓe ɓorno limce leŋ. Taa ɓe ɓorno limce kuuwraaɗe bee gaasa baali, saa'i ɓe ɗon kuuwa kuugal maɓɓe nder nastirɗe haa daldal nderwal, koo nder suudu haykaliiru.

¹⁸Sey ɓe meeto meetaleeji leŋ, ɓe cirlo sirlaaji leŋ, walaa taadorgol ngam taa ɓe ngulina.

¹⁹Hiddeko ɓe ngurto, haa daldal yaasiwal ngam fottugo bee yimɓe, sey ɓe ɓorto limce kuugal maɓɓe, ɓe cigo ɗe nder cuuɗi ceniiɗi. Ɓe ɓorno limce goɗɗe, ngam taa yimɓe meema limce maɓɓe ceniiɗe.

²⁰Taa liman'en laɓa ko'e muuɗum'en. Taa ɓe njoofa gaasa ko'e maɓɓe boo, ammaa ɓe ta'a ka deydey.

²¹Taa ɓe njara inaboojam hiddeko ɓe nasta haa daldal nderwal.

²²Taa limanjo te'a debbo mo gorum maayi malla ceeraaɗo. Sey o te'a paanyo Isra'iilaajo mo meeɗaay gorko malla debbo limanjo maayɗo.

²³Sey liman'en ekkitina yimɓe am senndindirgo ceniiɗum bee ko senaaki, non boo senndindirgo laaɓɗum bee coɓɗum.

²⁴To jokkirgol waɗi, sey ɓe ta'a kiita fodde kiitaaji am. Ɓe kakkilana umrooje am e farillaaji am ngam nyalɗe juulɗe am fuu, ɓe cena nyalɗe ciwtorɗe ɗe ndarnumi boo.

²⁵Taa limanjo soɓna hoore mum bee meemugo maayɗo, sonaa to ɗum baaba maako malla daada maako malla ɓiyiiko malla deerɗiiko gorko malla deerɗiiko debbo mo te'aaka tawon.

²⁶Ɓaawo o seni hoore maako, sey o reena nyalɗe joweeɗiɗi.

²⁷Nden o nasta nokkuure seniinde, o nasta daldal nderwal, o lii'o kirseteeŋga ngam ittugo hakkeeji maako, haa o huuwa kuugal maako nder nokkuure seniinde fahin. Min Allah Jawmiraawo wi'i ɗum.

²⁸Min woni geɗal liman'en. Taa ɓe keɓa maral nder Isra'iila, min woni maral maɓɓe.

²⁹Dokke nyaamdu e kirseteeɗi ngam ittuki hakke e joɓki aybe, kanjum woni nyaamdu maɓɓe. Ɓe keɓan kuuje fuu ɗe yimɓe annini hokkugo yam.

³⁰Ɓurɗum wooɗugo haa ƴaamle e ko yimɓe lii'anto yam fuu, ɗum laatanto liman'en. Koo ndey yimɓe tamsata fuu, ɓe ngaddana liman'en tamre arannde bana dokkal, ngam barka am jooɗo dow ci'e[40] maɓɓe.

³¹Taa liman'en nyaama colli malla dabbaaji baatɗi malla paɗɗaaɗi.”